ހުޅުމާލޭގައި ތަރައްޤީކުރަމުންދާ އެކުއެޓިކް ކޮމްޕްލެކްސްގެ މައި ޕޫލް ހެދުމަށް ކުރަންޖެހޭ މަސައްކަތްތައް ފަށައިފިއެވެ.
ކުޅިވަރާ ބެހޭ ވުޒާރާއިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ، މިހާރު ކުރިއަށްދަނީ ބައިނަލްއަޤުވާމީ އެކުއެޓިކް ކޮމްޕްލެކްސްގެ މައި ޕޫލް ރޭވުމުގެ މަސައްކަތް ކަމަށެވެ.
އެތަނުގ ެމަސައްކަތް ކުރިއަށްދާގޮތް ބައްލަވާލެއްވުމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ މިއަދު އެ ސަރަހައްދަށް ޒިޔާރަތްކުރައްވާފައެވެ.
އެކުއެޓިކްސް ކޮމްޕްލެކްސްގެ ބިނާކުރުމުގެ މަސައްކަތް ކުރިއަށްގެންދަނީ ހުޅުމާލޭ ސްޕޯޓްސް ކޮމްޕްލެކްސް އިމާރާތާއި ޖެހިގެން އޮންނަ ބިމުގައެވެ.  ބައިނަލްއަޤްވާމީ މިންގަނޑުތަކާ އެއްގޮތަށް ޤާއިމްކުރާ މި ކޮމްޕްލެކްސްގައި ފެތުމަށް ހާއްސަ ޕޫލަކާއި، ޑައިވް ޕޫލެއްގެ އިތުރުން، 1200 މީހުންނަށް ކުޅިބަލަންތިބެވޭނެ އިންތިޒާމްތައްވެސް ހުންނާނޭކަމަށް ކުޅިވަރާ ބެހޭ ވުޒާރާއިން ބުނެއެވެ.
އެކުއެޓިކް ކޮމްޕްލެކްސްއަކީ ރާއްޖޭގެ ކުޅިވަރު އެހެން ހަރުފަތަކަށް ގެންދިޔުމުގައި ބޮޑު ހިއްސާއަކަށްވާނެ ވަސީލަތަކަށް ވާނެކަމަށް ވަޒީރު ރާފިއުވަނީ ވިދާޅުވެފައެވެ. މި ކޮމްޕްލެކްސްގައި ޖިމަކާއި، މަލްޓިޕާޕަސް ހޯލެއްގެ އިތުރުން ރެސްޓޯރަންޓްތަކާއި، ކޮމްޕްލެކްސްގައި ހުންނަންޖެހޭ އެހެނިހެން ޚިދުމަތްތައްވެސް ލިބެން ހުންނާނޭކަމަށް އެ ވުޒާރާއިން ވަނީ ބުނެފައެވެ.