ބިސްމީގެ ޓްވީޓަކުން ޕްރޮސިކިއުޓަރ ޖެނެރަލްގެ މަގާމުގެ މަސްއޫލިއްޔަތު އަދާކުރަން އައްބާސް ޝަރީފް ފެށުމަކީ އެކަމުގައި އައްބާސް އަދުލުވެރި ވާނެކަމުގެ ހެއްކެއް ނޫނެވެ. މޫނަކަށް ކަނދުރާއަކަށް ނުބަލާ މަގާމުގެ ވާޖިބު އަދާކުރާނެކަމަށް ޕީޖީ މަގާމު ލިބުމުގެ ކުރިން ޕީޖީ އައްބާސް ޝަރީފް ބުންޏަސް އޭނާއަކަށް އެކަން އެހެނެއް ނުވާނެއެވެ. 
އައްބާސް ޝަރީފަށް މޫނަކަށް ކަނދުރާއަކަށް ނުބަލާ ޕީޖީކަން އަދާކުރެވޭނީ ކިހިނެއް ހެއްޔެވެ. އައްބާސް ޝަރީފަކީވެސް ރައީސް މުއިއްޒުގެ ރަނގަޅު ގޮނޑިކޮއްކޮ އެކެވެ. ރައީސް އޮފީހުގެ ސިޔާސީ ބޮޑު މަގާމެއްގައި ހުއްޓާ އެތަނުން ޕީޖީކަމަށް އިސްކުރީމާ އައްބާސްގެ ވަކިފަރާތަކަށް ޖެހުން އޮންނާނެކަމަށް އޭރުވެސް މީހުން ކިޔެވެ. އައްބާސް ޝަރީފަކީ ރައީސް މުއިއްޒުގެ ކުޅޭކުޅޭ ބުދެކޭ ބުނެފިއްޔާ ގޯސްވާނީ ބުނި މީހެކެވެ. ހަގީގަތުގައިވެސް އައްބާސް ޝަރީފުގެ ނަޒާހަތްތެރިކަމާމެދު ސުވާލު އުފެދެއެވެ. އެކަމަށް ބުރުހާނުކުރާ ބޮޑެތި ކަންކަން އެބަހުއްޓެވެ. 
އާނއެކެވެ. ސިޔާސީ މަގާމެއްގައި ހުއްޓާ ޕްރޮސިކިއުޓަރ ޖެނެރަލްކަން ލިބުމަކީ ގާނޫނީ ވާޖިބު އަދާކުރުމުގައި ވަކި މީހަކަށް ބަލަންޖެހޭ ކަމެއް ނޫނެވެ. އެކަމަކު ޕްރޮސިކިއުޓަރ ޖެނެރަލަކަށް ހުންނަ މީހާގެ ފަހަތުގައި ފޮރުވިފައިވާ އެހެން މަސްލަހަތެއް އޮތްނަމަ އެ މަސްލަހަތު ހިމާޔަތް ނުކުރާނެ އެއްވެސް ގޮތެއް ނުއޮންނާނެއެވެ. ޕްރޮސިކިއުޓަރ ޖެނެރަލްގެ އާއިލީ ޒާތީ މަސްލަހަތު އެހެން ފަރާތަކަށް ބަރޯސާވެފައި އޮތްނަމަ، ބަރޯސާވާ ފަރާތަށް ފޭވަރ ކުރުމަކީ އިންސާނީ ތޮބީއަތެވެ. 
އައްބާސް ޝަރީފް މަގާމު ދިފާއުކޮށް ދެމިހުރުމަށް ރައްޔިތުންގެ މަޖިލީހުގެ މެޖޯރިޓީ ކޮންޓްރޯލްކުރާ ރައީސް މުއިއްޒަށް ވަފާތެރިވާން މަޖުބޫރެވެ. މުއިއްޒު ހިމާޔަތް ނުކޮށެއް އައްބާހަށް މަގާމުގައި ދެމިއެއް ނުހުރެވޭނެއެވެ. މުއިއްޒު ސަރުކާރުން ހިންގާ ޖަރީމާތައް ފޮރުވާދީ މުއިއްޒާއި މުއިއްޒުގެ އައުވާނުންނަކީ ކުށުން ބަރީއަވެފައިވާ ބަޔަކަށް ހަދާދިނުމަކީ އައްބާސް ޝަރީފްގެ ލިޔެވިފައިނެތް ފޮރުވިފައިވާ މަގުސަދެވެ. 
އައްބާސް ޝަރީފަކީ ނަޒާހަތްތެރި ވަކިފަރާތަކަށް ބުރަނުވެ އިންސާފު ގާއިމުކޮށް ދިނުމުގެ ނިޔަތުގައި ޕީޖީ ކަމުގައި ހުންނަ މީހެއް ނަމަ ތިމާގެ އަނބިމީހާ ސަރުކާރުގެ ސިޔާސީ މަގާމެއްގައި ބަހައްޓައިގެން އާއިލާއަށް އެފައިސާ ކާކަށް ނުދޭނެއެވެ. ތައިލެންޑްގައި ހުންނަ ރާއްޖޭގެ އެންބަސީގެ އިސްމަގާމެއްގައި އަނބިމީހާ ބަހައްޓައިގެން އަނބި ދަރިން ތައިލެންޑްގައި ތިބުމުގެ ހަރަދު ސަރުކާރަކުން ނުކުރުވާނެއެވެ. އައްބާސްގެ ކުޑަވެސް އިހުލާސްތެރިކަމެއް ހުރިނަމަ އަނބިމީހާ ސިޔާސީ މަގާމެއްގައި ބަހައްޓައިގެން ނުހުންނާނެއެވެ. 
އަނބިމީހާއަށް ސިޔާސީ މަގާމު ބަހައްޓައިގެން މުއިއްޒު އެ ވަނީ އައްބާސް ޝަރީފުގެ ނަގޫ ފިއްތާލާފައެވެ. ޕީޖީ ކަމުގައި އައްބާސް ޝަރީފް ހުރެގެން މުއިއްޒާއި މުއިއްޒު ސަރުކާރުން ހިންގާ އެއްވެސް ޖަރީމާއެއް އަދުލުވެރިކަމާއެކު ބެލޭނެ ގޮތަކީ ނެތްގޮތެކެވެ.