އެޗްޑީސީގެ މަސައްކަތުގައި ބޭނުންކުރަމުން ދިޔަ ކޮމްޕިއުޓަރ ސިސްޓަމްތަކެއް ގެއްލިފައިވާ ކަމަށް މައުލޫމާތު ލިބިއްޖެއެވެ. ގެއްލިފައިވަނީ 4 ކޮމްޕިއުޓަރ ސިސްޓަމް ކަމަށް މައުލޫމާތު ލިބިފައިވެއެވެ. ކޮމްޕިއުޓަރ ސިސްޓަމްތައް ގެއްލުނީ މިދިޔަ ހުކުރު ދުވަހުގެރޭ (ހޮނިހިރު ދުވަހު ފަތިހު) 5.30 ހާއިރުކަމަށްވެސް މައުލޫމާތު ލިބިފައިވެއެވެ. 
ގެއްލުނު ކޮމްޕިއުޓަރތައް ގެއްލިފައިވަނީ ހުޅުމާލެ ފޭސް2ގެ ފަރުކޮޅުފުށީ ސަރަހައްދުގައި ހުންނަ އެޗްޑީސީގެ ޕްރޮޖެކްޓް އޮފީހުންނެވެ. ކޮމްޕިއުޓަރތައް ބޭރުކޮށްފައިވަނީ އެތާނގެ ކުޑަދޮރަކުން ވަދެގެން ކަމަށް ސީސީޓީވީ ފުޓޭޖުން ދައްކާ ކަމަށް މައުލޫމާތު ލިބިފައިވެއެވެ. މައުލޫމާތު އެނގޭ މީހަކު ބުނި ގޮތުގައި އެތަނަށް ވަނތް މީހުން ވަދެފައިވަނީ ކުޑަދޮރުގެ ތަންޑު ނާޅުވާ ހުއްޓާ ދޮރުފަތް ހުޅުވައިގެންނެވެ. ކުޑަދޮރު ތަންޑު ނާޅާހުރީ ކުރިޔާލާ ރޭވިގެން ކަމަށް ބައެއް މީހުން ދެކެއެވެ.
ފަރުކޮޅުފުށީ ސަރަހައްދުގައި ހުންނަ އެޗްޑީސީގެ ޕްރޮޖެކްޓް އޮފީހަކީ ސަސްޕެންޑްކުރި ސީއެފްއޯ ފާއިދު ކުރިން މަސައްކަތް ކުރި އޮފީހެވެ. ކުރީގެ ސީއެފްއޯ ވަކިކޮށް ފާއިދަށް ސީއެފްއޯކަން ދިނުމަށް އޭނާ މަސައްކަތް ކުރީ އެ އޮފީހުގައެވެ. އޭނާގެ މަސައްކަތް ހެޑް އޮފީހަށް ބަދަލު ކުރިނަމަވެސް އޭގެ ފަހުން ޕްރޮޖެކްޓް އޮފީހުގައި އޭނާ މަސައްކަތްކުރި ކެބިން ހުރީ ހުހަށް ކަމަށް މައުލޫމާތު ލިބިފައިވެއެވެ. 
ކުރީގެ އެމްޑީ ފަޒުލާ ގުޅިގެން އެޗްޑީސީގައި ހިންގި ގިނަ ޖަރީމާތައް ހިންގާފައިވަނީ ޕްރޮޖެކްޓް އޮފީސް ތެރޭގައި ފާއިދު އިސްވެހުރެ ކަމަށް ބެލެވޭކަމަށް އެޗްޑީސީގެ ބައެއް މުއައްޒަފުންގެ ފަރާތުން މައުލޫމާތު ލިބިފައިވެއެވެ. ސީއެފްއޯ ސަސްޕެންޑް ކުރުމާއެކު އެޗްޑީސީގެ ޕްރޮޖެކްޓް އޮފީުގައި ބޭނުން ކުރަމުން އައި ވަކި ކޮމްޕިއުޓަރ ސިސްޓަމްތަކެއް ގެއްލުމުގެ އިއްތިފާގާމެދު ސުވާލު އުފައްދައެވެ. އޭގެ ފަހަތުގައި ޖަރީމާ ތަކެއްގެ ހެކިނައްތާލުން ހިމެނިފައިވެދާނެ ކަމަށް ތުހުމަތު ކުރެވެއެވެ. 
ފުލުހުންނަށް އެކަން އެނގޭކަމަށާއި ވަރަށް ދޭސީ ތަހުގީގެއް އެކަމާއި ގުޅިގެން ކުރަމުންދާ ކަމަށް ވެސް ނަން ހާމަކުރަން ބޭނުންނުވާ މަސްދަރަކުން ބުނެއެވެ. މި ދުވަސްކޮޅަކީ އެޗްޑީސީގެ ތެރެއިން ނާޖާއިޒު މަންފާތަކެއް ނެގުމުގެ މައްސަލަތަކެއް ފެންމަތިވެގެން އުޅޭ ދަނޑިވަޅެކެވެ.