ޖިންސީ އަމަލަކަށް މަގުފަހިވާގޮތަށް ސްކޫލް ކުއްޖަކާ ވާހަކަ ދެއްކި ކަމުގެ ތުހުމަތުގައި ހިރިޔާ ސްކޫލްގެ ޕްރިންސިޕަލް އިސްމާއީލް މަސްރޫފް ހައްޔަރުކޮށްފި އެވެ. ފުލުހުންގެ މީޑިއާ އޮފިޝަލަކު މިރޭ ސަން އަށް ވިދާޅުވީ ޖިންސީ އަމަލަކަށް މަގުފަހިވާގޮތަށް ކުޑަކުއްޖަކާ ވާހަކަދެއްކި ކަމުގެ ތުހުމަތުގައި 37 އަހަރުގެ މީހަކު މިރޭ ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ. އެ މައްސަލައިގެ އިތުރު ތަފްސީލެއް ފުލުހުން ހިއްސާއެއް ނުކުރެއެވެ. މޯލްޑިވްސް ޕޮލިސް ސާވިސްގެ ފެމެލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓުން އަންނަނީ އެ މައްސަލަ ތަހުގީގު ކުރަމުންނެވެ. އެޑިއުކޭޝަން މިނިސްޓްރީގެ ޕާމަނަންޓު ސެކްރެޓަރީ ޑރ. އަބްދުލް މުހުސިން މުހައްމަދު މިރޭ ސަން އަށް ވިދާޅުވީ އެ މައްސަލައިގެ މައުލޫމާތު ހޯދުމުގެ މަސައްކަތް މިނިސްޓްރީ އަންނަނީ ކުރަމުން ކަމަށެވެ. އޭނާ ވިދާޅުވީ ތައުލީމު އުނގެނުމުގައި ދަރިވަރުންނަށް ހިމާޔަތާ ރައްކާތެރިކަން އެޑިއުކޭޝަން މިނިސްޓްރީން ފޯރުކޮށްދޭނެ ކަމަށެވެ.