އާންމުކޮށް ދިވެހިން ބޭނުންކުރާ ކާބޯތަކެތީގެ އަގުތައް ދެނެގަތުމަށް “އެސެންޝަލް ކޮމޮޑިޓީ ޕްރައިޒް އިންޑެކްސް” އެއް ތައާރަފްކުރަން ނިންމާފައިވާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ދައުލަތުގެ މީޑިއާގެ ‘ރާއްޖެ މިއަދު’ ޕްރޮގްރާމްގައި ވާހަކަދައްކަވަމުން މިނިސްޓަރު ސައީދު ވިދާޅުވީ މި ސަރުކާރު އައިސް ފާއިތުވެދިޔަ ދެ ރަމަޟާން މަހު ވެސް އާންމުންނަށް ދަތިނުވެ، އެކަށީގެންވާ އަގުގައި ކާބޯތަކެތި ލިބުނު ކަމަށެވެ. މަދު ހާލަތެއްގައި ދެތިން ދުވަހަށް ބައެއް ތަކެތި ނުލިބި ދިޔަ ނަމަވެސް ކޮންމެވެސް ގޮތަކުން އެކަން ކަމަށް ވެސް ހައްލު ހޯދުނުކަން ސައީދު ވިދާޅުވިއެވެ.
ސައީދު ވިދާޅުވީ އަގުތައް ކޮންޓްރޯލް ކުރުމުގެ ގޮތުން، ނެޝަނަލް ބިއުރޯ އޮފް ސްޓެޓިކްސް އިން ވަރަށް އަވަހަށް ތައާރަފް ކުރާ އިންޑެކްސްގެ ތެރެއިން އެންމެ މުހިއްމު ބާވަތްތަކުގެ އަގުތަކަށް އަންނަ ބަދަލުތައް ދެނެގަންނާނެ ކަމަށާއި ދެ ދުވަހެއްގެ ތެރޭގައި އެ އިދާރާއިން އެކަން އާންމު ކުރާނެ ކަމަށެވެ.
މީގެ ކުރިން ނެޝަނަލް ބިއުރޯ އޮފް ސްޓެޓިކްސް އިން އިންފްލޭޝަން ދެނެގަންނަނީ ކޮންސިއުމާ ޕްރައިޒް އިންޑެކްސް (ސީޕީއައި) ބޭނުން ކޮށްގެންނެވެ. އެއީ ހުރިހާ ބާވަތްތަކެއް އަގުތައް ހިމަނައިގެން ހަދާ ހިސާބެކެވެ. ސްޓެޓިސްޓިކްސް ބިއުރޯއިން އެންމެ ފަހުން މިދިޔަ ޖޫން މަހު އާއްމުކުރި ސީޕީއައި ރިޕޯޓުން ދައްކާ ގޮތުގައި ރާއްޖޭގެ އިންޕްލޭޝަން ހުރީ 3.76 ޕަސެންޓުގައެވެ.
ސައީދު ވިދާޅުވީ ނެޝަނަލް ބިއުރޯ އޮފް ސްޓެޓިކްސް އިން ތައާރަފް ކުރާ އެ އިންޑެކްސްގެ ދަށުން މޮނިޓަރކުރުމަށް 162 އައިޓަމް ހިމަނާފައިވާނެ ކަމަށެވެ. އޭގެ ތެރޭގައި ގޭބީސީތަކުން އާންމުކޮށް ކެއިން ބުއިމަށް ބޭނުންކުރާ 111 އައިޓަމަކާއި، މޭވާއާއި ތަރުކާރީގެ 39 ބާވަތަކާއި، މަހުގެ 10 ބާވަތެއްގެ އިތުރުން ހަކަތައިގެ ދެ އައިޓަމް ހިމެނެއެވެ. އޭގެ ތެރެއިން ވެސް، ‘ކްރިޓިކަލް އައިޓަމް’ގެ ގޮތުގައި, ބަދަލުގައި އެހެން އެއްޗެއް ބޭނުންނުކުރެވޭ 35 ބާވަތް ފާހަގަކޮށްފައިވާނެ ކަމަށް ސައީދު ވިދާޅުވިއެވެ.
މި އައު އިންޑެކްސްއާއެކު މަސް ނިމުމުން އެ ތަކެތީގެ އަގުތައް އުފުލިފައިހުރި މިންވަރު ދެނެގަނެވޭނެ ކަމަށް ސައީދު ވިދާޅުވިއެވެ. އަދި ކާބޯތަކެތީގެ އަގުތައް ދެނެގަތުމުގެ ގޮތުން ކޮންމެ ދުވަހަކު ވެސް ބޮޑެތި ފިހާރަތަކުގައި ތަކެތި ވިއްކާ އަގުތައް ދެނެގަންނާނެ ކަމަށް މިނިސްޓަރު ވިދާޅުވިއެވެ.