ތިބާވީ ކޮންމެ ޙާލެއްގައިވެސް ﷲ ތަޢާލާއަށް ތަޤްވާވެރިވާށޭ ބުނެވޭ ބަހުގެ މާނަ އެކި ގޮތަށް ޢިލްމުވެރިން ސިފަކުރައްވައެވެ. އެއިގެ ތެރެއިން އަހުރެން ސިފަކުރާ އެއްގޮތަކީ ﷲ ތަޢާލާ އާއި ﷲ ތަޢާލާގެ އަޅާ ޢާއި ދެމެދުގައި އޮންނަންޖެހޭ ގުޅުން ބަދަހިކުރުމެވެ. އެގުޅުން އެންމެ ފުރިހަމަ ގޮތުގައި ބޭއްވުމެވެ. 
ބުނަންހެއްޔެވެ؟ އަހުރެމެން ކޮންމެ މުސްލިމަކުވެސް ކޮންމެ ދުވަހަކު އެތައް ފަހަރަކު ސަޖްދަ ކުރަމުއެވެ. ހަމައެކަނި ﷲ ތަޢާލާއަށެވެ. ﷲ ތަޢާލާއަށް ކިޔަމަންތެރިވުމަށެވެ. މުސްލިމަކު ﷲ ތަޢާލާ ނޫން އެހެން އެއްވެސް ފަރާތަކަށް ސަޖްދައެއް ނުކުރާނެއެވެ. އެއީ ކިތަންމެ ބޮޑުވެރިއެއް އަދި ކިތަންމެ ތަނަވަސް މީހެއް އަދި އެމީހަކު ދެކެ ތިމާ ކިތަންމެ ބޮޑަށް ލޯބިވާ މީހަކު ނަމަވެސްމެއެވެ. 
އަދި ކީއްހެއްޔެވެ؟ ﷲ ތަޢާލާއަށް ސަޖިދަކުރާނީ ކުރާހިތުންނެވެ. ވަރަށް ލޯބިންނެވެ. ވަރަށް ކިޔަމަންތެރިކަމާއިއެކުގައެވެ. އެހެނީ ތަޤްވާވެރިޔާގެ ހޮިތް ފުރެމުންދާނީ ﷲ ތަޢާލާއަށް ސަޖްދަކުރުން ގިނަކުރެވުނު ވަރަކުންނެވެ. 
ވަރަށް ކުރުގޮތަކަށް މިބުނެލީ ތިބާވީ ކޮންމެ ޙާލެއްގައިވެސް ﷲ ތަޢާލާއަށް ތަޤްވާވެރިވާށޭ ބުނެވޭ ބަހުގެ މާނައެވެ. ﷲ ތަޢާލާއަށް ތަޤްވާވެރިވާ މީހާ ޢަމަލުކުރާނެ ގޮތެވެ. އަދި އޭނާ އެންމެ ބޮޑަށް ކުރަން ބޭނުންވާނެ ކަންތަކެވެ. 
ލޮބުވެތި އަޚުންނާއި އުޚުތުންނޭވެ! މިބަޔާންކުރިމަގުން ﷲ ތަޢާލާއަށް ތަޤްވާވެރިވާ މީހާއަށް އަބަދުވެސް ދާނީ ﷲ ތަޢާލާގެ ރަޙްމަތް އޮހެމުންނެވެ. އެހެނީ އެކަމުގައި އޮންނަނީ ދެގޮތެކެވެ. އަހުރެމެން ކުރަންޖެހޭ ކަމަކީ ތަޤްވާވެރިވެ ކިޔަމަންތެރިވުމެވެ. ބަދަލުގައި ﷲ ތަޢާލާ މިދުނިޔޭގައިވެސް އަދި އާޚިރަތުގައިވެސް އެމީހަކަށް ﷲ ތަޢާލާ ރަޙްމަތް ލައްވަވާނެތެވެ. އިން ޝާ ﷲ
 
- މުފްތީ މެންކުގެ ދަރުސަކުން