ރާއްޖޭގެ ސިއްހީ އަދި ތައުލީމީ ދާއިރާގެ އުމްރާނީ ތަރައްގީއަށް ގަތަރު ފައުންޑޭޝަންގެ އެހީ ހޯދުމާ ގުޅޭ ގޮތުން ފޮރިން މިނިސްޓަރު ދުންޔާ މައުމޫން، އެ ފައުންޑޭޝަނާއެކު އިއްޔެ މަޝްވަރާ ކުރައްވައިފި އެވެ. ރަސްމީ ދަތުރެއްގައި މިހާރު ގަތަރުގައި ހުންނެވި މިނިސްޓަރު ދުންޔާ ވަނީ ގަތަރު ފައުންޑޭޝަންގެ ރައީސް ސާދު އިބްރާހިމް އަލް މުހައްނަދީއާ އިއްޔެ ބައްދަލުކުރައްވައިފަ އެވެ. އެ ބައްދަލުކުރެއްވުމާ ގުޅޭ ގޮތުން ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނި ގޮތުގައި ގަތަރު ފައުންޑޭޝަނުން ރާއްޖެއަށް ދެމުން އަންނަ އެހީއާ ގުޅޭ ގޮތުން ދެ ބޭފުޅުން މަޝްވަރާ ކުރެއްވި އެވެ. "... ބޮޑަށް މަޝްވަރާކުރައްވާފައި ވަނީ، ހާއްސަކޮށް ރާއްޖޭގެ ތައުލީމާއި ސިއްހީ ދާއިރާ އަށް ބޭނުންވާ އިންފްރަސްޓްރަކްޗާ ބިނާކުރުމާ ގުޅޭ ގޮތުންނެވެ،" ބަޔާނުގައިވެ އެވެ. ގަތަރު ސަރުކާރުގެ ވަރަށް ބޮޑު ބައިވެރިވުމެއް އޮންނަ ގަތަރު ފައުންޑޭޝަނުން ބޮޑަށް އެހީ ދެނީ ވެސް ތައުލީމާއި ސިއްހަތާއި ސައިންސްގެ ދާއިރާއިންނެވެ. އެ ފައުންޑޭޝަނުން ދޭ އެހީ އިތުރުކުރުމަށް މަޝްވަރާކޮށްފައި ވާއިރު، ހުޅުމާލޭ ހޮސްޕިޓަލާއި ބައެއް އަތޮޅު ހޮސްޕިޓަލްތަކާއި ސިއްހީ މަރުކަޒުތަކަށް ބޭނުންވާ ވަސީލަތްތައް ހޯދުމަށް ގަތަރު ސަރުކާރުން މިދިޔަ އަހަރު އެހީވެފައިވެ އެވެ. އަދި ގަތަރުގެ އެހީގައި ރާއްޖޭގައި ޓާޝިއަރީ ހޮސްޕިޓަލެއް އެޅުމަށް ވެސް ދެ ގައުމުގެ ސަރުކާރުން މަޝްވަރާކޮށްފައިވެ އެވެ. މިދިޔަ އަންގާރަ ދުވަހު ގަތަރަށް ވަޑައިގެންނެވި މިނިސްޓަރު ދުންޔާ ވަނީ އެ ގައުމުގެ ފޮރިން މިނިސްޓަރު ޑރ. ހާލިދު ބިން މުހައްމަދު އަލް އަތިއްޔާއާ ވެސް އިއްޔެ ބައްދަލުކުރައްވައިފަ އެވެ. އެ ބައްދަލުކުރެއްވުމުގައި މަޝްވަރާ ކުރެއްވީ، ފޮރިން މިނިސްޓްރީން އިއްޔެ ބުނި ގޮތުގައި، ދެ ގައުމުގެ ގުޅުން އިތުރަށް ބަދަހިކުރުމާ ގުޅޭ ގޮތުންނެވެ. "... ގަތަރުން ރާއްޖެ އަށް ދެމުން ގެންދާ އެހީ އަށް ފޮރިން މިނިސްޓަރު [ދުންޔާ] ޝުކުރު އަދާކުރެއްވި އެވެ،" އެ މިނިސްޓްރީން ވަކިން ނެރުނު ބަޔާނެއްގައިވެ އެވެ. މިނިސްޓަރު ދުންޔާ ގަތަރުގެ ފޮރިން މިނިސްޓަރު ޑރ. ހާލިދުއާ އިއްޔެ ބައްދަލުކުރައްވަނީ: ދެ ގައުމުގެ ގުޅުން ބަދަހިކުރުމާ ގުޅޭ ގޮތުން މަޝްވަރާކުރެއްވި.-- ފޮޓޯ: ފޮރިން މިނިސްޓްްރީ ދުރާލާ ވިސާ ނުނަގައި ދިވެހިންނަށް ގަތަރަށް ދެވޭނެ ގޮތް ހެދުމާ ގުޅޭ އެއްބަސްވުމެއްގައި ސޮއިކުރެވޭ ވަރު ވާނެ ކަމަށް، ގަތަރުގެ ފޮރިން މިނިސްޓަރުގެ ދައުވަތަކަށް ކުރައްވާ ދަތުރު ފެއްޓެވުމުގެ ކުރިން ދުންޔާ ވިދާޅުވެފައިވެ އެވެ. އަދި ސަރުކާރުން ހިންގާ ބޮޑެތި މަޝްރޫއުތަކަށް އެހީ ހޯދައި ގަތަރުގެ އިންވެސްޓްމަންޓުތައް ރާއްޖޭގައި އިތުރުކުރުމަށް މަސައްކަތް ކުރައްވާނެ ކަމަަށް ވެސް ވިދާޅުވެފައިވެ އެވެ. އެކަމަކު، އެ ކަންކަން ގޮސްފައިވާ ހިސާބެއް ފޮރިން މިނިސްޓްރީން އަދި ނުބުނެ އެވެ.