ޖީއެމްއާރު އަތުން އިބްރާހިމް ނާސިރު އިންޓަރނޭޝަނަލް އެއަރޕޯޓު އަތުލުމަށްޓަކައި އެންޓި ކޮރަޕްޝަން ކޮމިޝަނުން ގޮތެއް ނިންމަންދެން މަޑުކުރަންޖެހޭ އެއްވެސް ސަބަބެއް ނެތްކަމަށް ޕީޕީއެމްގެ އިންތިޤާލީ ނައިބު ރައީސް އުމަރު ނަސީރު ވިދާޅުވެއްޖެއެވެ.
ވީޓީވީން ދެންނެވި ސުވާލަކަށް ޖަވާބު ދެއްވަމުން މިވަގުތު ސިންގަރޕޫރުގައި ހުންނެވި އުމަރު ނަސީރު ވިދާޅުވީ، ޖީއެމްއާރު އަތުން އިބްރާހިމް ނާސިރު އިންޓަރނޭޝަނަލް އެއަރޕޯޓު އަތުލުމަށްޓަކައި ސަރުކާރުގައި ހިމެނޭ މައިގަނޑު ސިޔާސީ ޕާޓީތަކުން ގޮތެއް ނިންމާފަވަނިކޮށް އެންޓި ކޮރަޕްޝަން ކޮމިޝަނުން ނިންމާ ގޮތެއް ބެލުމަށްފަހު ސަރުކާރުން ގޮތެއް ނިންމުމަކީ ޤަބޫލުކުރައްވާނެ ކަމެއް ނޫން ކަމަށެވެ.
އުމަރު ވިދާޅުވީ ޖީއެމްއާރުގެ މައްސަލައިގައި ސަރުކާރުގެ ވިސްނުން ގޮތްގޮތަށް ބަދަލުވަމުންދަނީ ސަރުކާރު ހިންގާ ކޯލިޝަނުގައި ހިމެނޭ ޑީއާރުޕީގެ ސަބަބުން ކަމަށާއި، އެޕާޓީގެ ލީޑަރު އަޙްމަދު ތަސްމީން ޢަލީ ގެންދަވަނީ އެމްޑީޕީއާ ޖީއެމްއާރާއެކު ތަފާތު އެކި ފަހަރުމަތިން "ޑީލް" ހައްދަވަމުން ކަމަށެވެ. ޖީއެމްއާރުގެ މައްސަލައިގައި ސަރުކާރަށް ޑީއާރުޕީ މުހިއްމުވަނީ އެޕާޓީގައި ރައްޔިތުންގެ މަޖިލީހުގެ މެންބަރު ހިމެނިވަޑައިގަންނަވާތީކަން ހާމަކުރައްވަމުން އުމަރު ނަސީރު ވިދާޅުވީ، ޖީއެމްއާރަށްޓަކައި ޑީއާރުޕީގެ ލީޑަރު އަޙްމަދު ތަސްމީން ޢަލީ ދިވެހި ޤައުމު ގުރުބާންކުރަން ފަސްޖެހިވަޑައި ނުގަންނަވާނެ ކަމަށެވެ.
ޖީއެމްއާރު އަތުން އިބްރާހިމް ނާސިރު އިންޓަރނޭޝަނަލް އެއަރޕޯޓް އަތުލާން ޖެހޭނެކަމަށް ވިދާޅުވެ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ދެއްކެވި ވާހަަކަފުޅުތަކަށް ތާއީދު ކުރައްވައި ވާހަކަފުޅު ދައްކަވަމުން އުމަރު ނަސީރު ވިދާޅުވީ، ދިވެހި ޤައުމުގެ ސަލާމަތާއި ރައްކާތެރިކަމަށްޓަކައި ކިތަންމެ ބޮޑު އަގެއް ދައްކައިގެންނަމަވެސް ޖީއެމްއާރު އަތުން އެއަރޕޯޓް އަތުލަން ޖެހިފައި ވާކަމަށެވެ. އަދި ޖީއެމްއާރު އަތުން އިބްރާހިމް ނާސިރު އިންޓަރނޭޝަނަލް އެއަރޕޯޓު އަތުލުމަށްޓަކައި ކުރެވެންހުރި ހުރިހާ ޕްރެޝަރެއް ސަރުކާރަށް ކުރާނެކަމުގެ ޔަޤީންކަންވެސް އުމަރު ވަނީ ދެއްވާފައެވެ.
ޖީއެމްއާރާއި ދެކޮޅަށް ފިޔަވަޅު އެޅުމަށް ސަރުކާރުގައި މިވަގުތު ހިމެނޭ ޕާޓީތަކުން މީގެކުރިން އެއްްބަސްވެފަވީ ނަމަވެސް ސަރުކާރުގައި ބައިވެރިވުމުގެ ފުރުސަތު ލިބުމާއި ގުޅިގެން ބައެއް ސިޔާސީ ޕާޓީތަކުން ޖީއެމްއާރުގެ މައްސަލައިގައި ފިޔަވަޅު އެޅުމަށް ދެކޮޅު ހަދަމުންދާކަމުގެ އަޑުތައް ދަނީ ގަދަވަމުންނެވެ. ނަމަވެސް ޖީއެމްއާރާއި ދެކޮޅަށް ފިޔަވަޅު އަޅަންޖެހޭނެ ކަމަށާއި ޖީއެމްއާރަށް އިބްރާހިމް ނާސިރު އިންޓަރނޭޝަނަލް އެއަރޕޯޓު ދިނުމަށް ކުރީގެ ސަރުކާރުން ހަދާފައިވާ އެއްބަސްވުމަކީ ދިވެހި ރައްޔިތުންނަށް ފައިދާއެއް ލިބޭނެ އެއްބަސްވުމެއް ނޫންކަަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމްވެސް ގެންދަވަނީ ވިދާޅުވަމުންނެވެ.