މަސްތުވާތަކެތީގެ މައްސަލަތަކުގައި ފަރުވާ ހޯދަމުންދާ ކުދިންނަށް ވަޒީފާ ދިނުމަށް ރައީސުލްޖުމްހޫރިއަޔާ ނިންމަވާފައިވާ ކަމަށް ނައިބް ރައީސް އަބްދުﷲ ޖިހާދު ވިދާޅުވެއްޖެ އެވެ.
ނައިބް ރައީސް އަބްދުﷲ ޖިހާދު މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުންނެވެ.
ޖިހާދު ވިދާޅުވީ ސޯޝަލް ކައުންސިލްގެ މެންބަރުން، ރާއްޖޭގައި މަސްތުވާތަކެތީގެ ފަރުވާދޭ އެކި އުމުރުގެ މީހުންގެ ކަންކަން ބަލަހައްޓާ ޑްރަގް ރިހެބިލިޓޭޝަން ސެންޓަރަށާއި ހާފްވޭ ހައުސްއަށާއި އަދި ކޮމިޔުނިޓީ ސެންޓަރުތަކަށް ޒިޔާރަތްކުރައްވައި އެތަންތާންގައި ތިބި މީހުންނާއި ކުދިންގެ މައުލޫމާތު ހޯދައި އެތަންތަން ހިނގަމުންދާ ގޮތް ބައްލަވާލައްވާފައިވާ ކަމަށެވެ.
ނައިބު ރައީސް ވިދާޅުވީ މަސްތުވާތަކެތީގެ ކުދިންނަށް ފަރުވާ ދެމުންދާ ތަންތަނުގެ އިންތިޒާމްތައް ހުރީ ވަރަށް ރަނގަޅަށް ކަމަށާއި، ހުރިހާ ކުދިންގެވެސް އެދުމަކަށްވީ ވަޒީފާގެ ފުރުސަތު ތަނަވަސް ކޮށްދިނުން ކަމަށެވެ. އަދި އެކުދިންގެ ހުށަހެޅުން ބަލައިގަނެ އެކަމަށް ކުރަންޖެހޭ މަސައްކަތްތައް ފުރިހަމަކުރުމުގެ މަސައްކަތް ސަރުކާރުން ކުރިއަށް ގެންދާ ކަމަށްވެސް ވިދާޅުވި އެވެ.
ސޯޝަލް ކައުންސިލްގެ ފަރާތުން މިހާރު ވަނީ ރާއްޖޭގައި ވަޒީފާގެ ފުރުސަތު ތަނަވަސް ކުރެވިދާނެ އަމިއްލަ ކުންފުނިތަކާއި ސަރުކާރު ކުންފުނިތަކާއި މުއައްސަސާތަކާއި ބައްދަލުކުރައްވައި މަޝްވަރާ ކުރައްވާފައި ކަމަށްވެސް ނައިބް ރައީސް ވިދާޅުވި އެވެ. އެގޮތުން މަޓީއާއި، މަސީއާ ދިވެހި ވިޔަފާރިވެރިންގެ ގައުމީ ޖަމިއްޔާއާއި ސަރުކާރުގެ މުއައްސަސާ ތަކާއި ސަރުކާރު ހިއްސާވާ ކުންފުނިތަކާ ބައްދަލުކޮށް މިކަމުގައި މަޝްވަރާކުރެވިފައިވާ ކަމަށްވެސް ވިދާޅުވި އެވެ.
ނައިބް ރައީސް ޖިހާދު ވިދާޅުވީ މި ހުރިހާ މުއައްސަސާ އަކުންވެސް ތިބީ މިކުދިންނަށް ވަޒީފާ ދޭ ގޮތަށް ކަމަށެވެ. އެހެންކަމުން ޑްރަގް ރިހިބިޓޭޝަންގެ މަރުހަލާގައި ތިބި މީހުންނާއި ކުދިންނަށް ވަޒީފާގެ ފުރުސަތު ވަރަށް އަވަހަށް ހަމަޖައްސަވައިދެއްވަން ސަރުކާރުން ނިންމާފައިވާ ކަމަށްވެސް ވިދާޅުވި އެވެ.
ވަޒީފާއަށް ފުރަތަމަ ނެރޭނީ މަދުގަޑިތަކަށް އަދި މަސައްކަތްކުރާ ގަޑިއަށް އުޖޫރަދެވޭ ގޮތަށް ކަމަށާއި ފަހުން ވަގުތު އިތުރުކޮށް ނަތީޖައަށް ބަލައި ދާއިމީ ވަޒީފާވެސް ހަމަޖެހިގެންދާނެ ކަމަށްވެސް ނައިބް ރައީސް ވަނީ ވިދާޅުވެފަ އެވެ.