ލޯކަލް ގަވަރމެންޓް އޮތޯރިޓީގެ ބޯޑު މެމްބަރު ޝުޖާއު ކޮރަޕްޝަނަށް މަގުފަހިވާ ގޮތަށް ކުރައްވާފައިވާ ކަންކަން ބެލުމަށް، އެންޓި ކޮރަޕްޝަން ކޮމިޝަން (އޭސީސީ) އަށް ފޮނުވުމަށް އެލްޖީއޭގެ ކޮމިޓީ އަކުން ފާސްކޮށްފިއެވެ.
ޝުޖާއުގެ މައްސަލަ ބެލުމަށް އޭސީސީއަށް ފޮނުވަން ފެންނަ ކަމަށް ފާސްކޮށްފައި ވަނީ ޝުޖާއުގެ މައްޗަށް ހުށަހެޅުނު ސުލޫކީ މައްސަލަތައް އެލްޖީއޭގެ ކޮމިޓީއަކުން ބެލުމަށްފަހުގައެވެ. އޭނާގެ ސުލޫކީ މައްސަލަތައް ބަލާފައި ވަނީ ބޯޑު މެމްބަރު މޫސާ ނަސީރު އަހުމަދާއި ބޯޑު މެމްބަރު އަންވަރު އިބްރާހިމްގެ އިތުރުން ބޯޑު މެމްބަރު ހުސައިން ނަސީރު ހިމެނިވަޑައިގަންނަވާ ކޮމެޓީ އަކުންނެވެ.
އޭސީސީއަށް މައްސަލަ ހުށަހެޅުމަށް ކޮމެޓީން ނިންމި ނިންމުމަކީ ރަނގަޅު ނިންމުމެއް ކަމަށް ވިދާޅުވެ ސޮއި ކުރައްވާފައި ވަނީ މޫސާ ނަސީރު އަހްމަދާއި، އަންވަރު އިބްރާހީމްއެވެ. 25 ޑިސެމްބަރުގައި ނިންމި ނިންމުމަށް ތާއީދުކޮށް ދެބޭފުޅުންވެސް ސޮއި ކުރައްވާފައި ވަނީ މި ހަފްތާގެ ތެރޭގައެވެ.
25 ޑިސެމްބަރުގައި ބޭއްވުނު ކޮމެޓީގެ ބައްދަލުވުމުގައި ޝުޖާއުއާ ގުޅޭގޮތުން ހުށަހެޅުނު ސުލޫކީ މައްސަލަތަކާއި ގުޅޭގޮތުން މަޝްވަރާކޮށް، އެކުލަވާލާފައިވާ ރިޕޯޓުގައިވާ ކަންކަމާ ގުޅޭގޮތުން ވަކި ވަކި މުވައްޒަފުންނާއި ސުވާލު ކުރުމަށް ވަނީ ނިންމާފައެވެ.
ޝުޖާއުއާ ގުޅޭގޮތުން އެލްޖީއޭ ބޯޑުގެ އެހެން މެމްބަރުންނަށް ފާހަގަކުރެވިފައިވާ ކަންކަމުގެ ތެރޭގައި، އެލްޖީއޭގެ ކަންކަމުގައި މީޑިއާ އަށް މައުލޫމާތު ދެއްވާނީ އެލްޖީއޭގެ ރައީސްކަމަށް ބޯޑުން ފާސްކުރައްވާފައި ވަނިކޮށް އެލްޖީއޭގެ ހިންގާ ގަވާއިދާއި އެލްޖީއޭ އިން މީޑިއާއަށް މައުލޫމާތު ދިނުމާބެހޭ އުސޫލުތަކާ ހިލާފަށް އެލްޖީއޭގެ ނަމުގައި މީޑިއާގައި ވާހަކަ ދެއްކުމާއި، އެލްޖީއޭއަކީ ބަލިކަށި އަދި ބޭކާރު އިދާރާއެއްކަމަށް ދައްކައި ޝޯޝަލް މީޑިއާގައި ވާހަކަ ދެއްކުމާއި، އެލްޖީއޭގެ ރައީސްގެ އަބުރަށް ހުތުރުވާފަދަ ވާހަކައާއި މަންޒަރު ޝޯޝަލް މީޑިއާގައި ހިއްސާކުރުމުގެ އިތުރުން ކ. ކާށިދޫން އެލްޖީއޭއަށް ފޮނުއްވި ސިޓީ އަކަށް އަމިއްލައަށް ޖަވާބު ދިނުން ހިމެނެއެވެ.
އެލްޖީއޭގެ މުވައްޒަފުން ވަނީ ޝުޖާއުގެ ސަބަބުން އޮފީހުގެ މަސައްކަތު މާހައުލުގައި އޭރުވެސް އަދި މިހާރުވެސް ބިރުވެރިކަން އޮތްކަން ފާހަގަކޮށްފައެވެ. އަދި ޝުޖާއު އެލްޖީއޭގެ މުވައްޒަފުންނަށް ވަޒީފާއަށް ބިރު ދެއްކުމާއި އަޑު ހަރުކޮށް މުވައްޒަފުންނާ މުހާތަބު ކުރާކަމަށް 65 ޕަސެންޓު މުވައްޒަފުން ވަނީ މައުލޫމާތު ދީފައެވެ.
އެލްޖީއޭގެ ރައީސްގެ އިތުބާރު ނެތްކަމަށް ހުށަހަޅާފައި ވަނީވެސް ޝުޖާއުއެވެ. އަދި މިއަދު އޮތް ބައްދަލުވުމެއްގައި މިނިސްޓަރ ނާޒިމް އެމަޤާމުން ވަކި ކުރުމަށް ވޯޓު ނެގުމަށްފަހު އެ އޮތޯރިޓީ ހިންގެވުމާ ވަގުތީ ގޮތުން ހަވާލުވެފައި ވަނީވެސް އޭނާއެވެ. ނަމަވެސް މިއަދު މިނިސްޓަރ ނާޒިމް ބޭއްވެވި ޕްރެސް ކޮންފަރެންސެއްގައި ވިދާޅުވީ އެގޮތަށް އިތުބާރު ނެތް ކަމުގެ ވޯޓު ނުނެގޭނެ ކަމަށެވެ. އަދި ވޯޓު ނަގާފައި ވަނީވެސް އެލްޖީއޭގެ ބޯޑުގެ މެމްބަރުންނަށް އެނގުމަކާ ނުލައި ކަމަށްވެސް މިނިސްޓަރ ވިދާޅުވިއެވެ.
ސުޖާއުއަކީ މަޖިލީހުން އެލްޖީއޭ ބޯޑަށް އިންތިހާބުވެފައިވާ، އެމްޑީއޭއަށް ނިސްބަތްވެވަޑައިގަންނަވާ ކައުންސިލަރެކެވެ. ޝުޖާއު ވަނީ ކުރިން އެލްޖީއޭ ބޯޑުގެ ނައިބު ރައީސްކަން ކުރިން ކުރައްވާފައެވެ.