ހުޅުމާލޭގައި ހުންނަ ފުޓްސަލް ދަނޑުތައް ކުއްޔަށް ދޫކުރަން ސަރުކާރުން ނިންމައިފިއެވެ.
ކުރިން ހިލޭ ދޫކުރި ދަނޑުތައް ކުއްޔަށް ދޫކުރާނެ އަގުތައް މިހާރު ވަނީ އިއުލާނު ކޮށްފައެވެ.
ކުއްޔަށް ދޫކުރަން ނިންމާފައި ވަނީ  ހުޅުމާލެ ރެހެންދި ސްކޫލް ކައިރީގައި އޮންނަ ދެ ދަނޑާއި ޓްރީ ޓޮޕް ހޮސްޕިޓަލް ކައިރީގައި އޮންނަ ދަނޑާއި ރެއިން ފޮރެސްޓް ރެސިޑެންސް އިމާރާތުގެ ފުރަގަހުގައި އޮންނަ ދަނޑެވެ. މި ހުރިހާ ދަނޑަކީ ވެސް ޔޫތު މިނިސްޓްރީގެ ބެލުމުގެ ދަށުން ހިންގަމުން އަންނަ ދަނޑުތަކެވެ.
ޔޫތު މިނިސްޓްރީގެ އާ އުސޫލުގައިވާ ގޮތުން ސަރުކާރު ސްކޫލްތައް، ޔުނިވަސިޓީތަކުގެ ޕްރެކްޓިސްތަކަށް ހުޅުމާލެ ފުޓްސަލް ދަނޑު ދެން ދޫކުރާނީ ގަޑިއަކަށް 500ރ. އަށެވެ. އަދި ދުވާލަކަށް ދޫކުރާނީ 2،500ރ. އަށެވެ.
އަމިއްލަ ސްކޫލް، ޔުނިވަސިޓީތަކުގެ ޕްރެކްޓިސްތަކަށް ފުޓްސަލް ދަނޑު ދޫކުރާނީ 150ރ. އަށެވެ. އަދި އަމިއްލަ ފަރާތްތަކަށް ފުޓްސަލް ދަނޑު ދޫކުރުމަށް ހަމަޖެހިފައި ވަނީ 350ރ. އަށެވެ.
ޔޫތް މިނިސްޓްރީން ފުޓްސަލް ދަނޑުތައް ކުއްޔަށް ދޫކުރަން ފެއްޓުމާއި ގުޅިގެން ޔޫތް މިނިސްޓަރު މަހުލޫފަށް ގިނަ އަދަދެއްގެ ޒުވާނުން އަންނަނީ ފާޑު ކިޔަމުންނެވެ. ޔޫތް މިނިސްޓްރީން ދަނޑުތައް ކުއްޔަށް ދޫކުރަން ނިންމާފައިވާއިރު ދަނޑުތައް ވަރަށް ބޮޑަށް ހަލާކުވެފައިވާކަން ފާހަގަ ކޮށްލެވެއެވެ.