މީސްތަކުންނޭވެ! އެމީހުން ނަމާދުވެސް ކުރެއެވެ. އެކަމަކު މިއީ ތިމާގެ ޠަބީޢަތް ކަމަށް ބުނެ ޢަމަލުކުރަނީ ސުވަރުގެ ނުވައްދަވާނެ މީހުން ޢަމަލުކުރާ ގޮތަށެވެ. އެފަދަ މީހުންނަށް އެކަން ހަމަނުވެސް ވިސްނެނީއެވެ.  
އަހަރެމެންގެ ތެރެއިން ގިނަ ބައަކު ﷲ ތަޢާލާ ސުވަރުގެ ޙަރާމްކުރެއްވެވި މީހުންގެ ތެރޭގައި ހިމެނިގަންނަނީ އަމިއްލައަށެވެ. ވީމާ އެކަމުން ސަލާމަތްވެ ހުރުންވެސް އޮތީ އެމީހެއްގެ އަތްމަތީގައެވެ. އެއީ އެހެން މީހަކަށް ކޮށދެވެން އޮތް ކަމެއް ނޫނެވެ. އެހެން މީހުންނަށް ދެވޭނީ ހެޔޮ ނަޞޭޙަތެވެ. 
ލޮބުވެތިއަޚުންނާއި އުޚުތުންނޭވެ! ރިވެތިވެގެންވާ، އެންމެ ރިވެތިކަންބޮޑު އެންމެހައި ރިވެތި ސިފަފުޅުތައް ޚާއްޞަވެގެންވަނީ ﷲ ތަޢާލާއަށެވެ. އަދި ރިވެތި ކަމަށް ﷲ ތަޢާލާ ލޯބިފުޅުވެވޮޑިގެންވެއެވެ. އަދި ކީއްހެއްޔެވެ؟ ﷲ ތަޢާލާ ބައްލަވައިވޮޑިގެންވަނީ މީސްތަކުންގެ ބޭރުފުށުގެ ރީތިކަމަކަށް ނޫނެވެ. އޭނާގެ ރިވެތި އަޚްލާޤަށެވެ. ސުވަރުގޭގެ އެންމެ މަތީދަރަޖަތަކުގައި މަކާރިމުލްއަޚްލާޤް ލިބިގެންވާ މީހުން ގިނަވެގެންދަނީ އެސަބަބަށްޓަކައެވެ. ހަމައެއާއިއެކު ނުބައި އަޚްލާޤްގެ މީހުންނަށް ﷲ ތަޢާލާ ރުހިވޮޑިގެން ނުވެއެވެ. 
މީސްތަކުންނޭވެ! ޙަދީޘްފުޅުގައިވަނީ މީހާގެ ކިބައިގައިވާ އެންމެ ބޮޑު ރިވެތިކަމަކީ އޭނާގެ ކިބައިގައިވާ ރިވެތި އަޚްލާޤް ކަމަށެވެ. އަދި ކީއްހެއްޔެވެ؟ ތިބާގެ ބޭރުފުށުގެ ސިފަ ކިތަންމެ ރީތިނަމަވެސް، ކިތަންމެ ރީތި ފޭރާމެއް ލައިގެންހުރިނަމަވެސް ތިބާއަކީ އަޚްލާޤް ނުބައި، ދުލުން ނުބައިބަސްބުނާ ނުބައި ޢަމަލުތައްކުރާ މީހަކުކަމުގައިވެއްޖެނަމަ މީސްތަކުން ތިބާއަށް ނަފްރަތުކުރާނެއެވެ. ހަމަ އެއާއިއެކު ތިބާގެ ބޭރުފުށުގެ ސިފަ ކިތަންމެ ހުތުރުނަމަވެސް ތިބާއަކީ އަޚްލާޤް ރަނގަޅު، ރިވެތިބަހުން ބަސްބުނާ، އޯގާތެރިއަކު ކަމުގައިވެއްޖެނަމަ ﷲ ތަޢާލާގެ ލޯބިވެވޮޑިގަތުމާއި މީސްތަކުންގެ ލޯބި ތިބާއަށް ލިބިގެންދާނެއެވެ.  
ހަމައެއާއިއެކު ޙަދީޘްފުޅުގައި ވަނީ ނުބައިބަސްބުނާ، އެމީހެއްގެ ކިބައިގައި އަޚްލާޤީ ގޮތުން ނުބައި ސިފަތައްހުންނަ، އެހެން މީހުން ހިތްދަތިކުރުވައި ދަތި އުނދަގޫ ޙާލު ޖައްސުވައި އެމީހެއްގެ ހިތުގައި، ބޮޑާކަމާއި ކިބުރުވެރިކަން ހުންނަ މީހުންނަށް ސުވަރުގެ ޙަރާމްކުރެއްވެވިގެންވާ ކަމަށެވެ.  
މީގެ ތެރޭގައި ބަސްބުނުމުގައި މީހުންގެ ޙައްޤުތަކަށް އަރައިގަނެ މީސްތަކުންނަށް ނުބައިބަސްބުނާ، މީސްތަކުންނަށް އެއްޗެތިގޮވާ މީހުން ހިމެނިގެންވެއެވެ. 
ލޮބުވެތި އަޚުންނާއި އުޚުތުންނޭވެ! އީމާންކަމަށްފަހު މީޒާނުގައި އެންމެ ބުރަދަންހުރީ ރިވެތި އަޚްލާޤްގައެވެ. ﷲ ތަޢާލާއަށް އީމާންވެ ރިވެތި އަޚްލާޤްގެމަތީގައި ދުނިޔޭގައި އުޅުމުން ސުވަރުގެވަދެވި ސުވަރުގޭގެ މަތީ ދަރަޖަތައް ލިބުމަށް މަގުފަހިވެގެންދާ ސަބަބަކަށް އެކަންވަނީ އެހެންވެގެންނެވެ.  
އެމީހާގެ ދުލުން ނުބައިބަސްތައް ބުނަނީ އަމިއްލައަށެވެ! އެހެން މީހުންނަށް ފުރައްސާރަކޮށް އެއްޗެތި ގޮވަނީ އަމިއްލައަށެވެ. ދުލުން ނުބައި ބަސްތައް ބުނެ އަތްފައިން ނުބައި ޢަމަލުތައް އަޚްލާޤް ނުބައިކުރަނީވެސް އަމިއްލައަށެވެ. ޖުމުލަކޮށްލާނަމަ އަޚްލާޤް ނުބައިކުރަނީ އަމިއްލައަށެވެ. ރަނގަޅުކުރުމުގެ އިޚްތިޔާރު ﷲ ތަޢާލާ ވަނީ ކޮންމެ މީހަކަށްވެސް ދެއްވަވައިފައެވެ.  
ވީމާ އަހުރެންގެ އިލްތިމާސަކީ ސުވަރުގެ ޙަޜާމްކުރެއްވެވި މީހުންގެ ތެރޭގައި ނުހިމެނޭށެވެ! ސުވަރުގެދެއްވަވާނެ މީހުންގެ ތެރޭގައި ހިމެނެން މަސައްކަތްކުރާށެވެ!
 
- ޑރ. ޔާސިރު ޤާޟީގެ ދަރުސަކުން