ހިންދޫ ފާދިރީއެއް ރާއްޖެ އައިސް ރޫހާނީ ފަރުވާ ދޭ މައްސަލަ ފުލުހުން ބަލަން ފަށައިފި އެވެ.
ވީ ކިހިނެއް؟ - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ 'މާސްޓާ ދުރްގާ ރާއޯ ގުރުޖީ' ނަމަކަށް ކިޔާ މީހަކު ރާއްޖޭގައި ރޫހާނީ ފަރުވާގެ ހިދުމަތްތަކެއް ދޭ ކަމަށް ބުނެ ސޯޝަލް މީޑިއާގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ.
ތަފްސީލް - އެ މައްސަލައާ ގުޅިގެން، ގާނޫނީ ގޮތުން އަޅަން ޖެހޭ ފިޔަވަޅުތައް އެޅުމަށްޓަކައި ކުރަން ޖެހޭ މަސައްކަތް ކަމާ ބެހޭ އިދާރާތަކާ ގުޅިގެން ކުރަމުންދާ ކަމަށް ފުލުހުން ބުންޏެވެ.
ފުލުހުން ބުނީ ދިވެހިންގެ ސަގާފަތާއި ދީނާ ހިލާފު މިފަދަ ކަންކަމުގެ މައުލޫމާތު އެކަކު އަނެކަކާ ހިއްސާ ކުރުމުގެ ބަދަލުގައި، ވީ އެންމެ އަވަހަކަށް ކަމާ ބެހޭ އިދާރާތަކުގެ ސަމާލުކަމަށް ގެނެސް، ގާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމަށެވެ.
މިފަދަ އިޝްތިހާރެއް ފެނިއްޖެ ނަމަ، ލަސްނުކޮށް ފުލުހުންނަށް އެންގުމަށް އެ އިދާރާ އިން އިލްތިމާސްކޮށްފައިވެ އެވެ.
އެނގުން މުހިއްމު - ފޭސްބުކްގައި ހިންގާ ޕޭޖެއް މެދުވެރިކޮށް، ރާއްޖޭގައި ފަރުވާ ދޭން ފަށާފައިވާ ކަމަށް ބުނެ އިޝްތިހާރުކޮށްފައިވާއިރު އަތާއި މޫނު ބަލައިގެން އަދި ހޮރޮސްކޯޕް މެދުވެރިކޮށް ދިމާވެފައިވާ ހުރިހާ މައްސަލައަކަށް ހައްލު ހޯދައިދޭނެ ކަމަށް، ފޭސްބުކްގައި އޭނާ ބުނެ އެވެ.
މިދިޔަ އޮގަސްޓު މަހުގެ ތެރޭގައި ވެސް ފާދިރީއަކު އައިސް، ރޫހާނީ ފަރުވާގެ ކްލާސްތައް ނަގައިދޭ ކަމަށް ބުނެ ކެމްޕޭނެއް ހިންގި އެވެ. އެ މީހާ ގާތަށް ގިނަ ބަޔަކު ދަނިކޮށް، ފުލުހުން ވަނީ އޭނާ ހައްޔަރުކޮށްފަ އެވެ. އަދި ފަހުން ވަނީ ޑީޕޯޓު ކޮށްލާފަ އެވެ.