ޑިމޮކްރެޓްސްގެ ރައީސް ކަމަށް އެ ޕާޓީގެ ތަރުޖަމާނަކަށް މިހާތަނަށް ހުންނެވި، ރައްޔިތުންގެ މަޖިލީހުގެ މާފަންނު އުތުރު ދާއިރާގެ ކުރީގެ މެންބަރު އިމްތިޔާޒު ފަހުމީ ކުރިމަތިލައްވައިފި އެވެ.
ވީކިހިނެއް؟ - އެމްޑީޕީގެ އެތެރޭގެ ހިޔާލުތަފާތުވުންތަކެއް ތެރެއިން މިދިޔަ އަހަރު އުފެއްދި ޑިމޮކްރެޓްސްގެ ފުރަތަމަ ރައީސް، މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވަނީ ޕާޓީ ދޫކޮށް އަނބުރާ އެމްޑީޕީއަށް ގުޅިވަޑައިގެންފަ އެވެ.
ޑިމޮކްރެޓްސްގެ ރައީސްގެ މަގާމު ހުސްވުމުން ކުރިމަތިލާން ހުޅުވާލީ އިއްޔެއިން ފެށިގެން އަންނަ ބުރާސްފަތި ދުވަހުގެ ނިޔަލަށެވެ.
ބުނީ ކީކޭ؟ - ރައްޔިތުންގެ މަޖިލީހުގެ މެންބަރުކަން ދެ ދައުރަކު ކުރައްވާފައިވާ އިމްތިޔާޒު 'އެކްސްގައި' މިއަދު ކުރެއްވި ޕޯސްޓެއްގައި ވިދާޅުވީ ޑިމޮކްރެޓްސްގެ ރައީސްގެ މަގާމަށް ކުރިމަތިލެއްވުމަށް މިއަދު ފޯމު ހުށަހަޅުއްވާ ކަމަށެވެ.
"އެއާ އެކު ޕާޓީގެ ސްޕޯކްސްޕާސަންކަމުން އިސްތިއުފާ ދީފިން، އެންމެހައި އެކުވެރި ޑެމޮކްރެޓްސްގެ ތާއީދަށް އެދި ދަންނަވަން،" އިމްތިޔާޒު ލިޔުއްވާފައިވެ އެވެ.
ފާހަގަކޮށްލެވޭ - ޑިމޮކްރެޓްސްގެ ރައީސް އާއި ފިިިރިހެން ނައިބު ރައީސްގެ އިންތިހާބު އޮންނާނީ އަންނަ މަހު 15ގަ އެވެ. ފިރިހެން ނައިބު ރައީސްގެ މަގާމުގައި ހުންނެވި މުހައްމަދު ޝިފާޒު ވެސް ވަނީ އެމްޑީޕީއަށް ގުޅިވަޑައިގެންފަ އެވެ. 
އެ ޕާޓީގެ ވަގުތީ ރައީސަކަށް ހަމަޖައްސާފައި ވަނީ ޕާޓީގެ ޒުވާނުންގެ ނައިބު ރައީސް އަދި ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެންބަރު ހުސައިން ފިރުޝާނެވެ.
ޑިމޮކްރެޓްސްއިން މި ފަހުން ހަސަން ލަތީފާއި ޝިފާޒުގެ އިތުރަށް ޑިމޮކްރެޓްސްގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އަލީ އާޒިމާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވެސް ވަނީ އެމްޑީޕީއަށް ސޮއިކުރައްވައިފަ އެވެ.