ދުނިޔޭގެ ސިއްޙަތު ޖަމްއިއްޔާ (ޑަބްލިޔުއެޗްއޯ)އިން އެމެރިކާ ވަކިކުރުމުގެ މަސައްކަތް ފެށުމަށް, އިއްޔެ އެމެރިކާގެ ރައީސްކަމުގެ ހުވާ ކުރައްވާފައިވާ ޑޮނަލްޑް ޓްރަމްޕް އަމުރުކުރައްވައިފިއެވެ. ޑަބްލިޔުއެޗްއޯއިން އެމެރިކާ ވަކިކުރުމުގެ މަސައްކަތް ފެށުމަށް އަންގަވައި ރިޔާސީ އަމުރެއްގައި ޓްރަމްޕް ސޮއިކުރެއްވިއިރު، ރިޔާސީ ދައުރު ފެށި ފުރަތަމަ ދުވަހު އެމަނިކުފާނު ވަނީ އެފަދަ ގިނަ އަދަދެއްގެ އަމުރުގައި ސޮއިކުރައްވާފައެވެ. މިއީ އެމެރިކާ ޑަބްލިއުއެޗްއޯއިން ވަކިކުރުމަށް ޓްރަމްޕް އަމުރު ކުރެއްވި ދެވަނަ ފަހަރެވެ. ޑަބްލިޔުއެޗްއޯއިން ކޮވިޑް-19ގެ ދުވަސްވަރު ގެންގުޅުނު ސިޔާސަތުތަކަށް ފާޑުވިދާޅުވެ، އެ ޖަމްއިއްޔާއިން ވަކިވުމުގެ މަރުހަލާ ޓްރަމްޕް ފައްޓަވާފައި ވަނީ ކޮވިޑް-19ގެ ދުވަސްވަރުއެވެ. އެ ނިންމުން ރައީސް ޖޯ ބައިޑަން ފަހުން ވަނީ އަނބުރާ ގެންދަވާފައެވެ. އެ އަމުރުގައިވާ ގޮތުން އެމެރިކާއިން ޑަބްލިޔުއެޗްއޯގެ މެންބަރު ކަމުން ދުރުވާން ބޭނުންވަނީ، ކޮވިޑް ބަލިމަޑުކަމުގެ ތެރޭގައި ގެންގުޅުނު ސިޔާސަތުތައް ކަމުނުދާތީ އާއި އެ ޖަމިއްޔާއިން ގައުމުތަކަށް ސިޔާސީ ނުފޫޒު ފޯރުވާކަމަށް ތުހުމަތުވާތީއެވެ. ޓްރަމްޕް ތުހުމަތުކުރައްވާ ގޮތުގައި ކޮވިޑް-19 ފެތުރުނު ދުވަސްވަރު ޑަބްލިއުއެޗްއޯއިން އަމަލުކޮށްފައިވަނީ ޗައިނާއަށް ފައިދާވާ ގޮތަކަަށެވެ. ބައިޑެންގެ ވެރިކަމުގައި އެމެރިކާއަކީ ޑަބްލިޔުއެޗްއޯއަށް އެންމެ ބޮޑު ފައިސާގެ އެހީ ފޯރުކޮށްދިން ގައުމެވެ. ދެހާސް ތޭވީސް ވަނަ އަހަރު އެމެރިކާއިން ވަނީ އެ އިދާރާގެ ބަޖެޓުގެ ގާތްގަނޑަކަށް ފަސްބައިކުޅަ އެއްބައި ފައިސާ ޑަބްލިޔުއެޗްއޯއަށް ހަދިޔާކޮށްފައެވެ. ޑަބްލިއުއެޗްއޯއިން ވަކިވާން ޓްރަމްޕް ނިންމެވުމާ ގުޅިގެން އާންމު ސިއްހަތުގެ ދާއިރާގައި މަސައްކަތް ކުރާ ފަރާތްތަކުން ވަނީ އޭގެ ސަބަބުން ރައްޔިތުންނަށް ނޭދެވޭ އަސަރު ކުރާނެ ކަމަށް ލަފާކޮށްފައެވެ. އެގޮތުން އެއީ ހިމަބިހި، ޓިއުބާކިއުލޯސިސް (ޓީބީ) އަދި އެޗްއައިވީ އާއި އެއިޑްސް ފަދަ ބަލިތަކާ ދެކޮޅަށް މަސައްކަތް ކުރުމުގައި ފަހަތަށް އެޅުނު ފިޔަވަޅެކެވެ.