އީރާނުގެ ބަނދަރުތައް ޙިޞާރުކުރުމަށް އެމެރިކާއިން ހިންގަމުންދާ ޖަރީމާގެ ދަށުން، އީރާނުގެ މުދާ އުފުލާ ބޯޓެއް އެމެރިކާގެ އަސްކަރިއްޔާއިން ހިފެހެއްޓުމާއެކު، ސުލްޙައިގެ މަޝްވަރާތަކަށް ހުރަސްއެޅިއްޖެއެވެ. މި ހާދިސާއާ ގުޅިގެން، ދެ ޤައުމުގެ ދެމެދުގައި ޤާއިމުކޮށްފައިވާ ޙަމަލާ ބަދަލުކުރުން މެދުކަނޑައިލުމުގެ ވަގުތީ އެއްބަސްވުމަށް ބުރޫއަރައި، ސުލްޙައިގެ މަޝްވަރާތަކަށް ހިޔަނިއެޅި، މެދުއިރުމަތީގެ ހަނގުރާމަ އިތުރަށް ބޮޑުވެގެންދާނެ ކަމުގެ ބިރު ވަނީ ބޮޑުވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނުގެ ބަންދަރު އައްބާސްއަށް ދަތުރުކުރި އީރާންގެ ބޯޓެއް އެމެރިކާގެ އަސްކަރިއްޔާގެ ބާރުގެ ދަށަށް ގެންގޮސްފައިވާ ކަމުގައެވެ. މިއީ، އެމެރިކާގެ އަސްކަރިއްޔާއިން ހިންގި ކަނޑުފޭރުމުގެ ޖަރީމާއެއްގެ ގޮތުގައި ސިފަކުރައްވައި، އީރާންގެ ނައިބު ރައީސް މުޙައްމަދު ރިޒާ އާރިފް ވަނީ، އީރާނުން ތެޔޮ ބޭރުކުރުމަށް ހުރަސްއަޅާނަމަ ބައިނަލްއަޤުވާމީ ހަކަތައިގެ ބާޒާރަށް ބޮޑެތި ގެއްލުންތަކެއް ދޭނެ ކަމުގެ އިންޒާރު ދެއްވާފައެވެ. މި ނުތަނަވަސްކަމާއެކު، އެޕްރީލު 21 ވަނަ ދުވަހު ޕާކިސްތާންގެ ވެރިރަށް އިސްލާމްއާބާދުގައި ބޭއްވުމަށް ރާވަމުން ދިޔަ ސުލްޙައިގެ މަޝްވަރާތަކުގެ ދެވަނަ ބައްދަލުވުމުގައި ބައިވެރިނުވާނެ ކަން އީރާނުން ވަނީ ހާމަކޮށްފައެވެ.
އިސްލާމްއާބާދުގައި އެމެރިކާގެ ވަފުދަށް ތައްޔާރުވުމުގެ ގޮތުން ސަލާމަތީ ފިޔަވަޅުތައް ވަރުގަދަކޮށްފައިވީ ނަމަވެސް، އެމެރިކާގެ ވަފުދުގައި ނައިބު ރައީސް ޖޭޑީ ވޭންސް ބައިވެރިވެވަޑައިގަންނަވާނެ ކަމާމެދު ވަނީ ސުވާލު އުފެދިފައެވެ. ނަމަވެސް، ޓްރަމްޕްގެ މަންދޫބު ސްޓީވް ވިޓްކޮފާއި، ދަނބިދަރިކަލުން ޖެރަޑް ކުޝްނަރ މި ވަފުދުގައި ހިމެނޭނެ ކަމަށް ބެލެވެއެވެ. އީރާނުގެ ޤާނޫނުހަދާ މަޖިލީހުގެ ރައީސް މުޙައްމަދު ބާޤިރު ޤާލީބާފް ވިދާޅުވީ ތެހްރާންގެ ނިއުކްލިޔަރ ޕުރޮގުރާމާ ގުޅޭ މައްސަލައިގައި ދެ ފަރާތުގެ ޚިޔާލު ވަރަށް ތަފާތު ކަމުގައެވެ.
ފެބްރުއަރީ 28 ގައި ޓްރަމްޕް އިސްވެ ފެށްޓެވި ހަނގުރާމައިގައި، އެމެރިކާއާއި ޔަހޫދީންގެ ޙަމަލާތަކުގައި އެތައް ހާސް ބަޔަކު ޝަހީދުކޮށްލާފައިވާއިރު، ވިލާތުގެ އިއްތިޙާދުން (އީޔޫ) ކަންބޮޑުވަނީ އެމެރިކާއިން ހޯދަން އުޅޭ އަވަސް ސުލްޙައަކީ ދާއިމީ ޙައްލަކަށް ނުވެދާނެތީއެވެ. ތެލުގެ އަގު އުފުލި، ހުރްމުޒް ކަނޑުއޮޅީގެ ވިޔަފާރި މަޑުޖެހިފައިވާއިރު، އީރާނުގެ ބިނާރާއި މަދަނީ ވަސީލަތްތަކަށް ޙަމަލާދީފިނަމަ އަވައްޓެރި ޤައުމުތަކުގެ ހަކަތަ އުފައްދާ މަރުކަޒުތަކަށް ޙަމަލާދޭނެ ކަމުގެ އިންޒާރު އީރާނުން ވަނީ ދީފައެވެ.