އެެމެރިކާގެ ނިއުޔޯކް ސިޓީގެ މޭޔަރު، ޒޮހްރާން މަމްދާނީގެ ގެކޮޅު، ގްރޭސީ މެންޝަންގެ ބޭރުގައި މުސްލިމުންނާ ދެކޮޅު މުޒާހަރާކޮށް ބޮމުގެ ހަމަލާއެއް ދޭން އުޅުނު ދެ މީހަކު ހައްޔަރުކޮށްފިއެވެ. ބޭރުގެ ރިޕޯޓުތައް ބުނާ ގޮތުގައި ނިއުޔޯކް ސިޓީ ޕޮލިސް ޑިޕާޓްމަންޓް (އެންވައިޕީޑީ)އިން ވަނީ ނަޓް، ބޯލްޓް، ސްކްރޫ އަދި ފިއުޒް ފުރިފައިވާ ކަޅު ޓޭޕް އޮޅާފައިވާ ފުޅިއެއް ހޯދާފައެވެ. ހަމަލާ ދޭން މަސައްކަތްކުރީ މުސްލިމުންނާ ދެކޮޅަށް ކުރި މުޒާހަރާއެއްގެ ތެރޭގައި، ޒޮހްރާންގެ ގެކޮޅަށް އަމާޒުކޮށެވެ. އެ ވަގުތު އޭނާއާއި އޭނާގެ އާއިލާ ތިއްބެވީ ގޭގައެވެ. މުޒާހަރާކުރަން އިއްޔެ އެއްވީ ކަނާތު ފިޔައިގެ އެކްޓިވިސްޓް ޖޭކް ލެންގް އާއި ގުޅުން ހުރި ވިއްސަކަށް މީހުންނެެވެ. އޭގެތެރެއިން ހަ މީހުން ވަނީ ހައްޔަރުކޮށްފައެވެ. ނިއު ޔޯކުގެ މޭޔަރު ޒޮހްރާން މަމްދާނީއާއި އަނބިކަނބަލުން ރާމާ ދުވާޖީ-- ފޮޓޯ/ގެޓީ އެންވައިޕީޑީގެ ކޮމިޝަނަރު ޖެސިކާ ޓިޝް ނޫސްވެރިންނަށް މައުލޫމާތު ދެއްވަމުން ވިދާޅުވީ މުސްލިމުންނާ ދެކޮޅަށް މުޒާހަރާ ކުރި މީހަކު ޕެޕާ ސްޕްރޭ ބޭނުން ކުރުމުން ހަމަނުޖެހުން އިތުރުވި ކަމަށެވެ. މަމްދާނީގެ ތަރުޖަމާނު ޖޯ ކަލްވެލޯ ވިދާޅުވީ މޭޔަރާއި އަނބިކަނބަލުން ސަލާމަތުން ތިއްބެވި ކަމަށެވެ. އަދި އެކަން ވަރަށް ބޮޑަށް ކުށްވެރިކުރާ ކަމަށް ކެލްވެލޯ ވިދާޅުވިއެވެ. އެންވައިޕީޑީން މިހާރު ދަނީ އެ މައްސަލަ ތަހުގީގު ކުރަމުންނެވެ. އެކްޓިވިސްޓް ލެންގް މީގެ ކުރިން ވަނީ 2021 ވަނަ އަހަރުގެ ޖެނުއަރީ މަހުގެ ހަވަނަ ދުވަހު ކެޕިޓަލްގައި ހިނގި ހަމަނުޖެހުންތަކުގައި ބައިވެރިވި ކަމަށް ތުހުމަތުކޮށް ހައްޔަރުކޮށްފައެވެ. ފަހުން ރައީސް ޑޮނަލްޑް ޓްރަމްޕް ވަނީ އޭނާއަށް މައާފު ދީފައެވެ. އަދި މީގެ ކުރިން އޭނާ ވަނީ މުސްލިމުންނާ ދެކޮޅު އެހެން މުޒާހަރާތަކެއް ވެސް އިންތިޒާމްކޮށްފައެވެ. އޭގެ ތެރޭގައި މިދިޔަ ނޮވެމްބަރު މަހު މިޝިގަންގައި ބޭއްވި މުޒާހަރާއެއްގައި ކީރިތި ގުރުއާނުގެ ކޮޕީއެއް އަންދާލަން އޭނާ ވަނީ މަސައްކަތްކޮށްފައެެވެ. މަމްދާނީ އަކީ ގަރުނަކަށް ވުރެ ގިނަ ދުވަސް ފަހުން ނިއު ޔޯކު ސިޓީއަށް އިންތިޚާބުކުރި އެންމެ ޒުވާން މޭޔަރު އަދި އެ ސިޓީގެ ފުރަތަމަ މުސްލިމް އަދި ދެކުނު އޭޝިއާގެ ލީޑަރެވެ. އޭނާ އަކީ އަބަދުވެސް މުސްލިމުންނާއި އެއްކޮޅަށް ވާކާލަތު ކުރައްވާ ބޭފުޅެކެވެ.