ދުނިޔޭގެ މަޝްހޫރު ޑީޖޭއައި ކުންފުނިން ޕްރޮފެޝަނަލް ފެންވަރުގެ ވީޑިއޯއާއި ފޮޓޯ ނެގުމަށް ޚާއްޞަކޮށްގެން އުފައްދާފައިވާ "އޮސްމޯ ޕޮކެޓް 4" ރަސްމީކޮށް ބާޒާރަށް ނެރެފިއެވެ. ޖީބަށްލެވޭހާ ކުޑަ މި ކެމެރާ ފަރުމާކޮށްފައިވަނީ އާދައިގެ ބޭނުންތަކުން ފެށިގެން ސިނަމެޓިކް މަސައްކަތްތަކަށް ވެސް ބޭނުންކުރެވޭ ފަދަ ވަރުގަދަ ފީޗާތަކަކާ އެކުގައެވެ. މި އައު ކެމެރާގައި ހިމަނާފައިވާ އެއް އިންޗީގެ ސީއެމްއޯއެސް ސެންސަރުގެ އެހީގައި ސިކުންތަކު 240 ފްރޭމްގައި 4ކޭ ކޮލިޓީގައި ވީޑިއޯ ރެކޯޑްކުރުމުގެ ގާބިލުކަން ވަނީ ލިބިދީފައެވެ. އަދި, 14-ސްޓޮޕް ޑައިނަމިކް ރޭންޖާއި 10-ބިޓް ޑީ-ލޮގް ކަލާ ސަޕޯޓްކުރާތީ، ފަނޑު އަލީގައި ނަގާ މަންޒަރުތައްވެސް ވަރަށް ސާފުކޮށް އަދި ގުދުރަތީ ކުލަތަކާއެކު ރިކޯޑްކޮށްލެވޭނެއެވެ. ކެމެރާގެ ހަރަކާތްތައް އޮމާންކުރުމަށް 3-އެކްސިސް ސްޓެބިލައިޒޭޝަން ހިމަނާފައިވާއިރު، މީގައިވާ ރޮޓޭޓަބަލް ޓަޗްސްކްރީންގެ އެހީގައި ކެމެރާ ކޮންޓްރޯލްކުރުމަށް ވަރަށް ބޮޑު ފަސޭހައެއް ލިބެއެވެ. މީގެ އިތުރުން، ކެމެރާގައި 107 ޖީބީގެ ބިލްޓް-އިން ސްޓޯރޭޖް ހިމަނާފައިވާތީ މެމަރީ ކާޑަކާ ނުލައި ވެސް ގިނަ މައުލޫމާތުތަކެއް ރައްކާކުރެވޭނެ ކަމަށް ޑީޖޭއައިއިން ބުނެއެވެ. ޓެކްނޮލޮޖީގެ ގޮތުން ބަލާއިރު މި ކެމެރާގައި ހިމެނޭ އެކްޓިވް ޓްރެކް 7.0 އާއި އިންޓެލިޖެންޓް ފޯކަސިންގެ ސަބަބުން ހަރަކާތްތެރިވާ ތަކެތި ނުވަތަ މީހުން މާ ފަސޭހައިން ފޮލޯކޮށް ފޯކަސް ހިފަހައްޓައިދެއެވެ. އަދި، ޕްރޮފެޝަނަލް އޯޑިއޯ އައުޓްޕުޓް ބޭނުންވާ ފަރާތްތަކަށް ހަތަރު ޗެނަލްގެ އޮސްމޯ އޯޑިއޯ ސަޕޯޓް މި ކެމެރާއިން ލިބޭނެއެވެ. ޑީޖޭއައިގެ އޮސްމޯ ޕޮކެޓް ސީރީޒްއަކީ 2018 ވަނަ އަހަރު އެންމެ ފުރަތަމަ ބާޒާރަށް ނެރުނު ފަހުން، ކޮންޓެންޓް ކްރިއޭޓަރުންނާއި ވްލޮގަރުންގެ މެދުގައި ބޮޑު މަގުބޫލުކަމެއް ހޯދާފައިވާ އުފެއްދުމެކެވެ. މި ސީރީޒްގެ އެންމެ ފާހަގަކޮށްލެވޭ ސިފައަކީ އަތްމަތީގައި ގެންގުޅެވޭހާ ކުޑަ، އެހެންނަމަވެސް މެކޭނިކަލް ގިމްބަލްއެއް ބޭނުންކޮށްގެން ސިނަމެޓިކް ފެންވަރުގެ އޮމާން ވީޑިއޯ ނެގުމުގެ ގާބިލުކަން ލިބިފައިވުމެވެ. މީގެ ކުރިން ބާޒާރަށް ނެރުނު "އޮސްމޯ ޕޮކެޓް 3" އަށް ލިބުނު ބޮޑު ތަރުހީބާ އެކު، ޑީޖޭއައިއިން ވަނީ މި ދާއިރާގައި އެ ކުންފުނީގެ ބާރުގަދަކަން ސާބިތުކޮށްދީފައެވެ. ޚާއްޞަކޮށް ކުދި ކެމެރާތަކަށް އެއް އިންޗީގެ ސެންސަރު ތައާރަފްކުރުމުން، ފަނޑު އަލީގައި މަސައްކަތްކުރާ ފަރާތްތަކަށް މި ކެމެރާއަކީ ކޮންމެހެން ބޭނުންތެރި ވަސީލަތަކަށް ވަނީ ވެފައެވެ. އައު "ޕޮކެޓް 4" އަކީ އެ ކާމިޔާބީތަކަށް ބިނާކޮށް، އެންމެ ފަހުގެ އޭއައި ޓެކްނޮލޮޖީއާއި އިތުރު ފަންނީ ކުރިއެރުންތަކާއެކު ނެރުނު އަޕްގްރޭޑެކެވެ.