ލޯތްބަކީ އިމްތިޙާނެކެވެ. ޒަވާޖީ ޙަޔާތަކީ އަދި މާބޮޑު އިމްތިޙާނެކެވެ. އެހެންކަމުން ލޯބިވެވުނު މީހާ ވަރަށް ރަނގަޅަށް އިމްތިޙާނުކުރަންވާނެއެވެ. ކައިވެނިކުރުމުގެ ކުރިން އެއިމްތިޙާނުތައް ނުކުރެވުނުނަމަ ފަހުން އޮންނާނީ ހިތާމަކުރަންޖެހިފައެވެ.  
މީހުންގެ ސްމާޓްކަން ބޮޑުވުމުން ކައިވެނީގެ ކުރިން ބައިވެރިޔާގެ ޚަޞީލަތް ދެނެގަތުމަށްޓަކައި ވަރަށް ގިނަ ތަފާތު އުކުޅަތައްދަނީ ބޭނުން ކުރަމުންނެވެ. އެއިގެ ތެރެއިން އެއް އުކުޅަކީ އަނެކާ ރުޅިއަރުވައިލުމެވެ. އެކަންކުރަނީ ރުޅިއަރުވައިލުމުން ކަންކަންކުރާ ގޮތް ބެލުމަށެވެ.  
މިއީ ދެމީހުންނަށްވެސް ކުރުން ވަރަށް މުހިންމު ކަމެކެވެ. ސަބަބަކީ ޒަވާޖީ ހަޔާތެއްގައި ރުޅިނައިސް މުޅި ޢުމުރުގައި ތިބުމަކީ ކުރެވޭނެ ކަމަކަށް ނުވާތީއެވެ. މާނައަކީ ކައިވެނިކޮށްގެން އެކުގައި ދިރިއުޅެމުންދާއިރު ރުޅިއަންނަ ކަންކަންވެސް މެދުވެރިވާނެއެވެ. ވީމާ އެފަދަ ވަޤުތަކު އަނެކާ ކަންކަން ކުރާނެ ގޮތް ދެނެގަންނަން މަސައްކަތްކުރުމަކީ ވަރަށް މުހިންމު ކަމެކެވެ.  
އަހުރެން ބުނާނީ ރުޅިއައުމުން ކަންކަންކުރާ ގޮތް ބަލަން ކުރާ އިމްތިޙާނުން ފޭލްވެއްޖެނަމަ އެމީހަކާއި ކައިވެނިނުކުރާށެވެ. ރުޅި ކޮންޓްރޯލް ނުކުރެވުނު ނަމަ އެއިގެ މާނައަކީ އޭނާއަކީ އޭނާގެ އަމިއްލަ ނަފްސް ކޮންޓްރޯލުކުރުމުގެ ބާރުލިބިގެންވާ މީހަކަށް ނުވާތީއެވެ. އަދި އެއީ ގިނަ ބައަކަށް އިޞްލާޙްކުރަން އެންމެ އުނދަގޫ އެއް ސިފައެވެ. އަދި ދިރިއުޅުމުގައި އެންމެ ގެއްލުންހުރި އެއްސިފަވެސްމެއެވެ.  
އަންހެނުން މިކަމަށް ޚާއްޞަ ސަމާލުކަމެއްދޭންވާނެއެވެ. ސަބަބަކީ ދަރިންގެ ބައްޕައަކީ ރުޅި ކޮންޓްރޯލަނުކުރެވޭ މީހަކު ނަމަ ރުޅިއައުމުން ދަރިންނާއިމެދުވެސް ކޮންމެ ގޮތަކަށްވެސް ކަންކަންކޮށްފާނެއެވެ. ނުބައި ބަސްބުނުމުގެ އިތުރުން އަތްވެސް އިސްކޮށްފާނެއެވެ. އެކަންކަމަކީ ބަލައިގަންނަން ނުވަތަ އަޅާނުލައި ހުންނަން މައިންނަށް ފަސޭހަވާނެ ކަމެއް ނޫނެވެ. ނަތީޖާއަކަށްވާނީ ދެމަފިރިންގެ މެދުގައި ދެބަސްވުންތައް ގިނަވެ ދަރިންގެ އަޚްލާޤަށްވެސް ނޭދެވޭ އަސަރުތަކެއް ކުރުމެވެ.
 
- އަލަފް / މިއަދުނޫސް