އީރާނާ އެކު އުފެދިފައިވާ ނުތަނަވަސްކަމުގެ ތެރެއިން، ހޮރްމުޒް ކަނޑުއޮޅި ހުޅުވާފައި ބޭއްވުމަށްޓަކައި އެމެރިކާއާ ގުޅިގެން ބައެއް ގައުމުތަކުން ހަނގުރާމަމަތީ މަނަވަރުތައް ފޮނުވުމުގެ ފުރުސަތު އެބައޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް މިއަދު ވިދާޅުވެއްޖެ އެވެ.
އަމިއްލަ ސޯޝަލް މީޑިއާ ޕްލެޓްފޯމް ޓްރޫތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނުން އެ މުހިންމު ކަނޑުގެ މަގު ބަންދުކުރަން އުޅުމުގެ ސަބަބުން އަސަރުކުރާ ގައުމުތަކުން، އެ ސަރަހައްދުގެ ސަލާމަތީ ކަންކަން ބެލެހެއްޓުމުގައި ވޮޝިންޓަނާ ބައިވެރިވާނެ ކަމަށެވެ.
"ގިނަ ގައުމުތަކަކުން، ހާއްސަކޮށް އީރާނުން ހޮރްމުޒް ކަނޑުއޮޅި ބަންދުކުރަން އުޅުމުގެ ސަބަބުން ގެއްލުން ލިބޭ ގައުމުތަކުން، އެމެރިކާއާ ގުޅިގެން، އެ ކަނޑުއޮޅި ހުޅުވާފައި ބޭއްވުމަށާއި ރައްކާތެރިކަން ކަށަވަރުކުރުމަށްޓަކައި ހަނގުރާމަމަތީ އުޅަނދުތައް ފޮނުވާނެ،" އޭނާ ލިޔުއްވާފައިވެ އެވެ.
ޗައިނާ، ފްރާންސް، ޖަޕާން، ދެކުނު ކޮރެއާ އަދި އިނގިރޭސިވިލާތުން މި މަސައްކަތުގައި ބައިވެރިވާނެ ކަމަށް އުއްމީދުކުރައްވާ ކަމަށް ޓްރަމްޕް ވިދާޅުވި ނަމަވެސް، އެއްވެސް ގައުމަކުން ރަސްމީކޮށް އެކަމަށް އެއްބަސްވެފައިވާކަން އޭނާ ކަށަވަރުކޮށްދެއްވާފައެއް ނުވެ އެވެ.
މީގެ އިތުރުން، އެ ސަރަހައްދުގައިވާ އީރާނުގެ ފައުޖުތަކާ ދެކޮޅަށް އެމެރިކާގެ އަސްކަރީ ހަރަކާތްތައް ކުރިއަށްގެންދާނެ ކަމުގެ އިންޒާރު ދެއްވަމުން، ބޭނުންވެއްޖެ ނަމަ އީރާނުގެ މަރުކަޒުތަކަށާއި އުޅަނދުތަކަށް އެމެރިކާގެ ސިފައިން ހަމަލާދެމުން ގެންދާނެ ކަމަށް ޓްރަމްޕް ވިދާޅުވި އެވެ.
"އެމެރިކާއިން އައްސޭރިފަށުގެ ސަރަހައްދުތަކަށް ވަރުގަދަ ހަމަލާތަކެއް ދޭނެ އަދި އީރާނުގެ ބޯޓުފަހަރާއި އުޅަނދުތައް ކަނޑުގެ ސަތަހައިން ފޮހެލުމަށް މެދުނުކެނޑި ހަމަލާދޭނެ،" ޓްރަމްޕް ލިޔުއްވި އެވެ.
މި އިއްތިހާދާ ބެހޭ އެއްވެސް ތަފްސީލެއް ނުވަތަ އެހެން ގައުމުތަކަކުން މިކަމަށް އެއްބަސްވެފައިވާކަން ވައިޓް ހައުސްއިން ވަގުތުން ކަށަވަރުކޮށްދީފައެއް ނުވެ އެވެ.
ހޮރްމުޒް ކަނޑުއޮޅިއަކީ ދުނިޔޭގެ ހަކަތަ އުފުލާ އެންމެ މުހިންމު އެއް މަގަށްވާއިރު، ދުނިޔޭގެ ތެލުގެ ސަޕްލައިގެ ގާތްގަނޑަކަށް %20 އުފުލަނީ މި ސަރަހައްދުންނެވެ. ނަމަވެސް، އީރާނާއި އެމެރިކާ-އިޒްރޭލު ފައުޖުތަކާ ދެމެދު ހިނގަމުންދާ ކުރިމަތިލުންތަކުގައި މި ސަރަހައްދު ވަނީ ބޮޑު ނުތަނަވަސްކަމެއްގެ ތެރޭގަ އެވެ.