މިދިޔަ ހޮނިހިރު ދުވަހުން ފެށިގެން އީރާނާ ދެކޮޅަށް އެމެރިކާއާއި އިސްރާއީލުން ކުރަމުންދާ އަސްކަރީ ހަނގުރާމައިގައި އެމެރިކާއަށް ގާތްގަނޑަކަށް ދެ ބިލިއަން ޑޮލަރުގެ އަސްކަރީ ސާމާނުގެ ގެއްލުން ލިބިފައިވާ ކަމަށް އަނަދޮލު ނޫސް އޭޖެންސީގެ ހިސާބުތަކުން ދައްކައިފިއެވެ. އެންމެ ބޮޑު ގެއްލުމެއް ލިބިފައިވަނީ ގަތަރުގެ އަލް އުދައިދު އެއާ ބޭސްގައި ހުންނަ އެމެރިކާގެ އޭއެން/އެފްޕީއެސް-132 އަވަސް އިންޒާރުދޭ ރާޑަރު ސިސްޓަމަށް ކަމަށްވާއިރު، އެ ސިސްޓަމުގެ އަގު 1.1 ބިލިއަން ޑޮލަރަށް އަރައެވެ. އެ ސިސްޓަމަށް އީރާނުން ހަމަލާދީފައިވަނީ ހަނގުރާމަ ފެށި ދުވަހެވެ. އެ ހަމަލާގައި އެ ސިސްޓަމް ހަލާކުވެފައިވާކަން ގަތަރުން ވަނީ ކަށަވަރުކޮށްދީފައެވެ. އޭގަ ފަހުން އާދީއްތަ ދުވަހު ކުވައިތުގެ ވައިގެ ދިފާއީ ބާރުތަކާ އެކު ހިނގި ހާދިސާއެއްގައި ތިން "އެފް-15އީ ސްޓްރައިކް އީގަލްސް" ހަނގުރާމަ މަތީ މަތިންދާބޯޓަށް ވަނީ ގެއްލުންވެފައެވެ. އޭގައި ތިިބި ހަ ކްރޫއިން ސަލާމަތްވި ނަމަވެސް ބޯޓުތައް ސަލާމަތެއް ނުވިއެވެ. އެ ތަކެތި ބަދަލުކުރުމަށް 282 މިލިއަން ޑޮލަރު ހަރަދުވާނެ ކަމަށް ލަފާ ކުރެވޭ ކަމަށް ބޭރުގެ ރިޕޯޓުތައް ބުނެއެވެ. ހޮނިހިރު ދުވަހު އީރާނުން ދިން ފުރަތަމަ ހަމަލާގައި ބަހްރެއިންގެ މަނާމާގައި ހުންނަ އެމެރިކާގެ ނޭވީގެ ފަސްވަނަ ފްލީޓްގެ މައި މަރުކަޒަށް ހަމަލާދީ، ސެޓެލައިޓް މުވާސަލާތީ ދެ ޓާމިނަލަކާއި ބޮޑެތި ބައެއް އިމާރާތްތައް ވަނީ ހަލާކުކޮށްފައެވެ. އޮޕަން ސޯސް އިންޓެލިޖެންސް ރިޕޯޓްތައް ބޭނުންކޮށްގެން، ޓާގެޓް ކުރި ސެޓްކޮމް އިންސްޓޯލްކުރުމުގެ ހަރަދަށް ބަލާއިރު، ގާތްގަނޑަކަށް 20 މިލިއަން ޑޮލަރު އެ ކަމަށް ޚަރަދުވިއެވެ. ދޯހާގެ އިންޑަސްޓްރިއަލް ޑިސްޓްރިކްޓް އީރާނުން ދިން ހަމަލާއެއް. ފޮޓޯ/އޭއެފްޕީ އަދި، ޔުނައިޓެޑް އަރަބް އެމިރޭޓްސްގެ އަލް ރުވައިސް އިންޑަސްޓްރިއަލް ސިޓީގައި ގާއިމުކޮށްފައިވާ ތައާޑް އެންޓި ބެލިސްޓިކް މިސައިލް (އޭބީއެމް) ސިސްޓަމްގެ އޭއެން/ޓީޕީވައި-2 ރާޑަރުގެ ކޮމްޕޮނެންޓް ވެސް އީރާނުން ވަނީ ނައްތާލާފައިވާ ކަމަށް ބުނެފައެވެ. އޯޕަން ސޯސް އިންޓެލިޖެންސް ރިޕޯޓްތަކުގެ ތެރެއިން ސެޓެލައިޓް އިމޭޖަރީތަކުން ދައްކާ ގޮތުން އެ ތަނަށް ވަނީ ހަމަލާއެއް އަމާޒުވެފައެވެ. ހަލާކުވެފައިވާ ރާޑާ ކޮމްޕޮނެންޓްގެ އަގު 500 މިލިއަން ޑޮލަރަށް އަރާނެ ކަމަށް ލަފާކުރެވެއެވެ. މި ހަރަދުތައް އެއްކޮށްލުމުން އީރާނުން ވަނީ އެ ސަރަހައްދުގައި ހުރި އެމެރިކާގެ އަސްކަރީ މުދަލަށް 1.902 ބިލިއަން ޑޮލަރުގެ ގެއްލުން ދީފައެވެ. އެމެރިކާއިން ދިން ހަމަލާތަކަށް ކުރަންޖެހޭ ބޮޑު ހޭދައާ އެކު، ހަނގުރާމައިގެ ޚަރަދު އިންތިހާއަށް އަދި އިތުރުވާނެއެވެ. ވައިގެ ހަމަލާތަކަށް ބޭނުންވާ މިސައިލާއި އެ ނޫން ވެސް ސާމާނަށް ބޮޑެތި އަދަދުތަކުން ޚަރަދުކުރަން ޖެހެއެވެ. އެމެރިކާއާއި އިސްރާއީލުން ހޮނިހިރު ދުވަހު އީރާނަށް ހަމަލާދޭން ފެށި ފަހުން މިހާތަނަށް މެދުއިރުމަތީގެ މަދުވެގެން ހަތް އަސްކަރީ ތަނަކަށް އީރާނުން ވަނީ ހަމަލާތައް އަމާޒުކޮށްފައެވެ. އެ ތަންތަނަކީ ބަހްރެއިންގައި ހުންނަ އެމެރިކާގެ ފަސްވަނަ ފްލީޓްގެ މައި މަރުކަޒާއި، ކުވައިތުގެ އަލީ އަލް ސަލީމް އެއާ ބޭސް އަދި ކޭމްޕް ބުއެރިންގް، އިރާގުގެ އާބިލް ބޭސް، މެދުއިރުމަތީގައި އެމެރިކާގެ ނޭވީގެ އެންމެ ބޮޑު ބަނދަރު ކަމަށްވާ ޔޫއޭއީގެ ޖެބެލް އަލީ ބަނދަރާއި ގަތަރުގެ އަލްއުދައިދު އެއާ ބޭސްއެވެ. ދުބާއީގެ ޖެބެލް އަލީ ބަނދަރަކީ އެމެރިކާގެ ރަސްމީ މަރުކަޒެއް ނޫން ނަމަވެސް އެމެރިކާގެ ކަނޑުގެ ސިފައިން އެންމެ ގިނައިން ބޭނުންކުރާ ބަނދަރުތަކުގެ ތެރޭގައި ހިމެނޭ ބަނދަރެކެވެ. އަސްކަރީ މަރުކަޒުތަކުގެ އިތުރުން ސައުދީ އަރަބިއްޔާ، ކުވައިތު އަދި ޔޫއޭއީގައި ހުންނަ އެމެރިކާގެ ޑިޕްލޮމެޓިކް މިޝަންތައް ވެސް ވަނީ ހަމަލާތަކުގެ އަމާޒަކަށް ވެފައެވެ. ސައުދީ އަރަބިއްޔާގެ ރިޔާޟުގައި ހުންނަ އެމެރިކާގެ އެމްބަސީއަށް ދެ ޑްރޯން ހަމަލާދީފައިވާއިރު، ކުވޭތުގައި ހުންނަ އެމެރިކާގެ އެމްބަސީއަށް ވެސް ވަނީ ހަމަލާދީފައެވެ. ޔޫއޭއީގެ ދުބާއީގައި ހުންނަ އެމެރިކާގެ ކޮންސިއުލޭޓް ޖެނެރަލް އިމަރާތަށް ވެސް ރޭ ވަނީ ހަމަލަ ދީފައެވެ. އިސްރާއީލާއި އެމެރިކާ ގުޅިގެން އީރާނަށް ދޭ ހަމަލާތަކަށް ރައްދު ދިނުމުގެ ގޮތުން އީރާނުން މެދުއިރުމައްޗާއީ އިސްރާއީލަށް ހަމަލާދެމުން އަންނައިރު، މުޅި ސަރަހައްދުގައި ވަނީ ކަންބޮޑުވުން އުފެދިފައެވެ. ހަމަނުޖެހުންތަކުގެ ސަބަބުން ތެލާއި ގޭހުގެ އަގު އުުފުލެމުން އަންނައިރު، ދަތުރު ފަތުރުކުރުމަށް ވެސް ވަނީ ބުރޫއަރާފައެވެ.