ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑުން ރެއާލް ވަޔަޑޮލިޑް ބަލިކޮށްފިއެވެ. ވަޔަޑޮލިޑްގެ ދަނޑުގައި ކުޅުނު މި މެޗު ރެއާލުން ކާމިޔާބުކޮށްފައިވަނީ 3-0 އިންނެވެ. މެޗުގައި އެމްބާޕޭ ވަނީ ރެއާލްގެ ތިން ލަނޑު ކާމިޔާބުކޮށްދީ ރެއާލްގެ ޖާޒީގައި ފުރަތަމަ ހެޓްރިކް ހަދައިފައެވެ. މެޗުގައި ރެއާލްގެ ފުރަތަމަ ލަނޑު، 30 ވަނަ މިނެޓުގައި އެމްބާޕޭ ކާމިޔާބުކޮށްދިންއިރު ދެވަނަ ލަނޑު ކާމިޔާބުކޮށްފައިވަނީ 57 ވަނަ މިނެޓުގައެވެ. ފަހު ލަނޑު އޭނާ ކާމިޔާބުކޮށް، ހެތްރިކް ފުރިހަމަ ކޮށްފައިވަނީ އިތުރު ވަގުތުގެ ފުރަތަމަ މިނެޓުގައި ލިބުނު ޕެނަލްޓީއަކުންނެވެ. މި ލަނޑާ އެކު އެމްބާޕޭ މިހާރުވަނީ ލަލީގާގައި 15 ލަނޑު ކާމިޔާބުކޮށްފައެވެ. ލަލީގާގައި އޭނާއަށް ވުރެ ގިނައިން ލަނޑު ޖަހާފައިވާ ހަމައެކަނި ކުޅުންތެރިޔަކީ އެފްސީ ބާސެލޯނާގެ ތަޖުރިބާކާރު ފޯވަޑް ރޮބަޓް ލެވަންޑޯސްކީއެވެ. ލެވަންޑޯސްކީވަނީ 16 ލަނޑު ކާމިޔާބުކޮށްފައެވެ. ރެއާލުން މިހާރު ވަނީ 21 މެޗުން ލިބިފައިވާ 49 ޕޮއިންޓާ އެކު އެއްވަނައިގައި ހަތަރު ޕޮއިންޓްގެ ލީޑެއް ނަގައިފައެވެ. ވަޔަޑޮލިޑް އޮތީ 15 ޕޮއިންޓާ އެކު އެންމެ ފުލުގައެވެ. މުބާރާތުގައި އެޓްލެޓިކޯ މެޑްރިޑާއި ވިޔެރެއާލް ބައްދަލުކުރި މެޗު 1-1 އިންވީ އެއްވަރެވެ. މެޗުގެ ފުރަތަމަ ލަނޑު 29 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށް، ލީޑު ނަގާފައިވަނީ ގެރާޑް މޮރޭނޯއެވެ. އެޓްލެޓިކޯއަށް މެޗުގެ ނަތީޖާ ހަމަހަމަކޮށްދިނީ 58 ވަނަ މިނެޓުގައި ސެމުއެލް ލިނޯއެވެ. މެޗު އެއްވަރުވުމުން އެޓްލެޓިކޯއަށް ވަނީ އެއްވަނައިގައި އޮތް ރެއާލާ ދެމެދު ކުރިން އޮތް ދެ ޕޮއިންޓްގެ ތަފާތު ހަތަރު ޕޮއިންޓަށް ބަދަލުވެފައެވެ. އެޓްލެޓިކޯ މިހާރު ދެވަނައިގައި އޮތީ 45 ޕޮއިންޓާ އެކުއެވެ. ވިޔަރެއާލް އޮތީ 34 ޕޮއިންޓާ އެކު ފަސްވަނައިގައެވެ.