ފ. ބިލެތްދޫގެ މެދުގައި 24 އަހަރު ވަންދެން ހިންގަމުން އައި ޒަމާންވީ އިންޖީނުގެ ބަންދުކޮށް، ފެނަކަ ކޯޕަރޭޝަނުން ހެދި އާ އިންޖީނުގެ ހުޅުވައިފި އެވެ.
ރަށުގެ ޖާގަ ކުޑަވުމުގެ ސަބަބުން ބަނދަރުމަތީގައި ހެދި އާ އިންޖީނުގެ ހުޅުވައިދެއްވީ އެ ރަށުގައި މިއަދު ބޭއްވި ރަސްމިއްޔާތެއްގައި ރައީސް އިބްރާހިމް މުހައްމަދު ސޯލިހެވެ.
ބިލެތްދޫގައި މީގެ ކުރީން ހުރި އިންޖީނުގެއަކީ ހަމައެކަނި ކޮންޓްރޯލް ރޫމަކާއި ޑެގްރޫމެއް ހުރި ތަނެކެވެ. އަދި އޮފީސް އިމާރާތުގައި ހުރީ ސްޓާފް އޭރިއާއެއް އެކަންޏެވެ.
ނަމަވެސް އަލަށް ހުޅުވި އިންޖީނުގޭގައި ކޮންޓްރޯލް ރޫމަކާއި ޑެގްރޫމެއްގެ އިތުރުން ވޯކްޝޮޕެއް، ސްޓޯރެއް، ޗިމްނީއެއް، ފިއުލް ޓޭންކެއް، ޕޭންޓްރީ އަދި ފާހާނާއެއް ހުރެ އެވެ. އަދި އޮފީސް އިމާރާތުގައި ރިސެޕްޝަން، ލޮބީ، މީޓިން ރޫމް، މެނޭޖާ ރޫމް، ޓެކްނިކަލް ސްޓާފް ރޫމް، ރެސްޓް ރޫމް، ޕޭންޓްރީ އަދި ފާހާނާއެއް ހުރެ އެވެ.
ކުރިން ހުރި އިންޖީނުގެއާއި އޮފީސް އިމާރާތުގައި ފަސް މުވައްޒަފުންނަށް އެކަމަޑޭޓް ކުރެވުނު ނަމަވެސް، އަލަށް ހުޅުވި އިންޖީނުގެއާއި އޮފީސް އިމާރާތުގައި 30 މުވައްޒަފުންނަށް އެކަމަޑޭޓް ކުރެވޭނެ އެވެ.
ބިލެތްދޫ އާ އިންޖީނުގެ ހުޅުވީ ޖެންސެޓްގެ ކެޕޭސިޓީވެސް އިތުރުކޮށްފަ އެވެ. އެގޮތުން ކުރީ ޖެންސެޓްގައި 1060 ކިލޯވޮޓް ހުރި ނަމަވެސް އަލަށް ހެދި އިންޖީނުގެ ޖެންސެޓް ކެޕޭސިޓީ ވަނީ 1200 ކިލޯވޮޓަށް އިތުރުކޮށްފަ އެވެ.