ދިރާސީ އާ އަހަރަށް ތައްޔާރުވުމުގައި އެހީ ބޭނުންވާ އާއިލާތަކަށް އެހީތެރިކަން ފޯރުކޮށްދިނުމަށް ކުރިއަށް ގެންދާ "ބެކް ޓު ސްކޫލް" ކެމްޕެއިނާ ދިރާގުން ގުޅިއްޖެ އެވެ."ބެކް ޓު ސްކޫލް 2023" ޕްރޮގްރާމުގެ މައިގަނޑު މަގްސަދަކީ ދިރާސީ އައު އަހަރު ފެށޭއިރު މުޖުތަމައުގައި އެހީއަށް ބޭނުންވަފައިތިބި އާއިލާތަކުގެ ތެރެއިން ހާއްސަކޮށް އެކަނިވެރި މައިންނަށް އެއްބާރުލުން ދިނުން ކަމަށް އެ ޖަމިއްޔާއިން ބުނެ އެވެ.މި މައިންގެ ތެރޭގައި ނުކުޅެދުންތެރިކަން ހުންނަ ފަރާތްތަކުގެ އިތުރުން ބަލި ކުދިންނާއި ނުކުޅެދުންތެރިކަން ހުންނަ ކުދިން ބަލަހައްޓާ މީހުން ވެސް ހިމެނެ އެވެ.މަމްސް އެއިޑްގެ "ބެކް ޓު ސްކޫލް" ޕްރޮގުރާމަކީ އެ ޖަމިއްޔާގެ ކެއާ ލިސްޓުގައި ހިމެނޭ އާއިލާތަކުގެ ތެރެއިން ދިރާސީ އާ އަހަރަށް ތައްޔާރުވުމުގައި ދަތިތަކާ ކުރިމަތިލާން ޖެހިފައިވާ އާއިލާތަކުގެ ކުދިންނަށް ބޭނުންވާ ބޫޓު، އިސްޓާކީނު، ޔުނީފޯމް ސެޓް އަދި ސްޓޭޝަނަރީ ފޯރުކޮށްދޭ ޕްރޮގުރާމެކެވެ.މި ޕްރޮގްރާމުގައި މި އަހަރު ދިރާގުގެ އެހީތެރިކަމާ އެކު އެ ޖަމިއްޔާގެ ކެއާ ލިސްޓުގައި ހިމެނޭ ކީ ސްޓޭޖު 3 އަދި 4 ގެ ދަރިވަރުންނަށް ތަކެތި ފޯރުކޮށްދޭނެ އެވެ.މި ޕްރޮގުރާމްގެ ދަށުން އެހީތެރިކަން ފޯރުކޮށްދޭ އާއިލާތަކަކީ އެކަނިވެރި މައިންގެ އާއިލާތަކާއި ނުކުޅެދުންތެރިކަން ހުންނަ މީހުންނާއި ބަލި ކުދިންނާއި ނުކުޅެދުންތެރިކަން ހުންނަ ކުދިން ބަލަހައްޓާ މީހުންގެ އާއިލާތަކެވެ.