ރާއްޖޭގެ ގައުމީ ޔުނިވަސިޓީ (އެމްއެންޔޫ)ން ބާއްވާ 'ތެވެލި' ބައިނަލްއަގުވާމީ ކޮންފަރެންސް އިއްޔެ ފަށައިފި އެވެ.
ވީ ކިހިނެއް؟ - އަށް ވަނަ 'ތެވެލި' ބައިނަލްއަގުވާމީ ކޮންފަރެންސް ފެށީ އެމްއެންޔޫގެ ސެންޓްރަލް އެޑްމިނިސްޓްރޭޝަން އިމާރާތުގައި އިއްޔެ ބޭއްވި ރަސްމިއްޔާތެއްގަ އެވެ.
އެ ރަސްމިއްޔާތު ޝަރަފުވެރި ކޮށްދެއްވީ ފޮރިން މިނިސްޓަރު ޑރ. އަބްދުﷲ ހަލީލެވެ.
އެ ހަފްލާގައި ބައިވެރިވެވަޑައިގެންނެވި އެހެން ބޭފުޅުންގެ ތެރޭގައި:
އެމްއެންޔޫގެ ޗާންސެލަރު ޑރ. މުހައްމަދު ޝަރީފް 
ވައިސް ޗާންސެލަރު ޑރ. އާއިޝަތު ޝެހެނާޒް އާދަމް 
ޑެޕިއުޓީ ވައިސް ޗާންސެލަރުންނާއި ޔުނިވަސިޓީގެ އިސް ވެރިން 
ސަރުކާރުގެ އިސްވެރިން 
ކީނޯޓް ސްޕީކަރުންނާއި ޕްރެޒެންޓަރުން 
ތަފްސީލް - މި މަހުގެ 21އަށް ކުރިއަށްދާ ކޮންފަރެންސްގެ ތީމަކީ، 'އިވޯލްވިން ޕެރަޑައިމްސް: މާޖިން ރިސާޗު، އެވިޑެންސް، އެންޑް ޕްރެކްޓިސް' އެވެ.
މި ކޮންފަރެންސްގެ ބޭނުމަކީ، އެމްއެންޔޫން ބުނި ގޮތުގައި، އާ އިލްމީ ހޯދުންތަކުގެ "އަލިކަން" ނުވަތަ "ތެވެލި" ރާއްޖޭގެ އިތުރުން މި ސަރަހައްދުގެ ގައުމުތަކަށާއި މުޅި ދުނިޔެއަށް ފެތުރުމެވެ.
ތެވެލި ކޮންފަރެންސްގެ މައިގަނޑު މަގްސަދަކީ، އެމްއެންޔޫން ބުނި ގޮތުގައި:
ދިރާސާ ކުރާ ފަރާތްތަކަށާއި ދިރާސާގެ އަލީގައި ހޯދާ ހޯދުންތައް ހުށަހެޅުން 
އެފަދަ ސަގާފަތެއް ދަރިވަރުންގެ މެދުގައި އަށަގެންނެވުން
ދިރާސާ ކުރާ ފަރާތްތަކާއި ބޭރުގެ ފުންނާބު އުސް ދިރާސާވެރިންނާ އެއް ޕްލެޓްފޯމަކަށް ގެނެސް ގުޅުވައިދިނުން
ދިރާސާ ކުރުމުގެ އާ ގޮތްތަކާއި އާ ހިޔާލުތަކަށް ފުރުސަތު ހުޅުވުމަށް މަގުފަހިކޮށްދިނުން
ބުނީ ކީކޭ؟ - ކޮންފަރެންސް ހުޅުއްވައިދެއްވުމަށް ފަހު، ވާހަކަދައްކަވަމުން އެމްއެންޔޫގެ ވައިސް ޗާންސެލަރު ޑރ. އާއިޝަތު ޝެހެނާޒް އާދަމް ވިދާޅުވީ ތެވެލި ކޮންފަރެންސަކީ އެކަޑަމިކް ފެންވަރުގެ އެއް ސިފަ ކަމަށާއި ކޮންމެ އަހަރަކު ވެސް އެ ކޮންފަރެންސް އިތުރުވަމުން އަންނަކަން ފާހަގަކުރެވޭ ކަމަށެވެ.
ދިވެހި އަދި ބައިނަލްއަގުވާމީ ދިރާސާވެރިންނާއި އެމްއެންޔޫގެ މުވައްޒަފުންނާއި ދަރިވަރުންގެ ބައިވެރިވުން އިތުރުވެފައިވާކަން އޭނާ ފާހަގަކުރެއްވި އެވެ.
ދިރާސާތަކަކީ އެކަހެރިކޮށް ކުރިއަށް ގެންދެވޭނެ ކަމެއް ނޫން ކަމަށާއި އޭގެ ހެކިތައް ބޭނުންކޮށްގެން ދިރިއުޅޭ މާހައުލަށް އަދި ގައުމީ ތަރައްގީއަށް ހަގީގީ ކުރިއެރުން ގެނައުމަށް މަސައްކަތްކުރަން ޖެހޭނެ ކަމުގައި އޭނާ ވިދާޅުވި އެވެ.
މި އަހަރުގެ ކޮންފަރެންސްގައި، އެމްއެންޔޫގެ ދަރިވަރުންނަށް ހާއްސަކޮށް ފުރަތަމަ ފަހަރަށް 'ސްޓޫޑެންޓް ސިމްޕޯސިއަމް'އެއް ތައާރަފުކޮށްފައިވާކަން ޝެހެނާޒް ފާހަގަކުރެއްވި އެވެ. މިއީ، އޭނާ ވިދާޅުވި ގޮތުގައި، ޒުވާން ދިރާސާވެރިންނަށް، ކުޑައިރުން ފެށިގެން ދިރާސާކުރުމަށް ބާރުއަޅައި ސުވާލުކުރުމަށް ހިތްވަރުދީ އެ މީހުންގެ ހޯދުންތައް ހިއްސާކުރުމަށް ފުރުސަތު ހުޅުވާލުމަށް ކުރި މަސައްކަތެކެވެ.
މި މަސައްކަތްތަކުގެ މައްޗަށް ބިނާކޮށް ހަފުތާއެއް ކުރިން އެމްއެންޔޫން 16 އާ ޕީއެޗުޑީ ޕްރޮގްރާމް ތައާރަފުކޮށްފައިވާ ކަމަށާއި މިހާރު ޖުމްލަ 18 ޕީއެޗުޑީ ޕްރޮގްރާމު ހިންގަމުން އަންނަ ކަމުގައި ޝެހެނާޒް ހާމަކުރެއްވި އެވެ.
އެމްއެންޔޫގެ ޑެޕިއުޓީ ވައިސް ޗާންސެލަރު (ރިސާޗު އެންޑް އެންޓަޕްރައިޒް) ޑރ. ރަހީމާ އަބްދުއްރަހީމް ވިދާޅުވީ، ކޮންފަރެންސްގެ މުހިންމު ބަޔަކީ ދިރާސާ ކަރުދާސްތައް ހުށަހަޅާ ދިރާސާވެރިންނާއި ލިޔުންތެރިން ކަމަށާއި ތެވެލި ކޮންފަރެންސަކީ އެމްއެންޔޫގެ އަހަރީ ކަލަންޑަރުގައި ހިމެނޭ އެންމެ މުހިންމު އެއް އިވެންޓު ކަމަށެވެ.
ދިރާސާވެރިންނާއި އެކަޑަމިކް ފަންނާނުންނާއި ދަރިވަރުން ދިރާސާ ކުރުމަށް ޝައުގުވެރިވާ ފަރާތްތަކުން އިންތިޒާރުކުރާ އިވެންޓެއް ކަމުގައި ތެވެލި ކޮންފަރެންސް ވެފައިވާކަން އޭނާ ފާހަގަކުރެއްވި އެވެ.
މީގެ އިތުރުން، މެޑިސިން، އިންޖިނިއަރިން އަދި އެޑިއުކޭޝަނަލް ޓެކްނޮލޮޖީއާ ގުޅުންހުރި އިތުރު ތިން ކޮންފަރެންސް އެމްއެންޔޫން މި އަހަރު ބާއްވާފައިވާކަން ވެސް ރަހީމާ ފާހަގަކުރެއްވި އެވެ. މި ކަންކަމުން ދައްކުވައިދެނީ، އޭނާ ވިދާޅުވި ގޮތުގައި، ރާއްޖޭގައި ދިރާސާތަކަށް އޮންނަ ޝައުގު އިތުރުވަމުން އަންނަ މިންވަރާއި އެމްއެންޔޫގެ ދިރާސާ ކުރުމުގެ ގާބިލުކަން އިތުރުވަމުން އަންނަ މިންވަރެވެ.
އެމްއެންޔޫގެ ރިސާޗު އެންޑް ޑިވެލޮޕްމެންޓް ހެޑް ޑރ. މަރިއަމް ޝަހުނީޒާ ނަސީރު ވިދާޅުވީ، މި އަހަރުގެ ކޮންފަރެންސްގެ މައިގަނޑު މައުލޫ، 'އިވޯލްވިން ޕެރަޑައިމްސް' އިން ދައްކުވައިދެނީ މައުލޫމާތާއި އަމަލު ގުޅުވާލުމަށް އެމްއެންޔޫން ކުރަމުން އަންނަ މަސައްކަތްތައް ކަމަށެވެ.
އޭގެ އެންމެ ބޮޑު މިސާލެއްގެ ގޮތުން، މި އަހަރުގެ ތެވެލި ކޮންފަރެންސަށް ޖުމްލަ 237 ދިރާސާ ހުށަހެޅި އިރު، އޭގެ ތެރެއިން 198 ދިރާސާ ގަބޫލުކޮށްފައިވާ ކަމަށް ޝަހުނީޒާ ވިދާޅުވި އެވެ. މިއީ، އޭނާ ފާހަގަކުރެއްވި ގޮތުގައި، މިދިޔަ އަހަރަށް ވުރެ 31 ދިރާސާ އިތުރު އަދަދެކެވެ.