ކަރަންޓް ސަބްސިޑީއަށް އަލުން ރަޖިސްޓްރީ ކުރުމަށް ހުޅުވާލައިފަވާ މުއްދަތު އަންނަ ބުރާސްފަތި ދުވަހު ހަމަވާއިރު މާލެ ސިޓީގެ ގިނަ ބަޔަކަށް ކަރަންޓު ސަބްސިޑީ ނުލިބިދާނެތީ، ސަބްސިޑީއަށް އެދުމުގެ މުއްދަތު އިތުރުކޮށް ދިނުމަށާއި އެކަން އަލުން މުރާޖާ ކުރުމަށް ކަމާބެހޭ ފަރާތްތަކަށް މާލޭ ސިޓީ ކައުންސިލުން ގޮވާލައިފި އެވެ.
މާލޭ ސިޓީ ކައުންސިލުން ނެރެފައިވާ ނޫސްބަޔާނެއްގައި ބުނެފައި ވަނީ މާލޭގައި ދިރިއުޅޭ ރައްޔިތުންނަށް ކުރިއްސުރެ ދެމުން ގެންދިޔަ ކަރަންޓް ސަބްސިޑީ ސަރުކާރުން ކަނޑާލުމަށްޓަކައި، އަލުން ސަބްސިޑީއަށް ރަޖިސްޓްރީ ކުރުމަށް ހުޅުވާލި މުއްދަތުގައި އެކަން އާންމުންނަށް އަންގައި ދިނުމުގެ ގޮތުން އެކަމާއި ބެހޡޭ މައުލޫމާތުތައް އެކަށީގެންވާ ވަރަށް މީހުންނަށް ފޯރުކޮށްދީފައި ނުވާ ކަމަށެވެ. އެހެންވުމުގެ ސަބަބުން އެކަމަށް އެދި މިހާތަނަށް ފޯމު ހުށަހަަޅާފައިވަނީ މާލޭގައި ދިރިއުޅޭ ރައްޔިތުންގެ ތެރެއިން ވަރަށް މަދު އަދަދެއްގެ ބައެއްކަމަށް މައުލޫމާތު ލިބިފައިވާ ކަަމަށް ސިޓީ ކައުންސިލްގެ ބަޔާނުގައި ބުނެފައި ވެއެވެ.
ސިޓީ ކައުންސިލުން ބުނީ މާލޭގެ ގޯތި ގެދޮރުގެ ހާލަތު ހުރިގޮތުން ގިނަ އާއިލާތަކެއް ދިރިއުޅެމުންދަނީ ވަރަށް ދަތިހާލުގައި ކަމަށެވެ.
"މާލޭގައި ދިރިއުޅުމުގެ ހަރަދު އެއްދުވަހުން އަނެއްދުވަހަށް އުފުލެމުންދާއިރު، ސަރުކާރުން ފޯރުކޮށްދެމުން ގެންދިޔަ ކަރަންޓް ސަބްސިޑީ ކަނޑާލައިފިނަމަ، އެފަދަ އާއިލާ ތަކަށް ލިބޭ އާމްދަނީން ދެކޮޅުނިޖެހި އާއިލާތައް އިތުރަށް ބިކަވެ ހާލުގައި ޖެހޭނެ،" ސިޓީ ކައުންސިލުގެ ބަޔާނުގައި ބުނެފައި ވެއެވެ.
މާލޭ ސިޓީ ކައުންސިލުން ބުނީ ކަރަންޓް ސަބްސިޑީ ލިބެންޖެހޭ އާއިލާތަކުގެ ތެރެއިން ސަބްސިޑީ ނުލިބި ގިނަބަޔަކު ވުމަކީ އެ ކައުންސިލުން ކަންބޮޑުވާ ކަމެއް ކަމަށެވެ.