ސީޕްލޭން ޓާމިނަލްގެ މައްސަލައިގައި ދާންދޫ ދާއިރާގެ މެމްބަރު ޔައުގޫބް ޢަބްދުﷲގެ ކަންބޮޑުވުންތައް ސޯޝަލް މީޑިއާގައި ހިއްސާކޮށްފި އެވެ.
ސީ ޕްލޭން ޓާމިނަލްގެ މައްސަލައިގައި މެމްބަރު ޔައުގޫބް ކުރެއްވި ޓްވީޓެއްގައި ވިދާޅުވެފައިވަނީ، މަޖިލިސް ޗުއްޓީގައި ވަނިކޮށް އަދި މަޖިލީހުން ސީ ޕްލޭން ޓާމިނަލްގެ މައްސަލަ ބަލަމުން ދަނިކޮށް ވަކި ބަޔަކަށް ފައިދާވާގޮތަށް ސީ ޕްލޭން ޓާމިނަލް ދޫކުރުމަކީ ބޮޑު ކޮރަޕްޝަނެއް ކަމަށެވެ.
އަދި އެކަންކުރަމުން ދަނީ އޮޑިޓާ ޖެނެރަލްގެ އޮފީހުގެ ލަފާފުޅާއި ހިލާފަށްކަމަށް ވެސް ޔައުގޫބްގެ ޓްވީޓްގައި ވެއެވެ. Mulhi gaumuge focus vakikamakah huttifaivaa vaguthehga, Seaplane Terminalge massala majlihun balamundhaa dhandivalhehga adhi majlis chutteega ovvaa, AGOge lafayaa khilaafah seaplane terminal vakibayakah faidhaavaaneyhen dhookollumakee boduvehenvaa corruption eh. @ibusolih @MoFmv pic.twitter.com/T0U8zh79p3— Yaugoob Abdulla (@Yaugoob181) December 20, 2019
ސީ ޕްލޭން ޓާމިނަލް އަންނަ މެއި މަހުގެ ތެރޭގައި ހުޅުވާ ގޮތަށް ހަމަޖައްސާފައިވާއިރު، އެމްއޭސީއެލް އިން ބުނެފައިވަނީ ސީ ޕްލޭން ޓާމިނަލް މިހާރު ވެސް ހިންގާ ގޮތަށް ހިންގަމުން ގޮސް ތިން އަހަރުގެ ތެރޭގައި އެމްއޭސީއެލްއާ އެއްކޮށް ހަވާލުވާނެ ކަމަށެވެ. ސީ ޕްރޭން ޓާމިނަލް މިހާރު ހިންގަމުން އަންނަނީ އެކި ސީ ޕްލޭންތައް އޮޕަރޭޓްކުރަމުން އަންނަ ކުންފުނިތައް ގުޅިގެންނެވެ.
ވެލާނާ އިންޓަނޭޝަނަލް އެއާޕޯޓުގައި ހަދަމުން އަންނަ އާ ސީޕްލޭން ޓާމިނަލްއާ ގުޅިގެން ހެދި އޮޑިޓުގައި އެތަން މޯލްޑިވްސް އެއާޕޯޓްސް ކޮމްޕެނީ ލިމިޑެޓް (އެމްއޭސީއެލް)، އަށް ހިންގަން ދިނުމަކީ ދައުލަތަށް އެންމެ ފައިދާ ލިބޭނެ ގޮތްކަމަށް އޮޑިޓް އޮފީހުން ވަނީ ނިންމާފައެވެ.
ދުނިޔޭގެ އެންމެ ބޮޑު ސީޕްލޭން އޮޕަރޭޓަރު ކަމަށްވާ ޓްރާންސް މޯލްޑިވިއަން އެއާވޭސް (ޓީއެމްއޭ)އަށް އާ ސީޕްލޭން ޓާމިނަލް ކުއްޔަށް ދޭން އުޅޭކަމުގެ އަޑުތައް މިދޭތެރެއިން ގަދަވި އެވެ. އެ އަޑުތަކާއެކު ރާއްޖޭގައި ސީޕްލޭން އޮޕަރޭޓް ކުރާ ފަރާތްތައް ވަރަށް ބޮޑަށް ނުރުހުން ފާޅުކުރަން ފެށިއިރު އެ މައްސަލަ މަޖިލީހުގެ މާލިއްޔަތު ކޮމިޓީން ވަނީ ބަލަން ފަށާފަ އެވެ. އަދި އެކަމުގެ އޮޑިޓެއް ހަދައިދޭން ވެސް އެކޮމިޓީން އެދުނެވެ.
އެކަމުގެ އޮޑިޓްކޮށް އޮޑިޓާ ޖެނަރަލް ހަސަން ޒިޔަތު މާލިއްޔަތު ކޮމިޓީއަށް ފޮނުވި އޮޑިޓް ރިޕޯޓް އަދި ހާމަނުކުރިނަމަވެސް އެނގިފައިވާ ގޮތުގައި އާ ސީޕްލޭން ހިންގިދާނެ ގޮތްތަކެއް އޮޑިޓާ ޖެނަރަލް ހުށަހަޅާފައިވާއިރު އޭގެ ތެރެއިން އެންމެ ފައިދާ ބޮޑު ގޮތަކީ އޮޑިޓާ ޖެނަރަލް ލަފާ ދެއްވަނީ އެމްއޭސީއެލުން އެތަން ހިންގުމެވެ.
ސީޕްލޭން އޮޕަރޭޓް ކުރާ ފަރާތްތަކުން އާ ޓާމިނަލް ހަމައެކަނި ޓީއެމްއޭއަށް ދޭން ދެކޮޅު ހަދަނީ އޭރުން އެކުންފުންޏަށް މާފައިދާ ބޮޑުވާނެތީ އެވެ.
އެމްއޭސީއެލުން ބުނާ ގޮތުގައި ކުންފުނީގެ ވިސްނުން ހުރީ އެތަން ން ހުރިހާ އޮޕަރޭޓަރުންނަށް ވެސް ބޭނުން ކުރެވޭނެ ގޮތް ހެދުމަށެވެ.
އާ ސީޕްލޭން ޓާމިނަލަކީ އެމްއޭސީއެލުން 40 މިލިއަން ޑޮލަރު (616.8 މިލިއަން ރުފިޔާ) ހަރަދުކޮށްގެން ތަރައްގީކުރަމުން އަންނަ ޓާމިނަލަކެވެ.
ސީޕްލޭން ޓާމިނަލް ގެ އަމަލީ މަސައްކަތް މި އަހަރުގެ ޖެނުއަރީ 29 ގައި ފެށިއިރު އެ ތަނުގެ މަސައްކަތުގެ ބޮޑު ބައި މިހާރު ނިމިފައިވާ ކަމަށް އެމްއޭސީއެލުން ބުނެ އެވެ. 14000 އަކަ ފޫޓު ހުންނަ އެ ޓާމިނަލް ގެ މަސައްކަތް ކުރަން ހަވާލުކޮށްފައި ވަނީ ޗައިނާގެ ބެއިޖިން އާބަން ކޮންސްޓްރަކްޝަން (ބީޔޫސީޖީ) އާ އެވެ.
ސީޕްލޭން ޓާމިނަލް މިހާރު ހިންގަމުން އަންނަނީ ސީޕްލޭން ދުއްވާ ކުންފުނިތަށް ބިން ކުއްޔަށް ދީގެން، އެމީހުން އަމިއްލައަށެވެ.
އާ ސީޕްލޭން ޓާމިނަލް ގެ މަސައްކަތް މިއަހަރުގެ ނިޔަލަށް ނިންމާލެވޭނެ ކަމަށް ވެސް އެކުންފުނިން ބުނެ އެވެ.