ރާއްޖެ އާއި އިތިއޯޕިއާއާ ދެމެދު ސޮއިކުރި ވައިގެ ދަތުރުފަތުރުގެ އެއްބަސްވުމާއެކު، އެފްރިކާގެ މާކެޓުތަކަށް ފަތުރުވެރިކަން ފުޅާކުރުމުގެ ފުރުސަތު ބޮޑުވާނެ ކަމަށް, އޭވިއޭޝަން ދާއިރާގެ ފާހަގަކޮށްލެވޭ ތަޖުރިބާކާރު އަދި އިނަ މޯލްޑިވްސް ހޮލިޑޭސްގެ މެނޭޖިން ޑިރެކްޓަރު މުހައްމަދު ފިރާގު ވިދާޅުވެއްޖެއެވެ. ދިވެހިރާއްޖެ އާއި އިތިއޯޕިއާއާ ދެމެދު ވައިގެ ދަތުރުފަތުރުގެ އެއްބަސްވުމެއްގައި މިދިޔަ އަންގާރަ ދުވަހު ވަނީ ސޮއި ކޮށްފައެވެ. މި އެއްބަސްވުމާއި މެމޮރަންޑަމް އޮފް އަންޑަސްޓޭންޑިން (އެމްއޯޔޫ) ގައި ރާއްޖޭގެ ފަރާތުން ސޮއިކުރެއްވީ ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީނެވެ. އިތިއޯޕިއާގެ ފަރާތުން ސޮއިކުރެއްވީ އެ ގައުމުގެ ސިވިލް އޭވިއޭޝަން އޮތޯރިޓީގެ ޑިރެކްޓަރު ޖެނެރަލް ޔޮއާނަސް އަބޭރާ ބެލެޓޭއެވެ. https://www.sun.mv/224933 މި އެއްބަސްވުމާ ގުޅިގެން، ފިރާގު ވިދާޅުވި ގޮތުގައި، މިއީ ރާއްޖޭގެ ފަތުރުވެރިކަމާއި ވައިގެ ގުޅުންތަކަށް އައި ސްޓްރެޓީޖިކް މުހިންމު ބަދަލެކެވެ. އޭނާ ފާހަގަކުރެއްވި ގޮތުގައި، އިތިއޯޕިއާ ރޫޓަކީ ތުރުކީވިލާތުގެ އިސްތަންބޫލް މެދުވެރިކޮށް ލިބޭ ފަދަ ބޮޑު ފައިދާއެއް ލިބޭނެ މުހިންމު ހަބެކެވެ. މީގެ ސަބަބުން އެފްރިކާ ބައްރަށް ސީދާ ދަތުރުތައް ފެށި، އާ މާކެޓުތަކަށް ރާއްޖޭގެ ފަތުރުވެރިކަން ފުޅާކުރުމުގެ މަގު ފަހިވެގެންދާނެ ކަމަށް އޭނާ ވިދާޅުވިއެވެ. މީގެ އިތުރުން، ސަގާފީ މާކެޓުތަކަށް ބަރޯސާވާ މިންވަރު ކުޑަކުރުމުގެ މުހިންމުކަމުގެ މައްޗަށް ފިރާގު އަލިއަޅުވާލެއްވިއެވެ. އޭނާ ވިދާޅުވި ގޮތުގައި، އެފްރިކާ އާއި އެހެނިހެން ގުޅިފައިވާ ސަރަހައްދުތަކާ ދެމެދު ވަރުގަދަ ގުޅުމެއް ގާއިމުކުރުމުން، އާންމުކޮށް ފަތުރުވެރިން އަންނަ މާކެޓުތަކަށް އަންނަ ބަދަލުތަކުން ލިބޭ ގެއްލުން ކުޑަކުރެވި، ދިގު މުއްދަތެއްގައި ރާއްޖޭގެ އިގުތިސާދީ ދުޅަހެޔޮކަން އިތުރުކުރެވޭނެއެވެ. އެހެންކަމުން، މި އެއްބަސްވުމުގެ ދަށުން ވީހާވެސް އަވަހަކަށް ވިޔަފާރި ދަތުރުތައް ފެށުމަށް އޭނާ ވަނީ އެއާލައިންތަކަށް ގޮވާލައްވާފައެވެ. ޚާއްސަކޮށް، މީގެ ކުރިންވެސް ޝައުގުވެރިކަން ފާޅުކޮށްފައިވާ އިތިއޯޕިއަން އެއާލައިންސް ފަދަ ކުންފުނިތަކުން މި ފުރުސަތުގެ ބޭނުން ހިފައި، ޝެޑިއުލް ދަތުރުތައް ފެށުމަށް އޭނާ އެދިވަޑައިގަތެވެ. ދެ ގައުމުގެ ދެމެދުގައި ގާއިމުކުރި މި އެއްބަސްވުމަކީ، ގައުމީ އެއާލައިން މޯލްޑިވިއަން އާއި އިތިއޯޕިއަން އެއާލައިންސް ހިމެނޭ ގޮތަށް، ކަނޑައެޅިފައިވާ އެއާލައިންތަކަށް ސީދާ ދަތުރުތައް ފެށުމަށް މަގުފަހިކޮށްދޭ ގާނޫނީ އޮނިގަނޑެކެވެ. އިތިއޯޕިއާގެ ވެރިރަށް އެޑިސް އަބަބާއަކީ އެފްރިކާގެ އެންމެ ބޮޑު އެއް އޭވިއޭޝަން ހަބަށް ވާއިރު، ސިނާއަތުގެ ފަރާތްތަކުން ދެކޭ ގޮތުގައި މި ރޫޓަކީ އެފްރިކާ ބައްރާއި އެހެނިހެން ސަރަހައްދުތަކުން އާ ފަތުރުވެރިން ހޯދުމަށް މުހިންމު ފާލަމެކެވެ. މި އެއްބަސްވުން ރާއްޖޭން ހަދާފައި މިވަނީ މެދުއިރުމަތީގެ ހަނގުރާމައިގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު ކޮންމެ ވެސް ވަރަކަށް މަދުވެފައިވާ ދުވަސްވަރެއްގައެވެ. ޔޫއޭއީއަކީ ރާއްޖެއަށް އެންމެ ގިނައިން ޓޫރިސްޓުން އަންނަ އެއް މަގު ކަމަށްވާއިރު ހަނގުރާމައިގެ ސަބަބުން އެ ސަރަހައްދުގެ ވައިގެ ދަތުރުފަތުރަށް އަންނަ ކޮންމެ ލޮޅުމެއްގެ އަސަރު ރާއްޖޭގެ ފަތުރުވެރިކަމަށް ވަރަށް ބޮޑަށް ކުރެއެވެ.