މާލޭގެ ބައެއް ސަރަހައްދުތަކުން މިއަދު މެންދުރުފަހު ކަރަންޓުގެ ހިދުމަތް މެދުކެނޑުން އެކަށީގެންވާކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.
ސްޓެލްކޯއިން ބުނީ ކަރަންޓް ހިދުމަތް މެދުކެނޑެނީ އެ ކުންފުނީގެ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތް ކުރިއަށް ދާތީ ކަމަށެވެ.
އެގޮތުން، މިމާލެ ސިޓީ، ހީނާ ގޯޅި، ރަތްވިލާ ހިނގުން، ހިތިގަސް މަގު އަދި މޫންލައިޓް ހިނގުން ހިމެނޭ ސަރަޙައްދުންވެސް ކަރަންޓުގެ ހިދުމަތް މެދުކެނޑުން އެކަށީގެންވާ ކަމައް ސްޓެލްކޯއިން މައުލޫމާތު ދެއެވެ.
މި ސަރަހައްދުން ކަރަންޓް ކެނޑޭނެ ގަޑިއަކީ މެންދުރުފަހު 14:00 ން 16:00 އަށެވެ.
ކަރަންޓުގެ ވިއުގަ އަޕްގްރޭޑް ކުރުމުގެ މި މަސައްކަތްތަކުގެ ސަބަބުން ކަރަންޓުގެ ހިދުމަތް މެދުކެނޑިގެން ދިމާވާނެ ދަތިތަކަށް ސްޓެލްކޯއިން ވަނީ މާފަށް އެދިފައެވެ.