ދިވެހިރާއްޖޭގެ އެންމެ މުހިންމު އިގްތިސާދީ ދާއިރާތަކުގެ ތެރެއިން އެއް ދާއިރާ ކަމުގައިވާ މަސްވެރިކަމުގެ ސިނާއަތަށް އައު އުއްމީދުތަކެއް ވަނީ ލިބިފައެވެ. އަހަރުތަކެއް ކުރިން އެއްޒަމާނެއްގައި ދިވެހިން އެބަޔަކަށްޓަކައި، އެންމެ ފަހުރުވެރިވި ބަޔަކީ މަސްވެރިންނެވެ، އެމަސައްކަތަކީ ދިވެހިންގެ ކެއުމޭ، ބުއިމޭ، ނިދުމޭ، މަސްވެރިންނަކީ މިގައުމުގެ ދިވެހިންގެ ލޭނާރޭ ކިޔައި ސަނާކޮށް ތައުރީފުކުރި މަސްވެރިކަން އެހާއްސަ މަގާމުން ނެއްޓި ދިވެހިންގެ ކުރިމަތީގައި އާދައިގެ އެއްވެސް ހައިސިއްޔަތެއް ނެތް މަސައްކަތަކަށް ވެފައި އޮންނަތާ އަހަރުތަކެއް ފަހުން އުއްމީދުތައް އާލާކޮށްދީފިއެވެ. އަދުގެ ސަރުކާރުން އެހެންއެއްވެސް ސަރުކާރަކުން ވިސްނާވެސްނުލާ އޮތް އެތައް ކަމެއް ކޮށް މަސްވެރިންގެ ހަގީގީ މަގާމު އެމީހުންނަށް ހޯދައިދިނުމުގައި ކާމިޔާބު ކޮށްފިއެވެ.
ކުރީގެ ސަރުކާރުން މަސްކިރާ އަގަށް ގެނައި ބަދަލާއެކު މަސްވެރިންނަށާއި ސަރުކާރަށްވެސް ބޮޑު ބުރައަކަށްވެފައިވާކަމަށް މަސްވެރިން ވަނީ ފާހަގަކޮށްފައެވެ. މަސްކިރާފައި ވަގުތުން ފައިސާ ނުލިބުން، އައިސް ނެތުން، ތެޔޮ އަގުބޮޑުވުން ފަދަ އެތައް ކަމަކާހެދި މަސްވެރިން ވަނީ ނިމިދިޔަ ސަރުކާރާމެދު ހިތްހަމަނުޖެހުން ފާޅުކޮށްފައެވެ. ރާއްޖޭގައި ދޮށީގެ މަސްވެރިކަން ކުރާ ފަރާތްތަކުގެ އޮތް އެންމެ ބޮޑު ކަންބޮޑުވުން ކަމަށްވާ ބާނާ މަސްތައް ކިރުވައިގެން ލިބޭ ފައިސާ ލިބުމުގައި ލަސްވަމުންދިއުމަށް ދާއިމީ ހައްލެއް ހޯއްދަވައި ދެއްވުމަށް މި ސަރުކާރުން މަސްވެރިންގެ ދުވަސް ފާހަގަކުރުމަށް ބޭއްވި ގުންޒަރުގައި ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު މަސްވެރިންނަށް ވައުދުވެވަޑައިގެންނެވިއެވެ.
މަސްވެރިން ފާހަގަކުރި ގޮތުގައި މިހާތަނަށް އެއްވެސް ސަރުކާރަކުން އެންމެ އެކަށީގެންވާ ގޮތެއްގައި ހައްލުކޮށްދީފައި އޮތް މައްސަލައެއްނޫނެވެ. ދޮށީގެ މަސްވެރިކަމުގައި އެންމެ ކުރިއަރާފައި އޮތް މަޑަވެލި މަސްވެރިން އަޑުއުފުލަމުން ބުނެފައިވާގޮތުގައި މަސްވެރިން އެންމެ ބޮޑު ކަންބޮޑުވަނީ މަސްކިރާފައި ފައިސާ ލިބުން ލަސްވުމެވެ. އަދި ތެޔޮ ލިބޭނެ ފަސޭހަ އިންތިޒާމެއް ނެތުމާއި، އައިސް ލިބޭނެ ފަސޭހަ ގޮތެއް ނެތުމެވެ. މިއީ ރަށްރަށުގެ ހުރިހާ މަސްވެރިންގެވެސް ޝަކުވާއަކަށްވެފައިވާއިރު، ރާއްޖޭގެ ހުރިހާ މަސްވެރިންގެވެސް އޮތް ކަން ބޮޑުވުންތަކެކެވެ. ވަގުތުން ވަގުތަށް ހައްލު ނުކުރެވޭނެ ވަރަށް ދުވަސްވެފައި އޮތް ބޮޑު މައްސަލައެއްކަން ހުރިހާ މަސްވެރިންވެސް ގަބޫލުކުރިއެވެ.
މީގެ ކުރިން ދުވަހަކުވެސް، އެއްވެސް ސަރުކާރަކުން، އެއްވެސް ވެރިއަކުގެ ފަރާތުން މަސްވެރިންނަށް ލިބިފައި ނެތް އިއްޒަތެއް އަދުގެ ރައީސް ޑރ މުހައްމަދު މުއިއްޒު މަސްވެރިންނަށް ދެއްވިކަން މިއަދު ޝުކުރުވެރިކަމާއެކު މަސްވެރިން ފާހަގަކުރެއެވެ. ރައީސް ޑރ މުއިއްޒުގެ އިސްނެންގެވުމަކަށް މަސްވެރިންނަށް ހާއްސަ ގުންޒަރެއް ބޭއްވިއެވެ. މަސްވެރިންގެ ޝަކުވާތަށް ހުޅުވިގެން ތިބެ އެއްވެސް މެދުވެރިއެއް ނެތި، ސިޓީއެއް ނުވަތަ ދެންނެވުމަށް ވަގުތުތަކެއް ނުނަގައި ވަގުތުން ސީދާ ކުރިމަތީގައި ތިބެގެން ވާހަކަދައްކައި ޝަކުވާ ކުރާނެ ފުރުސަތު މަސްވެރިންނަށް ދިނީ އަދުގެ ރައީސް ޑރ މުއިއްޒެވެ. މަސްވެރިންގެ ގުންޒަރު ބޭއްވި ރެއަކީ، މަސްވެރިން މިހާރު އުފުލާ ތަކުލީފަށް ނިމުން ލިބިގެންދާނެ ކަމަށް މަސްވެރިންގެ އުއްމީދު އާވެއާލާ ވެގެންދިޔަ ރެއެކެވެ. އަދި މި ސަރުކާރުން މިދާއިރާ ހަރުދަނާ ކުރުމަށް މަސައްކަތްތަކެއް ފަށްޓަވާފައިވާއިރު އެކަންކަމުގެ ސަބަބުން މަސްވެރިންނަށް ލިބިފައިވަނީ ނިހާއީ ހަމަޖެހުމެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިންގެ ހައިސިއްޔަތު އަލުން ހޯދައިދިނުމަށް ކުރަމުންދާ މަސައްކަތްތަކުގެ ސަބަބުން، ކުރީގެ ސަރުކާރުތަކުގައި މަސްވެރިންނަށް ދިމާވެފައިވާ ގިނަ ދަތިތަކަކަށް ޙައްލު ލިބެމުންދާކަން ދުވަހެއް ދުވަހަކަށް މިދަނީ ކިތަންމެހާވެސް ސާފުކޮށް ހާމަވަމުން ސާބިތުވަމުންނެވެ.
މަސްވެރިންގެ އެންމެ ބޮޑު ކަންބޮޑުވުމަކަށް ވެފައިވާ، މަސް ކިރުވުމަށްފަހު ފައިސާ ލިބުމުގައި ދިމާވާ ލަސްވުމުގެ މައްސަލައަށް ޙައްލު ހޯދައިދިނުމަށް މި ސަރުކާރުން ވަނީ އަމަލީ ފިޔަވަޅުތަކެއް އަޅާފައެވެ. މިގޮތުން، ނިމިދިޔަ ސަރުކާރުން މަސްވެރިންނަށް ދޭންޖެހޭ 240 މިލިއަނަށްވުރެ ގިނަ ރުފިޔާ، މި ސަރުކާރުގެ ފުރަތަމަ 100 ދުވަހުގެ ތެރޭގައި ދައްކާ ޚަލާސްކޮށްފައިވެއެވެ. އަދި މިހާރު މަސްވެރިން މިފްކޯއަށް ކިރުވާ މަހަށް، މަސްކިރުވާތާ 2 ހަފްތާގެ ތެރޭގައި ފައިސާ ދޫކުރުމަށް ސަރުކާރުން ވަނީ ނިންމާފައެވެ.
މީގެ އިތުރުން، މަސްވެރިކަމުގެ ސިނާއަތު ތަރައްގީކުރުމަށް ސަރުކާރުން ގިނަ މަސައްކަތްތަކެއް ކުރަމުންދާކަން ފާހަގަކުރެވެއެވެ. މިގޮތުން، މަސްކިރޭނެ ފަސޭހަ އިންތިޒާމުތައް ހަމަޖެއްސުމާއި، މަސް ރައްކާކުރާނެ އިތުރު ސްޓޯރޭޖްގެ ކަންކަން ހަމަޖެއްސުމުގެ މަސައްކަތް ކުރިއަށްދާކަން ފާހަގަކުރެވެއެވެ. އަދި މަސްވެރިކަމުގެ ސިނާއަތަށް ބޭނުންވާ އެހެނިހެން ވަސީލަތްތައް، މިސާލަކަށް ތެޔޮ އަދި އައިސް ފަދަ ތަކެތި ލިބޭނެ ފަސޭހަ އިންތިޒާމުތައް ހަމަޖެއްސުމަށްވެސް މަސައްކަތްތަކެއް ކުރެވެމުންދެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަސްވެރިންނަށް ވަރަށް މުހިންމު ވައުދުތަކެއް ވެވަޑައިގެންފައެވެ. މިގޮތުން، މަހުގެ އަގު ކިލޯއަކަށް 20 ރުފިޔާއަށްވުރެ ދަށްނުކޮށް ހިފެހެއްޓުމާއި، އެއަށްވުރެ މަތީ އަގެއް ލިބޭނަމަ އެ އަގު ދިނުމަށް ވަނީ ވައުދުވެވަޑައިގެންފައެވެ.
ދެން އޮތީ މަސްވެރިންގެ ދަފުތަރުގެ ވާހަކަ، މިވެސް އެހެން ސަރުކާރަކުން ދުވަަހަކުވެސްއެކަމާމެދު ވިސްނާފައިވާ ކަމެއްވެސް ނޫނެވެ. މިއަދު މަސްވެރިންނަކީ އޮފީސްތަކުގައި ކުންފުނިތަކުގައި ރަޖިސްޓްރީވެފައި ތިބޭފަދައިން ރަޖިސްޓްރީވެެފައިވާ ބައެކެވެ. މަސްވެރިންގެ ޤައުމީ ދަފްތަރު އެކުލަވާލެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުފުޅެކެވެ.
މި ދަފްތަރުގެ ބޭނުމަކީ މަސްވެރިންނަށް މާލީ ވަސީލަތްތަކުގެ ފައިދާ ލިބިގަތުމަށް ހުރި ހުރަސްތައް ނައްތާލާ، މަސްވެރިކަމަކީވެސް ރާއްޖޭގައި ރަސްމީކޮށް ބަލައިގަންނަ ވަޒީފާއަކަށް ހެދުމެވެ. މި ދަފްތަރު މިހާރު ވަނީ އިފްތިތާޙުކޮށްފައެވެ. އަދި މިހާތަނަށް 350 އުޅަނދު މި ދަފްތަރުގައި ރަޖިސްޓްރީކުރެވިފައިވާކަން ފާހަގަކުރެވެއެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އެއްފަހަރެއްގައި ދައުލަތުގެ މީޑިޔާގައި ދެއްކެވި ވާހަކަފުޅެއްގައި ވިދާޅުވެފައިވާ ގޮތުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ދިވެހި ތާރީޚުގައި މަސްވެރި ސިނާޢަތަށް ރިޔާސީ ދައުރެއްގައި އެންމެ ބޮޑު ހިދުމަތެއް ކޮށްދެއްވާނެ ރައީސް ކަމަށެވެ. އަދި މިކަން ޔަޤީންވެގެންދަނީ ވެރިކަމުގެ ފުރަތަމަ އަހަރު އެކަނި ސިނާޢަތުގެ ތަރައްޤީއަށް ކުރައްވަން ފެއްޓެވި މުހިންމު ގިނަ މަސައްކަތްޕުޅުތަކުންނެވެ.
މަސްވެރިކަމުގެ ސިނާޢަތު ކުރިއެރުވުމަށް ސަރުކާރުން ކުރަމުންދާ މަސައްކަތްތަކުގެ ތެރޭގައި، ބޭރު ޤައުމުތަކާއެކު ގުޅުން ބަދަހިކުރުންވެސް ހިމެނެއެވެ. މިގޮތުން، ރައީސް ޑރ. މުޢިއްޒު ޗައިނާއަށް ކުރެއްވި ދަތުރުފުޅުގައިވެސް މަސްވެރިކަމުގެ ސިނާޢަތު ކުރިއެރުވުމާ ގުޅޭގޮތުން މަޝްވަރާތައް ކުރައްވާފައިވާކަން ފާހަގަކުރެވެއެވެ.
މި ސަރުކާރުގެ އަމާޒަކީ ހަމައެކަނި ދޮށީގެ މަސްވެރިކަމަށް އެކަނި ނޫނެވެ. ފާނައިގެ މަސްވެރިކަން ފަދަ ފަރުމަސްވެރިކަމުގެ ބާވަތްތަކާއި، ރެކްރިއޭޝަނަލް ފިޝިންގ އަދި ސްޕޯޓްސް ފިޝިންގ ފަދަ ހަރަކާތްތަކުގެ މަޢުލޫމާތުވެސް ފުރިހަމަ ގޮތެއްގައި ނެގޭނެ އިންތިޒާމު ހަމަޖެއްސުމަށް ވަނީ ވައުދުވެފައެވެ.
ޖުމްލަ ގޮތެއްގައި ބަލާއިރު، މި ސަރުކާރުން މަސްވެރިކަމުގެ ސިނާޢަތަށް ދެއްވާ އަހައްމިއްޔަތުކަން ވަރަށް ބޮޑުކަން ފާހަގަކުރެވެއެވެ. މަސްވެރިންގެ ނެތިފައި އޮތް ހައިސިއްޔަތު އަލުން ހޯދައިދީ، މަސްވެރިންނަކީވެސް މުޖުތަމަޢުގެ އެހެނިހެން ވަޒީފާތަކުގައި އުޅޭ މީހުންނާ އެއްހަމައެއްގެ ބަޔަކަށް ހެދުމަށް މި ސަރުކާރުން ކުރަމުންދާ މަސައްކަތްތަކުން ވަނީ ކާމިޔާބީތަކެއް ހޯދާފައެވެ.
މަސްވެރިންގެ ފަރާތުން މި ބަދަލުތަކާމެދު ފާޅުކުރާ ޝުޢޫރުތައްވެސް ވަރަށް އުފާވެރިކަން ފާހަގަކުރެވެއެވެ. ގިނަ މަސްވެރިން ފާހަގަކުރާ ގޮތުގައި، މިހާތަނަށް އެއްވެސް ސަރުކާރަކުން މަސްވެރިންގެ މައްސަލަތަކަށް މިހާ އެކަށީގެންވާ ގޮތެއްގައި ޙައްލު ހޯދައިދީފައެއް ނުވެއެވެ. ނަމަވެސް މި ސަރުކާރުން ގެންނަމުންދާ ބަދަލުތަކާއެކު، ކޮންމެވެސް ވަރެއްގެ އުންމީދެއް އުފެދިފައިވާކަން މަސްވެރިން ފާހަގަކުރެއެވެ.
މި ސަރުކާރުގެ މެނިފެސްޓޯގައި ހިމެނޭ މަސްވެރިކަމާ ގުޅޭ ގިނަ ވައުދުތަކެއް ތަންފީޒު ކުރުމުގެ މަސައްކަތް ފެށިފައިވާކަން ފާހަގަކުރެވެއެވެ. މީގެ ތެރޭގައި މަސްކިރޭނެ ފަސޭހަ އިންތިޒާމުތައް ހަމަޖެއްސުމާއި، މަސް ރައްކާކުރާނެ އިތުރު ސްޓޯރޭޖްގެ ކަންކަން ހަމަޖެއްސުން ހިމެނެއެވެ. މި މަސައްކަތްތަކުގެ ސަބަބުން މަސްވެރިކަމުގެ ސިނާޢަތަށް އިތުރު ކުރިއެރުންތަކެއް ލިބިގެންދާނެކަމަށް އުންމީދުކުރެވެއެވެ.
މި ސަރުކާރުން މަސްވެރިކަމުގެ ސިނާޢަތަށް ގެނެސްދޭ ބަދަލުތަކަކީ ވަރަށް މުހިންމު އަދި ފާހަގަކޮށްލެވޭ ބަދަލުތަކެކެވެ. މަސްވެރިންގެ ގެއްލިފައިވާ ހައިސިއްޔަތު އަލުން ހޯދައިދިނުމަށާއި، މަސްވެރިކަމުގެ ސިނާޢަތު ކުރިއެރުވުމަށް މި ސަރުކާރުން ކުރަމުންދާ މަސައްކަތްތަކުގެ ސަބަބުން، ދިވެހިރާއްޖޭގެ މަސްވެރިކަމުގެ ސިނާޢަތަށް އައު ފުރުސަތުތަކަކާއި އުންމީދުތަކެއް ލިބިގެންދާނެކަން ކަށަވަރެވެ. މިއީ ހަމައެކަނި މަސްވެރިންނަށް އެކަންޏެއް ނޫނެވެ. މުޅި ގައުމުގެ އިގުތިސާދަށްވެސް ވަރަށް ބޮޑު ކުރިއެރުމެއް ލިބިގެންދާނެ ކަމެކެވެ.