މިނިވަން ތަހުގީގަކަށް ފުރުޞަތުދެއްވުމަށް، ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރުކަމުގެ މަޤާމުން އިބްރާހީމް ފަޒުލް ރަޝީދު އިސްތިއުފާދެއްވައިފިއެވެ. އޭނާ އެމަޤާމުން އިސްތިއުފާދެއްވާފައި މިވަނީ، ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ތުހުމަތުކުރެވޭ މައްސަލަ ފުލުހުންނާއި ކަމާގުޅުންހުރި ފަރާތްތަކުން ތަހުގީގްކުރަމުން ދަނިކޮށެވެ.
އެޗްޑީސީގެ މެނޭޖިންގ ޑިރެކްޓަރުގެ މަޤާމުން އިސްތިއުފާދެއްވައި، ރައީސުލްޖުމްހޫރިއްޔާއަށް ފަޒުލް ފޮނުވި ސިޓީގައި ވަނީ އެމަޤާމުގައި އޭނާ ހޭދަކުރެއްވި މުއްދަތުގައި، އެކި ގޮތްގޮތުން ކޮށްފައިވާ އަދި މިހާރު އެކިއެކި ޕްލެޓްފޯމުތަކުގައި ކުރަމުންދާ ތުހުމަތުތަކަށް އިންކާރުކުރައްވާކަމަށެވެ. އެޗްޑީސީގެ މެނޭޖިން ޑިރެކްޓަރުކަމަށް އައްޔަންކުރެއްވުމަށްފަހު، ކުންފުނީގެ ފަރާތުން މިހާތަނަށް ކޮށްފައިވާ އެންމެހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ކުންފުނީގެ ޕޮލިސީތަކުގެ އިމުގެ ތެރެއިން ކުންފުނީގެ މަސްލަހަތު އިސްކޮށް ކޮށްފައިވާ މުއާމަލާތްތަކެއްކަމަށްވެސް ފަޒުލް ވަނީ ވިދާޅުވެފައެވެ.
ބިންވެރިޔާ ސްކީމާ ގުޅިގެން އެޗްޑީސީއަށް އަމާޒުވެފައިވާ ތުހުމަތުތަކަކީ އެކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫންކަމަށާއި، އެ ތުހުމަތުތަކުގެ ހަގީގަތް ވީއެންމެ އަވަސް ފުރުޞަތެއްގައި ރައްޔިތުންނަށް ހާމަވުމަށް އެދިވަޑައިގަންނަވާކަމަށްވެސް ރައީސުލްޖުމްހޫރިއްޔާއަށް ފޮނުއްވި އިސްތިއުފާގެ ސިޓީގައިވެއެވެ. އަދި މިކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮތުމަށް ނޭދޭކަމަށްވެސް ފަޒުލް ވަނީ ވިދާޅުވެފައެވެ.
އެހެންކަމުން އެޗްޑީސީގެ މެނޭޖިންގ ޑިރެކްޓަރުގެ މަޤާމުން އިސްތިއުފާދެއްވީ ބިންވެރިޔާ ސްކީމާގުޅިގެން މިހާރު ކުރިއަށްދާ ތަހުގީގަށް ފުރުޞަތު ދިނުމަށާއި، ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުޞަތު ދެއްވުމުގެ ގޮތުންކަމަށްވެސް ފަޒުލް ވަނީ ވިދާޅުވެފައެވެ.
"އަޅުގަނޑު އެދެނީ މަނިކުފާނަށާއި ސަރުކާރަށް ކާމިޔާބު ދުވަސްތަކަކަށެވެ." ފަޒުލްގެ އިސްތިއުފާގެ ސިޓީގައިވެއެވެ.
ފަޒުލް އިސްތިއުފާދެއްވާފައި މިވަނީ އޭނާވެސް ހިމެނޭހެން އެޗްޑީސީގެ ޑިރެކްޓަރުންގެ ބޯޑު އެއްކޮށް ޕީސީބީން ސަސްޕެންޑުކޮށްފައިވަނިކޮށެވެ.