މި އަހަރުގެ ރިޔާސީ އިންތިހާބުގައި ޕީޕީއެމްގެ ޓިކެޓް ދޭނެ ފަރާތެއް ހޮވުމަށް ބާއްވާ ޕްރައިމަރީ އަބްދުﷲ ޔާމީން ކާމިޔާބު ކުރައްވައިފި ނަމަ ފެންނާނީ "ޔާމީން އެކަނިމާ އެކަނި ދަތުރުކުރައްވައިގެން" އެ ޕާޓީ ފެއިލްވާ މަންޒަރު ކަމަށް ޔާމީންގެ ވާދަވެރިޔާ އުމަރު ނަސީރު ރޭ ވިދާޅުވެއްޖެ އެވެ.
ދިޓީވީގެ "ހަބަރު ތެރެއިން" ޕްރޮގްރާމްގައި ވާހަކަ ދައްކަވަމުން އުމަރު ތަކުރާރުކޮށް ވިދާޅުވަމުން ގެންދެވީ ޕްރައިމަރީން ޔާމީނަށް ކާމިޔާބު ލިބިވަޑައިގެންފި ނަމަ ކޯލިޝަން ހެދުމުގެ ފުރުސަތު ގެއްލޭނެ ކަމަށެވެ. އޭނާ ވިދާޅުވީ ރައްޔިތުންގެ މަޖިލީހުގެ މުލަކު ދާއިރާގެ މެންބަރު ޔާމީން ވަނީ ޖުމްހޫރީ ޕާޓީގެ ލީޑަރު ގާސިމް އިބްރާހީމަށް ވެސް "ވަރަށް ވަރުގަދަ ހަމަލާތަކެއް ދެއްވާފައި" ކަމަށާއި ވަރަށް ޒަމާންވީ ދެކޮޅުވެރިކަމެއް އެ ދެ ބޭފުޅުންގެ ދޭތެރޭގައި އޮންނަ ކަމަށެވެ.
"ޔާމީން އާއި ގާސިމްއާ ދޭތެރޭގައި އޮތް ކަންތައްތަކަކީ އަޅުގަނޑަށް ހީވަނީ މުޅި ދިވެހިރާއްޖޭގެ ސިޔާސީ މައިދާނުގައި ތިބި ހުރިހާ އެންމެންނަށް ވެސް އެނގޭ ކަންކަންހެން. ދެން [ރައީސް] ވަހީދާއި ޔާމީނާ ދޭތެރޭގައި ވަރަށް ބޮޑެތި ކަންތައްތައް އުފެދި، ޔާމީން އެކިއެކި ޕޯޑިއަމްތަކުގައި ވަހީދަށް އެކިއެކި ބަހުގެ ހަމަލާ ދެއްވައި ހައްދަވާފައި އޮތީމާ އަޅުގަނޑަކަށް ހިއެއް ނުވޭ ވަހީދު އެއްވެސް ހާލެއްގައި ޔާމީން ހުންނަވާ ތަނަކަށް ވަޑައިގެންފާނެހެން،" އުމަރު ވިދާޅުވި އެވެ. "އެހެންވީމާ އަޅުގަނޑު މި ދަންނަވަނީ ޕީޕީއެމްގެ ޕްރައިމަރީ މިއީ ވަރަށް މުހިންމު ޕްރައިމަރީއެކޭ 2013 ޝޭޕްކުރުމަށްޓަކައި."
އުމަރު ވިދާޅުވީ ޕްރައިމަރީގައި އޭނާ ހޮވައިފި ނަމަ ފުޅާ ކޯލިޝަނެއްގެ ތެރެއިން އެމްޑީޕީ ބަލިކޮށް ރައީސުލްޖުމްހޫރިއްޔާގެ މަގާމު ކާމިޔާބު ކުރައްވާނެ ކަމަށެވެ.
އުމަރު ވިދާޅުވީ އޭނާގެ ޓީމުގެ މީހުންގެ "ހިތް ވަރަށް ބޮޑުވާނެ" ކަމަށާއި ރިޔާސީ އިންތިހާބު ޕީޕީއެމަށް އެކަނި ކާމިޔާބު ނުކުރެވޭނެ ކަމަށެވެ. އަދި ޑީއާރުޕީ ވެރިކަމުގައި އޮތް ދުވަސްވަރު އެ ޕާޓީގެ "ބުރަކައްޓަށް ވަޅި ހެރުމަށް ފަހު" އަނބުރާ ޕީޕީއެމަށް އަންނަ މީހުން ވެސް ބޭނުންވާ ކަމަށް އޭނާ ވިދާޅުވި އެވެ.
އުމަރު ވިދާޅުވީ މި މަހުގެ 30 ގައި ބާއްވާ ޕްރައިމަރީ އިންސާފުވެރިކަމާ އެކު ކުރިއަށް ގެންގޮސްފި ނަމަ އެ ޕާޓީ ބައިބައި ނުވާނެ ކަމަށެވެ. އޭނާ ވިދާޅުވީ ވާދަވެރި ޕްރައިމަރީއެއް ވެސް ބާއްވާ ހަމައެކަނި ޕާޓީ އަކީ ޕީޕީއެމް ކަމަށެވެ.
"އަޅުގަނޑު ބަލިވިޔަސް އަޅުގަނޑު ހުންނާނީ ޔާމީންގެ ފަހަތުގައި. އަޅުގަނޑު މޮޅުވިޔަސް ޔާމީން ހުންނަވާނީ އަޅުގަނޑުގެ ފަހަތުގައި. މިއީ ހަމަޖެހިފައި އޮތް ކަމެއް. މި ޕާޓީ ބައިބައި ނުވާނެ އިރާދަކުރެއްވިއްޔާ،" އުމަރު ވިދާޅުވި އެވެ.
އޭނާ ވިދާޅުވީ ރިޔާސީ އިންތިހާބަށް ކޯލިޝަނަކަށް އެއްބަސް ނުވެވުނަސް އެމްޑީޕީގެ ރިޔާސީ ކެންޑިޑޭޓް ކުރީގެ ރައީސް މުހަންމަދު ނަޝީދަށް އަލުން ވެރިކަން ލިބިވަޑައިގަންނަވާނެ މަންޒަރެއް ފެނިވަޑައިނުގަންނަވާ ކަމަށެވެ. އެކަމަކު ކޯލިޝަނަކަށް އެއްބަސްވެވިއްޖެ ނަމަ މިހާރު ސަރުކާރު ފަޅީގައި ތިބި މީހުންނަށް ލިބޭ ޔަގީންކަން ބޮޑުވާނެ ކަމަށް އުމަރު ވިދާޅުވި އެވެ.
"އެހެންވީމާ އަޅުގަނޑުމެންގެ ހިތް އެބަ ޖެހޭ ބޮޑުވާން. ހިތް ބޮޑުވުން އެއީ އަޅުގަނޑުމެން ބޮޑާވާން ޖެހޭ ސަބަބެއް ނޫން. އަޅުގަނޑުމެން ބޮޑުވުން އެއީ އަޅުގަނޑުމެންގެ އަތް އެހެން ޕާޓީތަކާ ދިމާލަށް ދިއްކޮށް އެހެން މީހުންގެ އަތުގައި ހިފަން ޖެހޭ ސަބަބު. އަޅުގަނޑަށް މި ޓިކެޓް ލިބިއްޖިއްޔާ އަޅުގަނޑު އެހެން ޕާޓީތަކަށް އަތް ދިއްކުރާނަން. އެ މީހުންގެ އަތުގައި ހިފާނަން. ފުރަތަމަ ބުރުގައި ފުޅާ ކޯލިޝަނެއް އުފެއްދޭތޯ ކުރެވުނު ހުރިހާ މަސައްކަތެއް ކުރާނަން. އަދި އަޅުގަނޑަށް ޔަގީންކަން އެބަ އޮތް، މިހާރު ވެސް މި ދަންނަވަނީ ފުޅާ ކޯލިޝަނެއް ފުރަތަމަ ބުރުން އުފެއްދޭނެ،" އުމަރު ވިދާޅުވި އެވެ.
ޔާމީނަށް ޕްރައިމަރީ ކާމިޔާބު ކުރެވިއްޖެ ނަމަ ކޯލިޝަން ހެދުމުގެ ފުރުސަތު ގެއްލޭނެ ކަމަށް އުމަރު ވިދާޅުވި ނަމަވެސް ޔާމީން ރޭ އާޓިފިޝަލް ބީޗްގައި ބޭއްވި ޖަލްސާގައި ވިދާޅުވީ އެހެން ޕާޓީތަކަށް މަރުހަބާ ކިޔާ ކަމަށެވެ. ޔާމީން ވިދާޅުވީ ރައްޔިތުންގެ ހައްގުގައި މަސައްކަތް ކުރަންޏާ އެންމެން "އެއް އޮޑިއަކަށް" އަރަން ކެރެންވާނެ ކަމަށެވެ. އަދި އެކަމަށް ތަކުރާރުކޮށް ޔާމީން ގޮވާލެއްވި އެވެ.
"މި ޕޯޑިއަމް ކައިރިއަށް ވަޑައިގަންނަވާ. އަޅުގަނޑުމެންނާ ބައިއަތު ހިއްޕަވާ. އަޅުގަނޑުމެންގެ ފަހަތަކަށް ވަޑައިގަންނަވާކަށް ނުޖެހޭނެ ކޮންމެވެސް ބޭފުޅަކު ވިދާޅުވިހެން. އަޅުގަނޑުމެންގެ ފަހަތަކަށް ނޫން ތި ވަޑައިގަންނަވަނީ. އަޅުގަނޑުމެންނާ އެއްވަރުގެ ބައިވެރިންގެ ގޮތަށް އަޅުގަނޑުމެންނާ ގުޅިގެން ދިވެހި ރައްޔިތުން މިހާރު މި ބަރުދާސްތުކުރާ ހިތްދަތިކަމުން ދިވެހި ރައްޔިތުން ސަލާމަތް ކުރުމަށްޓަކައި ހަމައެކަނި އޮތް އެންމެ ވަރުގަދަ ޕާޓީއަކީ ޕީޕީއެމް ކަމަށް ވާތީ އަޅުގަނޑުމެން އިސްވެ ދައުވަތު މި އަރުވަނީ. އެއީ އެއްގޮތަކަށް ވެސް އަޅުގަނޑުމެންނާ އެކު ކޯލިޝަން ހަދާ އެހެން ޕާޓީތައް ކުޑަވެގެން، އެހެން ޕާޓީތަކުގެ ހައިބަތު ނެތިގެން އެ ބޭފުޅުންނަކީ އަޅުގަނޑުމެންނަށް ވުރެ އާދައިގެ ފެންވަރެއްގައި، އެ ބޭފުޅުންނާ ދޭތެރޭގައި އަޅުގަނޑުމެން މުއާމަލާތުކޮށް ވިސްނާނެ ބަޔަކަށް ވާތީކީ ނޫން،" ޔާމީން ވިދާޅުވި އެވެ.
އޭނާ ވިދާޅުވީ އޭނާ އަށް ޕީޕީއެމްގެ ރިޔާސީ ޓިކެޓް ލިބިވަޑައިގަތަސް އެ ޓިކެޓް އެހެން މީހަކަށް ދިނުމުގެ އިހުތިޔާރު އެ ޕާޓީގެ އަސާސީ ގަވާއިދު ބުނާ ގޮތުން ލިބިވަޑައިނުގަންނަވާ ކަމަށެވެ. ޔާމީން ވިދާޅުވީ "ދެވަނަ ބޭފުޅެއްގެ ފަހަތަށް އަޅުގަނޑު ނުދާނަން" ކަމަށާއި އެ ހިތްވަރާއި އެ އަޒުމާއި ސާބިތުކަމާއި ތަޖުރިބާ އެބަހުރި ކަމަށެވެ.
އުމަރު ވިދާޅުވީ ޕީޕީއެމްގެ ޕާލަމެންޓްރީ ގުރޫޕުގެ އަޣުލަބިއްޔަތު ޔާމީންގެ ފަޅީގައި އޮތަސް ޕްރައިމަރީ ކާމިޔާބު ކުރައްވާނެ ކަމަށެވެ. އަދި އޭނާ ވިދާޅުވީ ޕީޕީއެމްގެ ޕްރައިމަރީ ކާމިޔާބު ކުރައްވާ ބޭފުޅަކު ބޭނުންވާ ވައްތަރެއްގެ ކޯލިޝަންގެ މޮޑެލް ކައުންސިލަށް ހުށަހަޅައި އެ ކޯލިޝަނަކަށް ވަޑައިގެންނެވުމުގެ ފުރުސަތު އޮންނާނެ ކަމަށެވެ. ޕްރައިމަރީގައި ވޯޓުން ހޮވިވަޑައިގަންނަވާ ކެންޑިޑޭޓަކު ރިޔާސީ ޓިކެޓް ދޫކޮށްލައްވާނީ ކިހިނެއްތޯ ޕްރެޒެންޓަރު ސުވާލު ދެންނެވުމުން އުމަރު ވިދާޅުވީ ޓިކެޓް ދޫކޮށްލަން ޖެހިއްޖެ ނަމަ އެކަން ކުރެއްވޭނެ ބައިވަރު ގޮތްތައް ހުންނާނެ ކަމަށެވެ. އަދި އެކަމުގައި އެއްވެސް ގޮތެއް ބަންދު ނުވާނެ ކަމަށާއި ޔާމީނާއި އޭނާއާ ހުރި ތަފާތަކީ އެއީ ކަމަށް އުމަރު ވިދާޅުވި އެވެ.
އުމަރު ވިދާޅުވީ ރިޔާސީ ކެންޑިޑޭޓެއްގެ ގޮތުގައި ވެސް އަދި ރަނިން މޭޓެއްގެ ގޮތުގައި ވެސް އޭނާ ފެނިދާނެ ކަމަށެވެ.