ރާއްޖެއިން އެންމެ ގިނައިން މީހުން މަރުވަނީ ގައިންގަޔަށް ނާރާ ބަލިތަކުގަައި ކަމަށާއި އަލަށް ހުޅުވޭ އައުޓްޑޯ ޖިމަކީ މިކަމުން ސަލާމަތްވުމަށް އެޅޭ ވަރަށް މުހިންމު ފިޔަވަޅެއް ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
ފަސް ރަށެއްގައި އައުޓްޑޯ ޖިމް ހަދަން ބޭނުންވާ ސާމާނު ޔޫތު މިނިސްޓްރީއާ ހަވާލުކުރުމަށް ހެލްތު މިނިސްޓްރީގައި މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ހެލްތު މިނިސްޓަރު އަބްދުﷲ އަމީން ވިދާޅުވީ ގާތްގަނޑަކަށް 80 އިންސައްތައަށް ވުރެ މަތީ އަދަދެއްގެ މީހުން ދުނިޔެ ދޫކޮށް ދަނީ ގައިންގަޔަށް ނާރާ ބަލިތަކުގެ ސަބަބުން ކަމަށެވެ.
އެހެންކަމުން މިކަމުން ސަލާމާތްވާން ގިނަ މަސައްކަތްތަކެއް ކުރަންޖެހޭ ކަމަށާއި އައުޓްޑޯ ޖިމަކީ މިފަދަ ބަލިތަކުން ސަލާމަތްވުމަށް އެޅޭ މުހިންމު ފިޔަވަޅެއް ކަމަށެވެ.
މިނިސްޓަރު އަމީން ވަނީ އަލަށް ގާއިމުކުރާ އައުޓްޑޯ ޖިމްތަކުގެ ބޭނުން އެންމެ އެދެވޭ ގޮތުގައި ހިފުމަށް އެދިވަޑައިގެންފައެވެ.
އަމީން ވިދާޅުވީ ރާއްޖޭގެ ރަށްރަށުގައި އައުޓްޑޯ ޖިމް ތަރައްގީ ކުރުމުގައި ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން އަބަދުވެސް ވަރަށް ބޮޑަށް އެހީތެރިކަން ފޯރުކޮށްދޭ ކަމަށެވެ. އަދި އެޖިމްތަކުގެ ފައިދާވެސް ދަނީ ފެންނަމުންކަން މިނިސްޓަރު ފާހަގަކުރެއްވިއެވެ.