މެސީގެ ތާރީޚީ ރެކޯޑްތަކުން ފީފާ ވަރލްޑްކަޕް 2026 ގައި ޗެމްޕިއަން އާޖެންޓީނާއިން ތިން ލަނޑުގެ ފެށުމެއް ހޯދައިފިއެވެ.
މެޗުގައި އަޖެންޓީނާގެ ތިން ލަނޑުވެސް ޖެހީ ކެޕްޓަން މެސީއެވެ. ގައުމީ ޓީމަށް ކުޅުނު 200 ވަނަ މެޗުގައި ޖެހި ތިން ލަނޑު ވެގެންގޮސްފައިވަނީ ވަރލްޑްކަޕްގައި މެސީގެ ފުރަތަމަ ހެޓްރިކަށެވެ. އަދި ވަރލްޑްކަޕްގެ ތާރީޚުގައި އެންމެ ގިނަ ލަނޑު ޖަހައިގެން ލިސްޓްގެ ކުރީގައި އޮތް ޖަރުމަނުގެ މިރޮސްލާވް ކްލޯސާގެ ރެކޯޑާވެސް މެސީ ވަނީ އަރާ ހަމަކޮށްފައެވެ. އެއީ 16 ލަނޑު ހަމަކޮށްގެންނެވެ.
މީގެއިތުރުން ހަވަނަ ވަރލްޑްކަޕެއްގައި ކުޅުނު ފުރަތަމަ ކުޅުންތެރިޔާގެ ޝަރަފްވެސް މެސީއަށް ވަނީ ލިބިފައެވެ. މިޝަރަފް ލިބުނީ ގައުމީ ޖަރޒީގައި ކުޅުނު 200 ވަނަ މެޗުގައެވެ. މިރޭ ޕޯޗްގަލް ކުޅޭ މެޗުން ރޮނަލްޑޯއަށްވެސް އެޝަރަފް ލިބޭނެއެވެ.