ޓޫރިސްޓުންގެ މެދުގައި މަގުބޫލު، އިންޑިއާގެ ބާރުގެ ދަށުގައި އޮންނަ ކަޝްމީރުގެ ހިމާލަޔަން ސަރަހައްދުގައި ހަތިޔާރު އެޅި ބަޔަކު 26 މީހުން މަރާލިތާ އެއް ދުވަސް ފަހުން އިންޑިއާއިން ޕާކިސްތާނަށް އަމާޒުކޮށް ފިޔަވަޅުތަކެއް އަޅަން ނިންމައިފަ އެވެ.
އޭގެ ތެރޭގައި ދެ ގައުމު ގުޅުވައިދޭ މައި ބޯޑަރު ބަންދުކުރުމާއި ފެން ހިއްސާ ކުރުމުގެ ތާރީހީ މުއާހަދާއެއް މެދުކަނޑާލުމާއި ޑިޕްލޮމެޓުން ބޭރުކުރުމާއި ޕާކިސްތާނުގެ ބައެއް މީހުންގެ ވިސާ ކެންސަލްކޮށް 48 ގަޑިއިރުގެ ތެރޭގައި ފުރައިގެން ދިއުމަށް އަމުރުކުރުން ހިމެނެ އެވެ.
ޕާކިސްތާނުގެ ހާރިޖީ ވަޒީރު ވިދާޅުވީ މިއަދު ޕާކިސްތާނުގެ އޮފިޝަލުން އިންޑިއާގެ އޮފިޝަލުންނާ ބައްދަލުކޮށް ޖަވާބެއް ހޯދުމަށް މަސައްކަތް ކުރަމުން އަންނަ ކަމަށެވެ. ޕާކިސްތާނުން ވަނީ އެ ތުހުމަތުތަކަށް އިންކާރުކޮށްފަ އެވެ.
ޕަހަލްގަމްގައި ދިން ހަމަލާއަކީ ހަމަނުޖެހުން އުފެދިފައިވާ ސަރަހައްދަށް ފަހުގެ ތާރީހުގައި ދިން އެންމެ ނުރައްކާތެރި ހަމަލާ އެވެ. އެއާ އެކު މިހާރު ވެސް ގުޅުން ގޯސް ދެ ގައުމުގެ ގުޅުން އިތުރަށް ގޯސްވާނެ ކަމެކެވެ.
އިންޑިއާ އާއި ޕާކިސްތާނާ ދެ ގައުމުން ވެސް ކަޝްމީރުގެ މިލްކުވެރިކަމުގެ މައްޗަށް ދައުވާކުރެ އެވެ. ނަމަވެސް ދެ ގައުމުން ކޮންޓްރޯލް ކުރަނީ އެއް ބަޔެވެ. އިންޑިއާ ބައިބައިވެ، 1947 ވަނަ އަހަރު ޕާކިސްތާން އުފެދުނު ފަހުން ނިއުކްލިއާ ހަތިޔާރު ލިބިފައިވާ އަވަށްޓެރި ދެ ގައުމުން ވަނީ އެ ސަރަހައްދުގެ މައްޗަށް ހަނގުރާމަތައް ކޮށްފަ އެވެ.
މި ހަމަލާއަށް އިންޑިއާ ސަރުކާރުން ވަނީ ނުރުހުން ފާޅުކޮށް ޕާކިސްތާނުން ނުސީދާ ގޮތެއްގައި ޒިންމާ ނަގަން ޖެހޭ ކަމުގެ އިޝާރާތްކޮށްފަ އެވެ. އިސްލާމްއާބާދުގެ އެކި ސަރުކާރުތަކުން އެ ސަރަހައްދުގެ ހަތިޔާރު އެޅި ޖަމާއަތްތަކަށް ތާއީދުކޮށް ހިތްވަރުދޭ ކަމަށް އިންޑިއާއިން އަންނަނީ ޒަމާނުއްސުރެ ތުހުމަތު ކުރަމުންނެވެ. ނަމަވެސް ޕާކިސްތާނުން އެ ތުހުމަތުތައް ދޮގު ކުރެ އެވެ.
އިންޑިއާގެ ބޮޑުވަޒީރު ނެރެންދުރަ މޯދީ ވިދާޅުވީ އެ "އަނިޔާވެރި އަމަލުގެ ފަހަތުގައި ތިބި މީހުން އިންސާފުގެ ކުރިމައްޗަށް ގެންނާނެ" ކަމަށާއި ޓެރަރިޒަމާ ދެކޮޅަށް ހުއްޓުމެއް ނެތި މަސައްކަތް ކުރައްވާނެ ކަމަށެވެ.
މީގެ އިތުރުން، 1960 ވަނަ އަހަރުން ފެށިގެން އަމަލުކުރަމުން އަންނަ އިންޑަސް ވޯޓާ ޓްރީޓީ ސަސްޕެންޑް ކުރާނެ ކަމަށް އިންޑިއާއިން ވަނީ ބުނެފަ އެވެ.
އެ މުއާހަދާގެ ދަށުން އިރުމަތީ ކޯރުތަކުގެ ކޮންޓްރޯލް އިންޑިއާއަށް ލިބޭއިރު، ޕާކިސްތާނަށް ހުޅަނގުގެ ކޯރުތަކާއި އިންޑަސް ކޯރާއި އެ ކޯރުތަކުގެ ކޮންޓްރޯލް ލިބިގެންދެ އެވެ. އެ އެއްބަސްވުމުގައި ބުނެފައި ވަނީ ހުޅަނގުގެ ކޯރުތަކުގެ ފެން މަދު ހާލަތްތަކެއްގައި މެނުވީ ޕާކިސްތާނަށް ދެމިގެން ދިއުމުގެ ފުރުސަތު އިންޑިއާއިން ދޭނެ ކަމަށެވެ.
އެ ހަމަލާގެ ފަހަތުގައި ވަނީ ކަޝްމީރު ރެސިސްޓެންސް ނަމަކަށް ކިޔާ ޖަމާއަތެއް ކަމަށް އިންޑިއާގެ ސަލާމަތީ އިދާރާތަކުން ގަބޫލުކުރެ އެވެ.
ޕާކިސްތާނުގެ ސަރުކާރުން ބުނީ އެ ގައުމުގެ ގައުމީ ސަލާމަތާ ބެހޭ މަޖިލީހުގެ ބައްދަލުވުން މިއަދު ބާއްވާނެ ކަމަށެވެ.