އެމެރިކާގެ ރައީސް ޑޮނަލްޑް ޓްރަމްޕް ޓައިމް މަޖައްލާއަށް ދެއްވި އިންޓަވިއުއެއްގައި ވިދާޅުވިގޮތުގައި އީރާނުގެ ސްޕްރީމް ލީޑަރު އާޔަތުﷲ އަލީ ޚަމެނެއީއާ ބައްދަލުކުރެއްވުމަށް އެދިވަޑައިގަންނަވާ ކަމަށާއި ދެ ގައުމުން ނިއުކްލިއަ ޕްރޮގްރާމާ ގުޅޭ އާ އެއްބަސްވުމަކަށް ވާސިލުވާނެ ކަމަށް ގަބޫލުކުރައްވާ ކަމަށެވެ.
އޮމާންގައި ހޮނިހިރު ދުވަހު ޓެކްނިކަލް ބައްދަލުވުންތައް ހިނގަމުން އެބަދެ އެވެ. އޮމާނަކީ މިދެ ގައުމު ދެމެދު މެދުވެރިއެއްގެ ގޮތުގައި މަސައްކަތްކުރާ ގައުމެކެވެ. އަދި މިއަދު ނިއުކްލިއަ މަޝްވަރާތަކުގެ ތިންވަނަ ބުރުގެ ކުރިއަށްދިއުމަށް ހަމަޖެހިފައިވެ އެވެ.
އީރާނުގެ ސްޓޫޑެންޓްސް ނިއުސް އޭޖެންސީ (އިސްނާ) އިން ބުނެފައިވަނީ މަޝްވަރާތައް ހޮނިހިރު ދުވަހަށްވުރެ ދިގުލައިގެން ދިއުމަކީ އެކަށީގެންވާ ކަމެއް ކަމަށެވެ. މަޝްވަރާތަކުގައި ދެ ފަރާތުން ވާހަކަދައްކާ އެއްބަސްވުމަކަށް ވާސިލުވުމަށް މަސައްކަތްކުރާނެ އެވެ.
އެޕްރީލް 22 ގައި ޓްރަމްޕް ޓައިމް މަޖައްލާއަށް ދެއްވި އިންޓަވިއުގައި ވިދާޅުވެފައިވަނީ، "އަޅުގަނޑުމެން އީރާނާއެކު އެއްބަސްވުމަކަށް ވާސިލުވާނެ" ކަމަށެވެ. އެމެރިކާއާއި އީރާނާ ދެމެދު ސީދާ ނޫން ގޮތަކަށް ހިނގި މަޝްވަރާތަކުގައި ދެ ފަރާތުން އެއްބަސްވުމުގެ އޮނިގަނޑެއް އެކުލަވާލުމަށް އެއްބަސްވެފައިވެ އެވެ.
އެހެންނަމަވެސް އިޒްރޭލް އީރާނާ ދެކޮޅަށް ހަނގުރާމައަކަށް ގޮސްފިނަމަ އެމެރިކާ އެކަމުގައި ބައިވެރިވާނެތޯ އެހުމުން ޓްރަމްޕް ވިދާޅުވީ: "އެއްބަސްވުމަކަށް ނާދެވިއްޖެނަމަ، އަޅުގަނޑު ވަރަށް އެދިގެން އެކަމުގައި ބައިވެރިވާނަން. އެއްބަސްވުމަކަށް ނާދެވިއްޖެނަމަ، އަޅުގަނޑު އެންމެ ކުރީ ސަފުގައި ހުންނާނަން."
ހުކުރު ދުވަހު ވައިޓް ހައުސްގައި ނޫސްވެރިންނާ ވާހަކަދައްކަވަމުން ރައީސް ޓްރަމްޕް ވިދާޅުވީ މަޝްވަރާތައް "ވަރަށް ރަނގަޅަށް" ކުރިއަށްދާ ކަމަށެވެ. "ކިހިނެއްތޯ ވާނީ ބަލަމާ" އެމަނިކުފާނު ވިދާޅުވިއެވެ.
އެމެރިކާގެ އިސް ބޭފުޅަކު ވިދާޅުވެފައިވަނީ މިހާތަނަށް މަޝްވަރާތަކުން "ވަރަށް ރަނގަޅު ކުރިއެރުމެއް" ލިބިފައިވާ ކަމަށެވެ.
އީރާނުގެ ރައީސް މަސޫދް ޕެޒެޝްކިއަން ނުވަތަ އާޔަތުﷲ އަލީ ޚަމެނެއީއާ ބައްދަލުކުރަން ބޭނުންފުޅުތޯ ޓައިމް މަޖައްލާއިން އެހުމުން ޓްރަމްޕް ޖަވާބުދެއްވީ "ހަމަ ޔަގީނުންވެސް" އެވެ.
ހޮނިހިރު ދުވަހުގެ މަޝްވަރާތަކަކީ މިހާތަނަށް އެންމެ ބޮޑު މަޝްވަރާތަކެވެ. މި މަޝްވަރާތަކުގައި ދެ ފަރާތުން ބަލަނީ ޓްރަމްޕްގެ ފުރަތަމަ ރިޔާސީ ދައުރުގައި 2018 ގައި އެމެރިކާ ބަރާކް އޮބާމާގެ ވެރިކަމުގައި އެއްބަސްވެފައިވާ 2015 ގެ އެއްބަސްވުމުން ބޭރުވުމަށްފަހު އާ އެއްބަސްވުމަކަށް ވާސިލުވުމަށެވެ.
ޔޫރަޕު، ރަޝިޔާ އަދި ޗައިނާ ބައިވެރިވި 2015 ގެ އެއްބަސްވުމާ ޚިލާފަށް މިއަދުގެ މަޝްވަރާތަކަކީ ހަމައެކަނި އެމެރިކާއާއި އީރާނާ ދެމެދު ކުރިއަށްދާ މަޝްވަރާތަކެކެވެ.
މިހާތަނަށް މަޝްވަރާތަކުގައި ވާހަކަ ދެކެވިފައިވަނީ ހަމައެކަނި އީރާނުގެ ނިއުކްލިއަ ޕްރޮގްރާމާ ބެހޭ ގޮތުންނެވެ. އީރާނުން ނިއުކްލިއަ ހަތިޔާރު އުފެއްދުމުން ދުރުހެލިކުރުމާ ގުޅޭ ގޮތުންނެވެ. އެހެން ކަންތައްތަކަށް، ބެލިސްޓިކް މިސައިލްތަކާއި ސަރަހައްދުގެ އެކި ހިސާބުތަކުގައި އީރާންގެ ބާރު ފޯރާ މިންވަރަށް ވާހަކަ ނުދެކެވެ އެވެ.
އީރާނުގެ ފޮރިން މިނިސްޓްރީގެ އޮފިޝަލް އިސްމާއީލް ބަޤާއީ ވިދާޅުވެފައިވަނީ އީރާނުގެ ބެލިސްޓިކް މިސައިލް ގާބިލިއްޔަތާއި ބެހޭ ވާހަކަ މަޝްވަރާތަކުގައި "ކުރިންވެސް ނުދެކެވޭ، އަދި ދެކެވިގެންވެސް ނުވާނެ" ކަމަށެވެ. މިކަން ހޮނިހިރު ދުވަހު ޓަސްނިމް ނިއުސްގައި ބުނެފައިވެ އެވެ.