އެއް ގައުމަކުން ރާއްޖެއަށް އެންމެ ގިނައިން ޓޫރިސްޓުން އައީ އިންޑިއާއިންނެވެ. ނަމަވެސް މިދިޔަ އަހަރު ތެރޭގައި ސަރުކާރުގެ ސިޔާސީ ބަޔަކު އިންޑިއާގެ ބޮޑުވަޒީރަށް އިހާނެތި  ބަސްތަކެއް ރައްދުކުރި މައްސަލައިގައި އިންޑިއާއިން ރާއްޖެއަށް ޓޫރިސްޓުން އަންނަވަރު  ވަރަށް ބޮޑަށް ދަށަށް ދިޔަ އެެވެ. 
އެކަމުން އަރައިގަންނަން ސަރުކާރުން މަސައްކަތްތަކެއް ކުރި ނަމަވެސް އަދިވެސް އިންޑިއާއިން އަންނަ ޓޫރިސްޓުންގެ އަދަދަށް ކުރިއެރުމެއް ނުލިބެ އެވެ. މިދިޔަ އަހަރު އިންޑިއާ މާކެޓަށް އައި ހީނަރުކަމުން އަދިވެސް ރާއްޖެއަކަށް އަރައެއް ނުގަނެވެ އެވެ. 
ޓޫރިޒަމް މިނިސްޓްރީން ނެރެފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުން މި މަހުގެ 19އާ ހަމައަށް އިންޑިއާއިން ރާއްޖެއަށް އައީ: 
17،802 މީހުން، އެއީ ރާއްޖެ އައި ޓޫރިސްޓުންގެ %4.7
މިދިޔަ އަހަރުގެ އެ މުއްދަތުގައި އައީ 21،312 ޓޫރިސްޓުން
އެހެންކަމުން މި އަހަރު އިންޑިއާއިން ރާއްޖެ އައި ޓޫރިސްޓުން މި ވަނީ މިދިޔަ އަހަރުގެ އެ މުއްދަތާ އަޅާބަލާއިރު %7ގެ ދަށްވުމެއް އައިސްފަ އެވެ. އެ ދަށްވުމާ އެކު އިންޑިއާއަކީ މިހާރު ރާއްޖެއަށް ހަ ވަނައަށް އެންމެ ގިނަ ޓޫރިސްޓުން އަންނަ ގައުމެވެ. މިދިއަ އަހަރުގެ ކުރިން އެ ގައުމު އެއް ވަނާގައި ވެސް އޮތެވެ. 
ރާއްޖޭގެ ޓޫރިޒަމް އިޝްތިހާރުކުރާ އެޖެންސީ، އެމްއެމްޕީއާރުސީގެ ޗެއާމަން އަބްދުﷲ ގިޔާސް ރިޔާޒު ވިދާޅުވީ އިންޑިއާ މާކެޓުން ޓޫރިސްޓުން އަންނަވަރު ދަށަށް ދާ ނިސްބަތް މިހާރު ވަނީ ކުޑަކުރެވިފައި ކަމަށެވެ. މިހާރު ކުރަން ޖެހޭ މަސައްކަތަކީ އިންޑިއާ ޓޫރިސްޓުން އަންނަ އަދަދު ނެގެޓިވުން ޕޮޒިޓިވްއަށް ބަދަލުކުރުން ކަމަށް ވިދާޅުވި އެވެ.  
މިދިޔަ އަހަރު ރާއްޖެ އައި އިންޑިއާ ޓޫރިސްޓުންގެ އަދަދަށް ވަނީ %38ގެ ދަށްވުމެއް އައިސްފަ އެވެ. 
އޭނާ ވިދާޅުވި ގޮތުގައި މިދިޔަ އަހަރު އައި ވެއްޓުމުން އަރައިގަންނަން ވަގުތު ނަގާނެ އެވެ. ސަބަބެއްގެ ގޮތުގައި ވިދާޅުވީ މިދިޔަ އަހަރުގެ ދެތިން މަހެއްހާ ދުވަހު އިންޑިއާގެ ވަރަށް ގިނަ ޓްރެވަލް އެޖެންޓުން ރާއްޖެއަށް ޓޫރިސްޓުން ނުފޮނުވާ ދިޔުން ކަމަށެވެ. އެ ދަނޑިވަޅާ ދިމާކޮށް ވިއެޓްނާމް އަދި ތައިލެންޑް ފަދަ ރާއްޖެއާ ވާދަވެރި މަންޒިލްތައް އިންޑިއާގެ ޓޫރިސްޓުންނަށް ތައާރަފްވި ކަމަށް އޭނާ ވިދާޅުވި އެވެ. 
"އެވަރުގެ އެޕަޓައިޓެއް ނެތީ އަދިވެސް އިންޑިއާ ޓޫރިސްޓުންގެ ރާއްޖެ އަންނަން. އެ މީހުންނަށް މީގެ ކުރިން ނެތް އެތައް ރާއްޖެ ކަހަލަ މަންޒިލްތަކެއް ކުޑަ އަގުގައި އެ މީހުންނަށް ތައާރަފްވީ ހަގީގަތުގައި. އިންޑިއާގެ ސާޗުތަކުގައި ވެސް ރާއްޖެ އަދި ދަށްކޮށް މި އުޅެނީ،" ގިޔާސް ވިދާޅުވި އެވެ. 
މީގެ އިތުރަށް ޖެނުއަރީ، ފެބުރުއަރީއަކީ އިންޑިއާ ފަތުރުވެރިން ގައުމުން ބޭރަށް އާންމުކޮށް ދަތުކުރާ މަސްތަކެއް ނޫންކަން ވެސް އޭނާ ފާހަގަކުރެއްވި އެވެ. 
"އާންމުކޮށް ސްކޫލް ބަންދު ދުވަސްވަރު އިންޑިއާ ޓޫރިސްޓުން ބޮޑަށް ދަތުރުކުރާނީ. މާޗް ހިސާބުގައި ރަނގަޅުވާނެ ކަމަށް މި ބަލަނީ،" ގިޔާސް ވިދާޅުވި އެވެ. 
ރާއްޖެ ފަތުރުވެރި މަންޒިލެއްގެ ގޮތުގައި ޕްރޮމޯޓް ކުރުމަށް ބާރުއެޅުމަށް އުފައްދާފައިވާ ޑެސްޓިނޭޝަން ފިއުޗާ ޖަމިއްޔާގެ ނައިބު ރައީސް އަމުޖަދު ތައުފީގް ވެސް ގަބޫލުކުރައްވާ ގޮތުގައި އިންޑިއާގެ ޓޫރިސްޓުން އައުން މަދުވި ކަންތައްގަނޑުގައި ލިބުނު ގެއްލުމުން އަދިވެސް ރާއްޖެއަށް އަރައެއް ނުގަނެވެ އެވެ. މިދިޔަ އަހަރުގެ ޖެނުއަރީ ފެބުރުއަރީ ހިސާބުގައި ހުރި އިންޑިއާގެ ނަމްބަރުތަކަކީ ރާއްޖެ-އިންޑިއާއާ ދެމެދު މައްސަލަ ނުޖެހި ރަނގަޅަށް ހުރިއިރުގެ ނަމްބަރުތަކެއްކަން ވެސް އޭނާ ފާހަގަކުރެއްވި އެވެ. 
މީގެ އިތުރަށް އިންޑިއާ މާކެޓުން އަންނަ ޓޫރިސްޓުން ކުރީގެ ނަމްބަރުތަކާ ހަމައަށް ނުގޮސްގެން އުޅޭ އެހެން ސަބަބުތަކެއް ވެސް އޭނާ ވިދާޅުވި އެވެ. އެއީ: 
އިންޑިއާ ޓޫރިސްޓުންނަކީ އަބަދުވެސް އާ މަންޒިލެއް ބަލައިލަން ޝައުގުވެރިވާ ބައެއް؛ އެގޮތުން އެ މީހުން ކަޒަކިސްތާން އަދި ޗަޕާން ކަހަލަ އާ މަންޒިލްތަކަށް ދިޔުން ވަނީ ގިނަވެފައި 
އިންޑިއާގައި މިހާރު ކުރިއަށް ދާ މަހަ ކުމްބް މެލާ ދީނީ ފެސްޓިވަލްއާ ހެދި ވެސް އެ ގައުމުގެ މީހުން ގައުމުތަކަށް ދަތުރުކުރުން ވަނީ މަދުވެފައި 
"އިންޑިއާ ޓޫރިސްޓުންގެ ތެރޭ ރިޕީޓާޒް ވަރަށް މަދުވާނެ. ނިއު ބިޒްނަސް މި ހުންނަނީ. އެ މީހުން އެެހެންވީމާ ބަލާނީ އަބަދުވެސް ނުދާ އާ ޑެސްޓިނޭޝަނަކަށް ދާން. އެހެންވީމާ އާންމުކޮށް މީހުން ނުދާ ތަންތަނަށް ދާން އެ މީހުން ބަލާނީ،" އަމްޖަދު ވިދާޅުވި އެވެ. 
ގިޔާސް ވިދާޅުވީ އިންޑިއާ ޓޫރިސްޓުން އަންނަވަރު އިތުކުރަން އެމްއެމްޕީއާރުސީން މިހާރު ސަމާލުކަން ދެނީ އިންޑިއާގެ އާންމުންނަށް އަމާޒުކޮށް ބީޓުސީ ކެމްޕޭންތަކެއް ރާއްޖޭގެ ޓޫރިޒަމްގެ ރީތިކަން ކިޔައިދީ ހިންގުމަށް ކަމަށެވެ. މި އަހަރު އެފަދަ ގިނަ ކެމްޕޭންތަކެއް އެ ގައުމުގައި އަދި ނުހިންގޭކަން ފާހަގަކުރައްވާ ގިޔާސް ވިދާޅުވީ އިންޑިއާގެ ކުރިކެޓް ލީގް އައިޕީއެލްގައި ރާއްޖެ އިޝްތިހާރުކުރަން ވަރަށް އަވަހަށް ސޮއިކުރާނެ ކަމަށެވެ. 
މީގެ އިތުރަށް އިންޑިއާގެ ސްޓާރުންނާ އެކު ރާއްޖެ ޕްރޮމޯޓްކުރުމަށް މަސައްކަތް ކުރުމާއި ބްރޭންޑް އެމްބެސެޑަރުން ފަދަ ފަރާތްތައް ރާއްޖެ ޕްރޮމޯޓް ކުރަން މަސައްކަތް ކުރަމުން އަންނަ ކަަމަށް ވެސް ގިޔާސް ވިދާޅުވި އެވެ. 
"ބީޓުސީ ކެމްޕޭންތަކުން ރާއްޖެއަށް އަންނަން އެޕަޓައިޓް ރަނގަޅު ކުރެވޭނީ އިންޑިއާ މީހުންގެ މެދުގައި. މީގެ ކުރިން ނުކުރާ ވަރަށް މި އަހަރު އެކަހަލަ ކެމްޕޭންތައް އިންޑިއާ މާކެޓުގައި ވަރަށް އަވަހަށް ފަށާނެ،" ގިޔާސް ވިދާޅުވި އެވެ. 
އޭނާ ވިދާޅުވީ އިންޑިއާގެ ސްކޫލް ޗުއްޓީއާ ދިމާކޮށް ރާއްޖެއަށް ކުރާ ދަތުރުތައް އެއާ އިންޑިއާއިން އިތުރުކުރާނެ ކަމުގެ ސިގްނަލެއް ވެސް ދީފައިވާ ކަމަށެވެ. މި އަހަރުގެ ތިން ވަނަ ކުއާޓާގެ ތެރޭގައި އިންޑިއާގެ އަކާސާ އެއާލައިނުން ރާއްޖެއަށް ދަތުރުތައް ފަށަން ވާހަކަ ދައްކަމުން އަންނަކަމަށް ވެސް ގިޔާސް ވިދާޅުވި އެވެ. 
"އެއާލައިންތައް އިތުރުވެ ދަތުރުތައް އިތުރުވީމާ ކަނެކްޓިވިޓީ ރަނގަޅު ވީމާ ޓޫރިސްޓުން އަންނަވަރު އިތުރުކުރަން އެޅޭ ބާރަކަށް ވާނެ. މިހާރު ވެސް ކަނެކްޓިވިޓީ އަދިވެސް މަދު ރާއްޖެއަށް،" ގިޔާސް ވިދާޅުވި އެވެ. 
އިންޑިއާ ޓޫރިސްޓުން އަންނަވަރު އަދި މަދު ނަމަވެސް އަމުޖަދު ލަފާކުރައްވަނީ އިތުރު ކަންތައްތަކެއް މެދުވެރި ނުވާހާ ހިނދަކު މި އަހަރު ކުރިއަށް އޮތް ތަނުގައި އިންޑިއާއިން އަންނަ ޓޫރިސްޓުން އިތުރުވާނެ ކަމަށެވެ. 
"މިހާރު ވެސް ހަމަ ވަރަށް ރަނގަޅަށް އެބަ އާދޭ ބުކިންތައް. އެހެންވީމާ މި ބަލަނީ ތިން ވަނަ ކުއާޓާއަށް އަންނައިރު ކުރިން ހުރި ހިސާބުތަކަށް އިންޑިއާ މާކެޓުގައި ދެވޭނޭ،" އަމުޖަދު ވިދާޅުވި އެވެ.
ގިޔާސް ވެސް ގަބޫލުކުރައްވަނީ އަހަރު ނިމޭއިރު އިންޑިއާއިން އަންނަ ޓޫރިސްޓުން ކުރިން ހުރި ހިސާބަށް ދާނެ ކަމަށެވެ. އެގޮތުން އެމްއެމްޕީއާރުސީން ފަށާ ކެމްޕޭންތަކާ އެކު މި އަހަރު ނިމޭއިރު 200،000-300،000 ދެމެދުގެ އަދަދެއްގެ ޓޫރިސްޓުން އިންޑިއާއިން ރާއްޖެއަށް  ދަތުރުކުރާނެ ކަމަށް އޭނާ ލަފާކުރައްވަ އެވެ.
"ޖުމްލަ ނަމްބަރު އަޅުގަނޑު ދަންނަވާނީ އަހަރު ނިމޭއިރު ރަނގަޅަށޭ ހުންނާނީ. އުނދަގޫ ވާނެ އޯވަނައިޓުން ކުރިން ހުރި ވަރަށް ދާން. އެކަމަކު އެ ހިސާބަށް މި އަހަރު ތެރޭ ދެވޭނެ،" ގިޔާސް ވިދާޅުވި އެވެ. 
މިހާރު ރާއްޖެއަށް އެންމެ ގިނައިން ޓޫރިސްޓުން އަންނަނީ ޗައިނާއިންނެވެ. އެގޮތުން މިދިޔަ މަހު ވެސް އެ ގައުމުން ވަނީ ބައި ލައްކައަށް ވުރެ ގިނަ ޓޫރިސްޓުން އައިސްފަ އެވެ.  
އިންޑިއާއިން އަންނަ ޓޫރިސްޓުން ދަށްވިޔަސް ރާއްޖޭގެ ޓޫރިޒަމްގެ ބޮޑު ހިއްސާއެއް އޮންނަ އެހެން ގައުމުތަކުން އަންނަ ޓޫރިސްޓުންގެ އަދަދު ވަނީ ގިނަވެފަ އެވެ. އެގޮތުން: 
ޗައިނާއިން އައި ޓޫރިސްޓުންނަށް %27ގެ އިތުރުވުމެއް
ރަޝިޔާއިން %24ގެ އިތުރުވުމެއް
ޔޫކޭއިން އައި ޓޫރިސްޓުންގެ އަދަދަށް %33 ކުރިއެރުން
އިޓަލީ މާކެޓަށް %15ގެ ކުރިއެރުމެއް 
ޖަރުމަނުން އައި އަދަދަށް %20ގެ ކުރިއެރުމެއް 
ފްރާންސުން %37ގެ ކުރިއެރުމެއް 
ފެބުރުއަރީ 19އާ ހަމައަށް މި އަހަރު ރާއްޖެއަށް ވަނީ ޖުމްލަ 365،829 ޓޫރިސްޓުން ޒިޔާރަތްކޮށްފަ އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު %6.7ގެ ކުރިއެރުމެކެވެ.