އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ކުދި އަދި މެދު ފަންތީގެ ވިޔަފާރިތަކަށް އަމާޒުކޮށްގެން ތަޢާރަފުކޮށްފައިވާ "ވިޔަފާރި އެހީ" ލޯނު ސްކީމަށް އެދި ހުށަހެޅުމުގެ ފުރުޞަތު މިމަހުގެ 16 ވަނަ ދުވަހު ހުޅުވާލާނެ ކަމަށް އެ ކޯޕަރޭޝަނުން މިއަދު ހާމަކޮށްފިއެވެ. "ވިޔަފާރި އެހީ" ލޯނަކީ ކުދި އަދި މެދު ފަންތީގެ ވިޔަފާރިތަކަށް ދުވަހުން ދުވަހަށް ބޭނުންވާ މާލީ އެހީތެރިކަން ފޯރުކޮށްދިނުމުގެ މަޤްޞަދުގައި އެސްޑީއެފްސީން ތަޢާރަފުކޮށްފައިވާ ލޯނު ސްކީމެކެވެ. މި ލޯނަކީ ވިޔަފާރިތަކަށް ދުވަހުން ދުވަހަށް ދިމާވާ ފައިސާގެ ދަތިތަކުން އަރައިގަތުމަށް އޮތް ހައްލެއްކަމަށް އެސްޑީއެފްސީން ބުނެފައިވެއެވެ. އެސްޑީއެފްސީން ހާމަކުރި ގޮތުގައި، ވޭތުވެދިޔަ އެއް އަހަރު ދުވަހު މެދުކެނޑުމެއްނެތި ވިޔަފާރިކުރަމުންދާ ކޮންމެ ފަރާތަކަށްވެސް މި ލޯނަށް އެދި ހުށަހެޅޭނެއެވެ. މި ލޯނުގެ ދަށުން މުދާ ގަތުމަށާއި ދުވަހުން ދުވަހަށް ބޭނުންވާ ވިޔަފާރީގެ ޚަރަދުތައް ކުރުމަށް ފައިސާ ބޭނުންކުރެވޭނެއެވެ.ވެ. "ވިޔަފާރި އެހީ" ލޯނު ސްކީމްގެ ދަށުން އެންމެ ގިނަވެގެން ނެގޭނީ 1.5 މިލިއަން ރުފިޔާއެވެ. ނަމަވެސް ލޯނުގެ އަދަދު 700,000 ރުފިޔާއަށްވުރެ މަތިވާނަމަ ރަހުނެއް ދައްކަން ޖެހޭނެކަމަށް އެސްޑީއެފްސީން ބުނެފައިވެއެވެ. މި ލޯނުގެ އިންޓްރެސްޓް ރޭޓަކީ އަހަރަކު 9.5 އިންސައްތައެވެ. އެސްޑީއެފްސީން އިތުރަށް ހާމަކުރި ގޮތުގައި، މި ލޯނުގެ ގްރޭސް ޕީރިއަޑްގެ ގޮތުގައި ގިނަވެގެން 6 މަސްދުވަސް ދެވޭނެއެވެ. އަދި ލޯނު އަނބުރާ ދެއްކުމަށް ގިނަވެގެން 5 އަހަރުގެ މުއްދަތެއް ދެވޭނެއެވެ. މި ލޯނު ސްކީމަކީ ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް މުހިންމު އެހީތެރިކަމެއް ލިބިގެންދާނެ ކަމެއްކަމަށް ވިޔަފާރިވެރިން ބުނެފައިވެއެވެ. ޚާއްޞަކޮށް ކޮވިޑް-19 ގެ ބަލިމަޑުކަމުގެ ސަބަބުން ވިޔަފާރިތަކަށް ކުރިމަތިވެފައިވާ ގޮންޖެހުންތަކުން އަރައިގަތުމަށް މި ލޯނު ސްކީމް އެހީތެރިވެދޭނެ ކަމަށް އުންމީދުކުރެވެއެވެ.