އިނގިރޭސި ޕްރިމިއާ ލީގުގެ ކުލަބު ލިވަޕޫލްގެ ހެޑު ކޯޗަކަށް ސްޕެއިނުގެ ޒަބީ އަލޮންސޯ ގެނައުމުގެ މަޝްވަރާތަކެއް އަނެއްކާވެސް ފަށައިފިއެވެ. މީގެކުރިންވެސް ލިވަޕޫލުން ވަނީ އަލޮންސޯ ގެނައުމަށް މަސައްކަތްކޮށްފައެވެ. ނަމަވެސް އެ ފަހަރު ގެންނަން ކުރި މަސައްކަތް ނާކާމިޔާބުވުމުން ގެނައީ ނެދަލަންޑްސްގެ ކޯޗު އާނާ ސްލޮޓެވެ. ނަމަވެސް އޭނާގެ ނަތީޖާތައް ރަނގަޅުނުވެ، ޓީމު އޮތީ އުނދަގޫ ހާލަތެއްގައެވެ. އެއާއެކު ގިނަ ބައެއްގެ ފާޑުކިޔުން ކުލަބަށް ދަނީ އަމާޒުވަމުންނެވެ. ލިވަޕޫލްގެ ބޯޑު މެމްބަރުންގެ މެދުގައި މިހާރު ކުރަމުން އަންނަ އެންމެ ބޮޑު ބަހުސަކީ ހެޑު ކޯޗަކަށް ގެންނާނީ ކޮން ކޯޗަކު ކަމާމެދު އެވެ. މީޑިއާ ރިޕޯޓުތައް ބުނާގޮތުން ކުލަބުގެ ބޯޑުގައި ކުރަމުންދާ މަޝްވަރާތަކުގެ ތެރެއިން އެންމެ ބޮޑު ސަމާލުކަމެއް ލިބުނީ އަލޮންސޯއަށެވެ. އެގޮތުން އަލޮންސޯ ގެނައުމަށް އޭނާގެ އޭޖެންޓާއެކު މަޝްވަރާތަކެއް ކުރިއަށްދާ ކަމަށްވެސް މީޑިއާ ރިޕޯޓުތައް ބުނެއެވެ. އެގޮތުން އެ ކުލަބުން ތައްޔާރުވަނީ އަންނަ ސީޒަނަށް އޭނާ ލިވަޕޫލަށް ގެނައުމަށެވެ. މީގެ ދެ ހަފުތާއެއްހާ ދުވަސްކުރިން ރެއާލް މެޑްރިޑުގެ ކޯޗުކަމުން އަލޮންސޯ ވަކިކުރީ ސްޕެނިޝް ސުޕަ ކަޕުން ބަލިވުމާ ގުޅިގެންނެވެ. އޭގެ ކުރިން ކުލަބު ކުޅުނު ބޮޑެތި މެޗުތަކުގައި ވެސް ނަތީޖާ ވަރަށް ގޯހެވެ. މިދިޔަ ސެޕްޓެމްބަރު މަހުން ފެށިގެން އިނގިރޭސި ޕްރިމިއާ ލީގުގެ އެންމެ ފަސް މެޗުން މޮޅުވި ލިވަޕޫލުން އަދި 2026 ވަނަ އަހަރު ލީގު މެޗަކުން މޮޅެއް ނުލިބެއެވެ.