އިރާގުގެ ކުރީގެ ބޮޑުވަޒީރު ނޫރީ އަލް މާލިކީ އެ ގައުމުގެ ބޮޑުވަޒީރު ކަމަށް އަލުން އިންތިހާބުކޮށްފި ނަމަ އިރާގަށް އެމެރިކާއިން ދޭ އެހީ ވަގުތުން ހުއްޓާލާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް އިއްޔެ ދެއްވައިފި އެވެ.
ބޮޑުވަޒީރު ކަމަށް ހަފުތާ ބަންދުގައި މާލިކީ ކަނޑައެޅީ ޝިއައީންގެ ޕާޓީތަކުގެ ނޮމިނީއެއްގެ ގޮތުގަ އެވެ. 
ޓްރޫތު ސޯޝަލްގައި އެމެރިކާގެ ރައީސް ވިދާޅުވެފައި ވަނީ މާލިކީއަކީ ވަރަށް ގޯސް ނިންމުމެއް ކަމަށެވެ. އޭނާ ވިދާޅުވީ އޭނާ އެންމެ ފަހުން ވެރިކަމުގައި ހުންނެވި އިރު މުޅި ގައުމުގައި އޮތީ ފަގީރުކަމާއި ހަލަބޮލިކަމުގެ ތެރެއަށް ވެއްޓިފައި ކަމަށެވެ.
މާލިކީ އެ ގައުމުގެ ބޮޑުވަޒީރުކަން ކުރެއްވީ 2006 ވަނަ އަހަރުން ފެށިގެން 2014 ވަނަ އަހަރާ ހަމައަށެވެ. ނަމަވެސް އައިއެސް އިން އެ ގައުމުގެ ބޮޑު ބައެއް ހިފުމާ ގުޅިގެން އޭނާ އިސްތިއުފާ ދެއްވި އެވެ.
ކޯޑިނޭޝަން ފްރޭމްވޯކް ނަމަކަށް ކިޔާ ޝިއައީންގެ ކޯލިޝަނުން މިދިޔަ ހޮނިހިރު ދުވަހު އެންޑޯޒްކުރި މާލިކީ އާންމު ގޮތެއްގައި ނޮމިނޭޓް ކުރާނީ ރައީސް އެވެ. ރައީސްއަކީ ރަމްޒީ ބޭފުޅެކެވެ.
އިރާގުގެ ގާނޫނު ހަދާ މަޖިލީހުން ރައީސަކު އިންތިހާބު ކުރަން ހަމަޖެހިފައި އޮތީ އިއްޔެ އެވެ. ނަމަވެސް ރިޔާސީ ކެންޑިޑޭޓާ މެދު އެއްބަސްވުމަކަށް ނާދެވޭތީ ވޯޓުލުން ފަސްކުރި އެވެ.
ބަގުދާދުގައި ހަރަކާތްތެރިވާ ނުފޫޒު ގަދަ ޝިއައީންގެ ޖަމާއަތްތަކަކީ އީރާނާ ގާތް ގުޅުމެއް އޮންނަ ޖަމާއަތެކެވެ. އަދި އެ ޖަމާއަތަކީ ޝީއީ ދީނީ އިލްމުވެރިންގެ ބާރުގެ ދަށުގައި އޮންނަ ޖަމާއަތެކެވެ.
އީރާނާ ގުޅުން އޮންނަ ޖަމާއަތްތަކުގެ ނުފޫޒު އެ ސަރަހައްދުގައި އިތުރުވަމުންދާތީ އެމެރިކާ އިން ވަނީ ކަންބޮޑުވުން ފާޅުކޮށްފަ އެވެ. އޭގެ ތެރޭގައި އިރާގު ވެސް ހިމެނެ އެވެ.