ބޮލީވުޑްގެ ފިލްމު ޑައިރެކްޓަރު ފަރުހާންގެ އަހްތަރުގެ ފިލްމު "ޑޮން"ގެ ތިން ވަނަ ބައި އުފެއްދުމުގެ މަސައްކަތް މަޑުޖައްސާލުމަށްފަހު މީގެ އަހަރުތަކެއް ކުރިން އިއުލާނުކުރި ފިލްމު "ޖީ ލޭ ޒަރާ"ގެ މަސައްކަތް ފަށަން ނިންމިކަން އިއުލާނުކޮށްފިއެވެ. ފަރުހާންގެ ކެރިއަރުގެ އެންމެ މުހިއްމު ފްރެންޗައިސް ކަމަށްވާ "ޑޮން"ގެ ތިން ވަނަ ބައިގެ މަސައްކަތް އިހަށް މަޑުޖައްސާލުމަށް ނިންމީ އެ ފިލްމުގެ ޝޫޓިންގް ފަށަން ޕްލޭންކޮށްފައި ވަނިކޮށް ފިލްމުގެ ލީޑް އެކްޓަރު ރަންވީރު ސިންގް ފިލްމުން ވަކިވުމާ ގުޅިގެންނެވެ. ފިލްމު "ޑޮން 3" ފަރުހާން އިއުލާނުކުރީ 2021ވަނަ އަހަރު އިއުލާނުކުރި "ޖީ ލޭ ޒަރާ"ގެ މަސައްކަތް އަވަސް ކުރިމަގެއްގައި ފެށޭނެ ކަމުގެ ޔަގީންކަން ނެތުމާ ގުޅިގެންނެވެ. ފިލްމު "ޖީ ލޭ ޒަރާ"އަށް ހޮވާފައިވާ ތިން ބަތަލާއިން ކަމަށްވާ ކެޓްރީނާ ކައިފް، ޕްރިޔަންކާ ޗޯޕްރާ އަދި އާލިއާ ބަޓް---ފޮޓޯ/އެންޑީޓީވީ ނަމަވެސް މިހާރު ކަންދިމާވެފައިވާ ގޮތުން ފިލްމު "ޑޮން"ގެ ކާސްޓުން އަލުން ހަމަޖެއްސުމަކީ ވަރަށް ގިނަ މަރުހަލާތަކެއް ކަޑައްތު ކުރުމަށްފަހު ކުރެވޭނެ ކަމަކަށްވާތީ އެ ފިލްމުގެ މަސައްކަތަށް ވަގުތު ހުސްކުރުމަކީ އެންމެ ރަނގަޅު ގޮތް ނޫން ކަމަށް ފަރުހާންގެ ޓީމާ ހަވާލާދީ މީޑިއާތަކުން ބުނެފައިވެއެވެ. ފަރުހާންގެ ޑްރީމް ފިލްމު ޕްރޮޖެކްޓްތަކުގެތެރޭ ހިމެނޭ "ޖީ ލޭ ޒަރާ" އަކީ ތިން އަންހެން އެކުވެރިންގެ ދިރިއުޅުމުގެ ވާހަކަ ކިޔައިދޭނެ ރޯޑް-ޓްރިޕް ފިލްމެކެވެ. މި ފިލްމުގެ މުހިއްމު ތިން ބަތަލާއިންނަކީ ކެޓްރީނާ ކައިފް، ޕްރިޔަންކާ ޗޯޕްރާ އަދި އާލިއާ ބަޓްއެވެ. ފިލްމު 2021ގައި އިއުލާނު ކުރުމަށްފަހު މި ފިލްމުގެ މަސައްކަތް އެކި ފަހަރުމަތިން ލަސް ކުރެވިފައި ވަނީ ތިން ބަތަލާއިންނަށް ފިލްމަށް ވަގުތު ނުދެވުމާ ގުޅިގެންނެވެ. އެކްސެލް އެންޓަޓެއިންމަންޓް އާއި ޓައިގާ ބޭބީ ގުޅިގެން ގެނެސްދޭ "ޖީ ލޭ ޒަރާ"ގެ ކާސްޓަށް އިތުރު ބަދަލެއް ނައިސް ބަތަލާއިންގެ ޝެޑިއުލްތައް ފައިނަލްވިހާ އަވަހަކަށް މި އަހަރުގެ މެދުތެރޭ ފިލްމުގެ މަސައްކަތް ފަށަން ފަރުހާން ތައްޔާރުވަމުން އަންނަ ކަމަށް ރިޕޯޓުތަކުން ބުނެއެވެ. ފިލްމު ޑައިރެކްޓަރެއްގެ އިތުރުން އެކްޓަރެއްގެ ގޮތުގައި ވެސް މަސައްކަތް ކުރަމުން އަންނަ ފަރުހާން އެންމެ ފަހުން ބެލުންތެރިންނަށް ފެނިފައި ވަނީ އަސްކަރީ ފިލްމު "120 ބަހާދުރު"އިންނެވެ.