ތަކުރާރުކޮށް ގަވާއިދާ ޚިލާފުވާތީ ދެކުނު އެފްރިކާއި ހުންނަ އިސްރާއީލުގެ އެންމެ އިސް މަންދޫބު، އެރިއަލް ސެއިޑްމަން 72 ގަޑިއިރުގެ ތެރޭގައި އެ ގައުމުން ފުރުމަށް އަމުރުކޮށްފިއެވެ. ދެކުނު އެފްރިކާގެ ޚާރިޖީ ވުޒާރާއިން ހުކުރު ދުވަހު ބުނީ އިސްރާއީލުގެ މަންދޫބަކީ އެ ގައުމުން މަރުހަބާ ކިޔާ މީހެއް ނޫން ކަމަށާއި 72 ގަޑިއިރު ތެރޭގައި ފުރަން ޖެހޭކަން އިސްރާއީލަށް އަންގާފައިވާނެ ކަމަށެވެ. ސެއިޑްމަން އަކީ 2023 ވަނަ އަހަރުން ފެށިގެން ދެކުނު އެފްރިކާގައި ހުންނަ އިސްރާއީލުގެ އެންމެ އިސް މަންދޫބެވެ. "މި ފިޔަވަޅަކީ ދެކުނު އެފްރިކާގެ އިސްތިގުލާލަށް ސީދާ ގޮންޖެހުމެއް ކުރިމަތިވާ ޑިޕްލޮމެޓިކް އުސޫލުތަކާއި އަމަލުތަކާ ޚިލާފުވުމުން އަޅާ ފިޔަވަޅެެއް." ޚާރިޖީ ވުޒާރާއިން ނެރުނު ބަޔާނުގައި ބުންޏެވެ. ގަވާއިދާ ހިލާފުވުމުގެ ތެރޭގައި ދެކުނު އެފްރިކާގެ ރައީސް ސައިރިލް ރަމަފޯސާއަށް ފުރައްސާރަ ކުރުމަށް އިސްރާއީލުގެ ރަސްމީ ސޯޝަލް މީޑިއާ ޕްލެޓްފޯމްތައް ތަކުރާރުކޮށް ބޭނުންކުރުން ހިމެނޭ ކަމަށް އެ ބަޔާނުގައިވެއެވެ. އަދި އިސްރާއީލުގެ އިސް އޮފިޝަލުންގެ ދަތުރުތައް އެމްބަސީން ސަރުކާރަށް އަންގައިފައިނުވާ ކަމަށްވެސް ތުހުމަތުކޮށްފައިވެއެވެ. އެ މައްސަލައިގައި އިސްރާއީލުން ވެސް ވަނީ ދެކުނު އެފްރިކާއިން އެ ގައުމަށް ކަނޑައަޅާފައި ހުންނަ އިސް މަންދޫބު ޝޯން ބައިނެވެލްޑްޓް އަކީ އެ ގައުމުން މަރުހަބާ ކިޔާ މީހެއް ނޫން ކަމަށާއި 72 ގަޑިއިރުގެ ތެރޭގައި އިސްރާއީލުން ފުރަން ޖެހޭނެކަން އަންގާފައެވެ. އިސްރާއީލުން ޣައްޒާއާ ދެކޮޅަށް ކުރި ހަނގުރާމައަކީ 1948 ވަނަ އަހަރުގެ ނަސްލު ނައްތާލުމުގެ މުއާހަދާއާ ހިލާފު ހަނގުރާމައެއް ކަމަށް ބުނެ 2023 ވަނަ އަހަރު ދެކުނު އެފްރިކާއިން ވަނީ އިސްރާއީލާ ދެކޮޅަށް އިންޓަނޭޝަނަލް ކޯޓަށް މައްސަލަވެސް ހުށަހަޅާފައެވެ.