މި ސަރުކާރަކީ، ކުރިޔާލައި ރާވައިގެން މަޝްރޫއުތަކަށް ބޭނުންވާ ބަޖެޓު ހޯދައިގެން ވަރަށް ރޭވުންތެރިކަމާއެކު ކަންކަން ކުރާ ސަރުކާރެއް ކަމަށް މަޖިލީހުގެ މެޖޯރިޓީ ލީޑަރު އިބްރާހިމް ފަލާހު ވިދާޅުވެއްޖެ އެވެ.
ބުނީ ކީކޭ؟ - ފުވައްމުލަކު ކައުންސިލަށް ޕީއެންސީން ވާދަކުރާ ފަރާތްތަކުގެ ކެމްޕޭން ފެށުމަށް ރޭ ބޭއްވި ޖަލްސާގައި ފަލާހު ވިދާޅުވީ، ޕީއެންސީން ސަރުކާރާ ހަވާލުވިއިރު، ރާއްޖޭގައި ފެށިފަހުރި އެއްވެސް މަޝްރޫއުއެއްގެ އެންމެ ޕަސެންޓެއް ހިންގޭ ވަރަށް ވެސް ދައުލަތުގެ ބަޖެޓުގައި ފައިސާ ހިމަނާފައި ނެތް ކަމަށެވެ. ހަމައެކަނި ހުރީ، ބިންގާތަކެއްގެ ގޮތުގައި ބިންގަނޑުގައި ވަޅުލާފައިހުރި ގާތަކެއް ކަމަށް ފަލާހު ވިދާޅުވި އެވެ. 
މި ސަރުކާރުގެ ތަފާތަކީ:
ރައީސް މުހައްމަދު މުއިއްޒު ކަންކަން ކުރައްވަނީ ކެބިނެޓާއި ކަމާގުޅުންހުރި ވުޒާރާތަކާ މަޝްވަރާކޮށްގެން، ވަރަށް ތަރުތީބުން، އެ މަޝްރޫއަކަށް ކުރިޔާލައި ޕްލޭންކޮށް ބަޖެޓު ވެސް ހޯދައިގެން ކަމަށްވުމުން
"މި މަޝަރޫއުތައް ހިންގަން ރާވަނީ އެ އެ މަޝްރޫއުތައް ފަށައި ނިންމޭ ވަރަށް ފައިސާ ވެސް އެއްކޮށްފައި، ހޯދާފައި، އެޔަށް ބަޖެޓުތައް ހަދާފަ ހުރިހާ ކަމެއް ނިންމާފައި. އެއީ ޒިންމާދާރު ސަރުކާރުތަކަކީ،" ފަލާހު ވިދާޅުވި އެވެ.
ރައްޔިތުން މަޖިލީހުގެ އިނގުރައިދޫ ދާއިރާގެ މެންބަރުކަން ވެސް ކުރައްވާ ފަލާހު ވިދާޅުވީ، ކުރިއަށް އޮތް ކައުންސިލް އިންތިހާބުގައި ވެރިކަންކުރާ ޕާޓީ ޕީއެންސީގެ ކެންޑިޑޭޓުން ކައުންސިލުތަކަށް ހޮވުމަށް ރައީސް މުއިއްޒު އެދިވަޑައިގަންނަވަނީ ރައްޔިތުންނަށްޓަކައި ކަމަށެވެ. އެއީ، ވެފައިވާ ވައުދުތައް އެންމެ ފުރިހަމައަށް "ރަނުން ރަނަށް" ނިންމައިދިނުމުގެ ބޭނުމުގައި ކަމަށް އޭނާ ވިދާޅުވި އެވެ. 
ފާލާހު އިތުރަށް ވިދާޅުވީ:
ރައީސް މުއިއްޒު ވަރުގެ ތެދުވެރި އިހުލާސްތެރި ވެރިއަކު ދެން ރާއްޖެއަށް ނުލިބޭނެ
ރައީސް މުއިއްޒު ނަމަކަށް ވައުދުވެވަޑައި ނުގަންނަވާ؛ ކޮންމެ ވައުދެެއް ވެސް ވެވަޑައިގަންނަވަނީ ރައްޔިތުންނަށް އެކަންކަން ކޮށްދިނުމުގެ އިހުލާސްތެރި ނިޔަތާއެކު
މިހާރުވެސް މީހުން ދިރިއުޅޭ 188 ރަށަށް ދަތުރުކުރައްވައިފި؛ އެއީ އިންތިހާބަކާ ގުޅިގެން ކުރެއްވި ދަތުރުތަކެއް ނޫން
މިހާރު ކުދިން ވޭޕް ފަދަ ތަކެތި ދަބަހަށް އަޅައިގެން ސްކޫލުތަކަށް ދިއުން ހުއްޓިއްޖެ
ގޭންގުތައް މާލޭގައި އެއްވެސް ވަރަކަށް ނެތް
ވަޒީފާގެ ފުރުސަތުތައް ހުޅުވާލައި މަޖިލިސް ތެރެއިން ގާނޫނުތަކަށް ބަދަލު ގެނެސް ގެންނަންޖެހޭ މުހިންމު ބަދަލުތައް އެދަނީ ގެންނަމުން
އެހެންކަމުން ރައީސް މުއިއްޒަށް އިތުބާރުކޮށް މި ސަރުކާރާއެކު ތިބުމަކީ ވަރަށް ބޮޑު އެދުމެެއް
"އަޅުގަނޑު ދަންނަވާނީ ރައީސް މުހައްމަދު މުއިއްޒުގެ މި ފަސް އަހަރު ނިމޭއިރު ވެގެންދާނީ، ވެރިއެއްގެ ޒައާމަތުގައި އެންމެ ގިނަ ކާމިޔާބީތައް އެންމެ ބޮޑު ފައިދާ ގައުމަކަށް ހޯދައިދޭ ފަސް އަހަރު ކަމުގައި. އެކަމުގެ ޔަގީންކަން އަޅުގަނޑަށް އެބައޮތް،" ފަލާހު ވިދާޅުވި އެވެ.