ލުބުނާނުގެ ދެކުނުގެ ސަރަހައްދުތަކަށް އިޒްރޭލުން އިއްޔެ ދިން ވަރުގަދަ ވައިގެ ހަމަލާތަކުގައި 17 މީހުން މަރުވެފައިވާ ކަމަށް އެ ގައުމުގެ ސިއްހަތާ ބެހޭ ވުޒާރާއިން ބުނެފި އެވެ.
މިއީ މީގެ ދެ ހަފުތާއެއްހާ ދުވަސް ކުރިން އަމަލުކުރަން ފެށި ހަނގުރާމަ މެދުކަނޑާލުމުގެ އެއްބަސްވުމަށް ފަހު، އެންމެ ގިނަ ބަޔަކު މަރުވި އެއް ދުވަހެވެ.
ފާއިތުވި ބުރާސްފަތި ދުވަހުން ފެށިގެން މިހާތަނަށް މަރުވި މީހުންގެ އަދަދު 110އަށް އަރާފައިވާއިރު، އޭގެ ތެރޭގައި ކުޑަކުދިން ހިމެނޭ ކަމަށް ރިޕޯޓުތައް ބުނެ އެވެ. ލުބުނާނުގެ ކަމާބެހޭ ފަރާތްތަކުން ހާމަކޮށްފައިވާ ގޮތުގައި، މި ހަމަލާތަކުގައި މަރުވި މީހުންގެ ތެރޭގައި އާންމުންނާއި ހަނގުރާމަވެރިން ވަކިކޮށްފައެއް ނުވެ އެވެ.
އިޒްރޭލުން ބުނަމުންދަނީ އެ ގައުމުގެ އަމާޒަކީ ހިޒްބުއްލޯ ޖަމާއަތް ކަމަށާއި ފާއިތުވި ދުވަސްތަކުގައި އެ ޖަމާއަތުން ގިނަ އަދަދެއްގެ ރޮކެޓާއި ޑްރޯން ހަމަލާތައް ދީފައިވާ ކަމަށް ތުހުމަތުކުރެ އެވެ. އިޒްރޭލުގެ އޮފިޝަލުން ހާމަކުރި ގޮތުގައި، މި މުއްދަތުގެ ތެރޭގައި އެ ގައުމުގެ 17 ސިފައިން ވަނީ މަރުވެފަ އެވެ.
އިޒްރޭލު ސިފައިން ވަނީ ހަމަލާދޭ ސަރަހައްދުތަކުގެ ރަށްތަކުގައި ދިރިއުޅޭ މީހުން، އެ މީހުންގެ ގެދޮރާ މަދުވެގެން 1 ކިލޯމީޓަރު ދުރަށް ދިއުމަށް އަންގާފަ އެވެ. އިޒްރޭލުން ބުނަމުންދަނީ އެ ގައުމަށް ކުރިމަތިވެދާނެ ނުރައްކާތަކާ ދެކޮޅަށް ފިޔަވަޅު އެޅުމުގެ ހައްގު ލިބިގެންވާ ކަމަށެވެ. ނަމަވެސް ލުބުނާނުގެ ސަރުކާރުން ވަނީ އިޒްރޭލުން ހަނގުރާމަ މެދުކަނޑާލުމުގެ އެއްބަސްވުމާ ތަކުރާރުކޮށް ހިލާފުވަމުންދާ ކަމަށް ބުނެ ކަންބޮޑުވުން ފާޅުކޮށްފަ އެވެ.
ހިޒްބުއްލޯ އިން ބުނި ގޮތުގައި، އެ ޖަމާއަތުން ދިން ރޮކެޓާއި ޑްރޯން ހަމަލާތަކަކީ އިޒްރޭލުން މެދުނުކެނޑި ދެމުންދާ އަނިޔާވެރި ހަމަލާތަކަށް ރައްދު ދިނުމުގެ ގޮތުން ދިން ހަމަލާތަކެއް ކަމަށެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ހިޒްބުއްލޯގެ ޑްރޯން ހަމަލާތަކުގެ ނުރައްކާ ބޮޑުވަމުންދާކަން ގަބޫލުކޮށް، އެކަމަށް ހައްލެއް ހޯދުމަށް ވަގުތު ނަގާނެ ކަމަށް ބުނެފަ އެވެ.
މަޝްވަރާގެ އަލީގައި ހަމަނުޖެހުންތައް ކުޑަކުރުމަށް ކުރި މަސައްކަތްތަކުން އަދި އެދެވޭ ނަތީޖާއެއް ފެނިފައެއް ނުވެ އެވެ. ލުބުނާނުގެ ރައީސް ޖޯސެފް އައުން ވަނީ ހަނގުރާމަ މެދުކަނޑާލުމުގެ އެއްބަސްވުމަށް ފުރިހަމައަށް އަމަލުކުރުމަށް އިޒްރޭލަށް ގޮވާލައްވާފަ އެވެ.
ނަމަވެސް ހިޒްބުއްލޯގެ ލީޑަރު ނައީމް ގާސިމް ވަނީ މިހާރު ކުރިއަށްދާ މަޝްވަރާތަކަށް އިންކާރު ކުރައްވާފަ އެވެ. އޭނާ ވިދާޅުވި ގޮތުގައި، އެ މަޝްވަރާތަކަކީ ހަމައެކަނި ނަތަންޔާހޫގެ މަސްލަހަތު އިސްކޮށް، އެއްވެސް ހަގީގީ ނަތީޖާއެއް ނުކުންނާނެ ކަންކަމެވެ.
ލުބުނާނުގެ ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި، މިދިޔަ މާޗު މަހުން ފެށިގެން މިހާތަނަށް ހިނގި ކުރިމަތިލުންތަކުގައި 2,600އަށް ވުރެ ގިނަ މީހުން ވަނީ މަރުވެފަ އެވެ.