ފިނޭންސް މިނިސްޓްރީން ހަފުތާއަކު އެއްފަހަރު ނެރޭ މާލީ ރިޕޯޓު ނެރުން އަނެއްކާވެސް މެދުކެނޑި މާލީ ހިސާބުތައް ހާމަނުކުރާތާ ތިން ހަފުތާ ވެއްޖެ އެވެ.
ފިނޭންސުން އެންމެ ފަހުން ވީކްލީ ފިސްކަލް ރިޕޯޓު ނެރުނީ އޮގަސްޓު 14، ގަ އެވެ. އެ ފަހަރު އާންމުކުރީ މި މަހުގެ 7، އާ ހަމައަށް ހިނގާފައިވަ ހަރަދުތަކާއި ލިބުނު އާމްދަނީ ތަފުސީލެވެ. އޭގެ ފަހުން ވޭތުވެދިޔަ ތިން ހަފުތާގައި ދައުލަތަށް ލިބުނު ފައިސާ އާއި ކުރި ހަރަދުތަކުގެ ތަފުސީލު އެނގޭނެ ގޮތެއް ނެތެވެ.
މިއީ ވޭތުވެދިޔަ ދެ މަސް ދުވަހުގެ ތެރޭގައި މާލީ ހިސާބުތައް ހާމަކުރުން ހުއްޓާލި ދެވަނަ ފަހަރަށެވެ. މިދިޔަ މަހު ވެސް ދެ ހަފުތާއެއް ވަންދެން އެ ހިސާބުތައް އާންމުކުރުން ހުއްޓާލި އެވެ. އެފަހަރު ވެސް ހިސާބުތައް ހާމަކުރީ އެ ވާހަކަ ނޫހުގައި ޖެހުމުންނެވެ.
މިއީ މީގެ ކުރިން ހަފުތާއަކު އެއްފަހު ނެރުމުން އައި މާލީ ބަޔާންތައް ހާމަކުރުން މި ސަރުކާރުން ހުއްޓާލި ފުރަތަމަ ފަހަރެއް ނޫނެވެ. ނަމަވެސް މި ފަހުން އެކަން ރަނގަޅުކޮށް ވޭތުވެދިޔަ ދެތިން މަސް ދުވަހު އެ ހިސާބުތައް އުސޫލުގެ ތެރެއިން ނެރުމުން ދިޔަ އެވެ.
ރައީސް މުހައްމަދު މުއިއްޒުގެ ސަރުކާރުގައި މާލީ ހިސާބުތައް ނެރުމުގައި އެންމެ ބޮޑު ހުސްކަމެއް ދިޔައީ މިދިޔަ އަހަރު އެވެ. މިދިޔަ އަހަރުގެ ޖޫން މަހުގެ ފަހުކޮޅުން ފެށިގެން އޮގަސްޓު 29، 2024، އާ ހަމައަށް ދައުލަތުގެ މާލީ ހިސާބުތައް ސިއްރުކުރި އެވެ. އެ ހިސާބުތައް ހާމަކުރަން އެދުމުން އެ ދުވަސްވަރު ސަރުކާރުން އެތައް ބަހަނާއެއް ދެއްކި އެވެ.
އެ ފަހަރު ސަރުކާރުން މާލީ ހިސާބުތައް އާންމުކުރީ އެ ހިސާބުތައް އާންމުނުކޮށްގެން އިދިކޮޅު ޕާޓީތަކާއި ބައިނަލްއަގްވާމީ އިދާރާތަކުން ކަންބޮޑުވުން ފާޅުކުރަމުން ދަނިކޮށެވެ.
ފިނޭންސުން އެންމެ ފަހުން އާންމުކުރި ވީކްލީ ފިސްކަލް ޑިވެލޮޕްމަންޓު ރިޕޯޓުން ދައްކާ ގޮތުގައި މި އަހަރުގެ 25 ވަނަ ހަފުތާ ނިމުނުއިރު، މި އަހަރު ލިބޭނެ ކަމަށް އަންދާޒާ ކުރި 39.7 ބިލިއަން ރުފިޔާގެ އާމްދަނީގެ ދެބައިކުޅަ އެއް ބަޔަށް ވުރެ ބޮޑު އާމްދަނީއެއް ލިބިއްޖެ އެވެ.
ދައުލަތުގެ އާމްދަނީގެ ތެރޭގައި ހިމެނޭ ދާއިރާތަކުގެ ތެރެއިން ޓެކުހާއި ޓެކްސް ނޫން އާމްދަނީ ކުރީ އަހަރަށް ވުރެ އިތުރެވެ. ނަމަވެސް ހިލޭ އެހީގެ ގޮތުގައި ލިބުނު އަދަދު ކުރީ އަހަރަށް ވުރެ ދަށެވެ.
މި އަހަރުގެ ބަޖެޓުގައި ހިލޭ އެހީގެ ގޮތުގައި 2.5 ބިލިއަން ރުފިޔާ ލިބޭނެ ކަމަށް އަންދާޒާ ކުރި ނަމަވެސް މިހާތަނަށް ލިބުނީ 162 މިލިއަން ރުފިޔާ އެވެ. މިއީ މި އަހަރަށް ލިބޭނެ ކަމަށް އަންދާޒާ ކުރާ ހިލޭ އެހީގެ އެންމެ ހަ ޕަސެންޓެވެ.