ވޯލްޑް ކަޕް ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗަށް ނޭމާ ޖޫނިއާ ފިޓްވުމަކީ މުޅި ޓީމަށް ވެސް ލިބުނު ވަރަށް ބޮޑު ހިތްވަރެއް ކަމަށް ބްރެޒިލްގެ ލޫކަސް ޕަކޭޓާ ބުނެފި އެވެ.
ސްލޮޓްލޭންޑާއެކު މިރޭ ކުޅޭ މެޗުގެ ކުރިން ވާހަކަ ދައްކަމުން އޭނާ ބުނީ ބްރެޒިލްގެ 10 ނަންބަރު ކުޅުންތެރިޔާ އަކީ އަބަދުވެސް ޓީމަށް މުހިންމު ކުޅުންތެރިއެއް ކަމަށެވެ.
"ހުރިހާ ކުޅުންތެރިން ވެސް ތިބީ ވަރަށް އުފަލުން އޭނާ އަލުން ޓީމާއެކު ފަރިތަކުރަން ފެށުމުން. އޭނާ އަކީ އަބަދުވެސް ވަރަށް މުހިންމު ކުޅުންތެރިއެއް. ހުރިހާ ކުޅުންތެރިން ވެސް ގަބޫލު ކުރޭ އޭނާގެ ހުނަރާއި މަސައްކަތް،" ޕަކޭޓާ ބުންޏެވެ.
އޭނާ އަދި ބުނީ ފޯވަޑް ވިނީޝިއުސް ޖޫނިއާގެ ކުޅުން ވެސް މޮޅު ކަމަށެވެ.
"އަހަރުމެން ދެ މީހުންނަކީ ވަރަށް ކުރިއްސުރެ ރަހުމަތްތެރިން. ވިނީޝިއުސް ދަނީ އޭނާގެ މުހިންމުކަމާއި އަދި މުޅި ޓީމު ހިތްހަމަ ޖެހޭ ވަރަށް ކުޅެމުން،" ޕަކޭޓާ ބުންޏެވެ.
ބްރެޒިލް ވަނީ މޮރޮކޯއާ އެއްވަރުކޮށް، ހައިޓީ ބަލިކޮށްފަ އެވެ. މިހެންވެ ޕޮއިންޓަކުން ދެ ވަނަ ބުރަށް ދެވޭނެ އެވެ. ނަމަވެސް ޕަކޭޓާ ބުނީ ބޭނުންވަނީ މެޗު ފަސޭހަ ނުކޮށް މޮޅުވާން ކުޅެން ކަމަށެވެ.