ހުޅުމާލޭ ދެވަނަ ފިޔަވަހީގައި، ހިޔާ ޓަވަރު ފަހެއްގައި ހިނގި އަލިފާނުގެ ހާދިސާގައި އެ ޓަވަރުގެ މައި ފާޚާނާ ހޮޅިއަށް ގެއްލުންވެ، ބައެއް އެޕާޓްމެންޓުތަކުގެ ފާޚާނާ ބޭނުންނުކުރެވޭ ގޮތް ވެފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން މިރޭ ބުނެފިއެވެ. ''ސަން''އަށް މައުލޫމާތު ދެއްވަމުން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ އަލިފާނުގެ ހާދިސާ ހިނގީ އެ ޓަވަރުގެ ވައިގޮޅިއެއްގެ ތެރޭގައި ކަމަށެވެ. އެ ހާދިސާގައި އެއްވެސް އެޕާޓްމެންޓަކަށް މާބޮޑު ގެއްލުމެއް ލިބިފައި ނުވާކަމަށް އޭނާ ވިދާޅުވިއެވެ. އެހެންނަމަވެސް އަލިފާން ރޯވި ވަގުތު ކަޅު ދުމުގެ އަސަރު ހުރުމުން ދެ އެޕާޓްމެންޓެއްގެ މީހުން ހުސްކުރި ކަމަށް ހިސާން ވިދާޅުވިއެވެ. https://x.com/NDMAmv/status/2017272847861989534 ހިސާން ވިދާޅުވީ، އަލިފާނުގެ ހާދިސާއާ ގުޅިގެން އެ ޓަވަރުގައި އަޅާފައިވާ މައި ފާޚާނާ ހޮޅިއަށް ގެއްލުންލިބި، ބައެއް އެޕާޓްމެންޓްތަކުގެ ފާޚާނާ މިހާރު ބޭނުންނުކުރެވޭ ކަމަށެވެ. އެ ގެއްލުންތައް ދެނެގަނެ، މަރާމާތު ކުރުމުގެ މަސައްކަތް ދިވެހި ސިފައިންނާއި ފުލުހުންނާއި، އެޗްޑީސީ އާއި އެމްޑަބްލިއުއެސްސީ ގުޅިގެން ކުރަމުން އަންނަ ކަމަށް އޭނާ ވިދާޅުވިއެވެ. https://sun.mv/217348 އެ ހާދިސާއާ ގުޅޭ ގޮތުން އެމްއެންޑީއެފުން މިހާތަނަށް ބުނީ، ހިޔާ ޓަވަރު ފަހެއްގައި އަލިފާނުގެ ހާދިސާއެއް ހިނގުމާ ގުޅިގެން ފަޔާ އެންޑް ރެސްކިއު ސާވިސަސްއިން ހަރަކާތްތެރިވި ކަމަށެވެ. ނަމަވެސް ކަމާ ގުޅޭ އިތުރު މައުލޫމާތެއް ދީފައިނުވެއެވެ. ބޮޑު އާބާދީއެއް އޮންނަ ހިޔާ ޓަވަރުތަކުގައި މީގެ ކުރިން ވެސް އަލިފާނުގެ ހާދިސާތައް ހިނގައި، ގެއްލުންތައް ވެފައި އެބަހުއްޓެވެ.