ޒަމާނީ ޓެކްނޮލޮޖީގެ އެހީގައި ތަރިކަ ތަޖުރިބާ ކުރެވޭ ގޮތަށް، އުސްގެކޮޅު އިމާސިވް މިއުޒިއަމަކަށް ހެދުމުގެ މަސައްކަތް ހެރިޓޭޖް މިނިސްޓްރީން ފަށައިފިއެވެ. އިމާސިވް މިއުޒިއަމްތަކަކީ އެ ދާރުލްއާސާރަކަށް ޒިޔާރަތް ކުރާ މީހުންނަށް ބައިވެރިވެވޭ ގޮތަށް، ޒަމާނީ ޓެކްނޮލޮޖީގެ އެހީގައި ތަރިކަ ދައްކުވައިދީ، ތަޖުރިބާ ކުރެވޭ ގޮތަށް ހަދައިފައި ހުންނަ ދާރުލްއާސާރުތަކެވެ. އުސްގެކޮޅު އިމާސިވް މިއުޒިއަމަކަށް ބަދަލުކުރުމަށް ހެރިޓޭޖް މިނިސްޓްރީން ހަވާލުކޮށްފައި ވަނީ، ފަހި ދިރިއުޅުން ކޯޕަރޭޝަން (އެފްޑީސީ) އަށެވެ. އެފްޑީސީން ވަނީ، އިމާސިވް މިއުޒިއަމެއްގެ ގޮތުގައި އުސްގެކޮޅު ތަރައްްގީ ކުރަނީ، ހުރިހާ އުމުރު ފުރާއަކަށް ފެތޭގޮތަށް އެންމެ ޒަމާނީ ވަސީލަތްތަކާ އެކުގައި ކަމަށް ބުނެފައެވެ. https://x.com/Fdc_mv/status/2017205656047268192 ހެރިޓޭޖް މިނިސްޓްރީން ވަނީ އެ މަޝްރޫއުގެ މަސައްކަތް ނިމުމާއެކު ދިވެހިން ތަރިކައާމެދު ދެކެމުން އަންނަ ގޮތް ބަދަލުވާނެ ކަމަށް ބުނެފައެވެ. ހެރިޓޭޖް މިނިސްޓަރު އާދަމް ނަސީރު އިބްރާހީމް ވަނީ މި މިއުޒިއަމް ތަރައްގީކޮށް ނިމޭއިރު، ތަރިކައިގެ ދާއިރާއަކީ އާމްދަނީއެއް ލިބޭ ދާއިރާއަކަށް ވާނެ ކަމަށް ވިދާޅުވެފައެވެ. މިނިސްޓަރު ވިދާޅުވީ، ދިވެހީންގެ ތަރިކަ ހިމާޔަތް ކުރުމަކީ ރައީސް ޑރ. މުޙައްމަދު މުއިއްޒު ޚާއްސަ އިސްކަމެއް ދެއްވާ ކަމެއް ކަމަށް ވިދާޅުވެފައެވެ. https://sun.mv/211533 އުސްގެކޮޅަކީ ރާއްޖޭގެ ރަސްކަމުގައި އުޅުއްވި ބައެއް ބޭފުޅުން ދިރިއުޅުއްވަން ބޭނުން ކުރެއްވި ތަނެއް ކަމަށްވާއިރު، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެ ތަނުގައި ރެސްޓޯރަންޓެއް ހިންގަން 12 އަހަރަށް ކުންފުންޏަކަށް ކުއްޔަށް ވެސް ދިނެވެ. މިދިޔަ ސަރުކާރުގައި އެ އެއްބަސްވުން ވަނީ އުވާލައިފައެވެ. އެ ސަރުކާރުގައި އުސްގެކޮޅު ޗިލްޑްރަންސް ހެރިޓޭޖް ޕްލާޒާއެއްގެ ގޮތުގައި ތަރައްގީކުރުމަށް އެޑްވޮކޭޓިން ދަ ރައިޓްސް އޮފް ޗިލްޑްރެން (އާކް)އާ ވެސް ހަވާލުކުރިއެވެ. ނަމަވެސް، އެ މަސައްކަތް ކުރިއަށް ގޮސްފައެއް ނުވެއެވެ. އުސްގެކޮޅު އެންމެ ފަހުން ބޭނުންކޮށްފައިވަނީ ސަލްޓަން ޕާކްގައި ހުންނަ ދާރުލްއާސަރެއްގެ ގޮތުގައެވެ.