ގާތްގަނޑަކަށް ދެ އަހަރު ދުވަސް ވަންދެން ބަންދުކޮށްފައި ބޭއްވުމަށްފަހު، ޣައްޒާއާއި މިސްރު ގުޅުވައިދޭ ރަފަހް ބޯޑަރު އަންނަ އާދީއްތަ ދުވަހު ހުޅުވަން ނިންމާފައިވާ ކަމަށް އިސްރާއީލުން ބުނެފިއެވެ. ބޯޑަރު ހުޅުވި ނަމަވެސް އެ ސަރައްދުން މީހުންނަށް ދަަތުރުކުރެވޭނީ ވަކި އަދަދަކަށް ކަމަށް، ފަލަސްތީނުގެ ސަރަހައްދުތަކުގެ މަދަނީ ކަންކަން ބަލަހައްޓާ އިސްރާއީލުގެ ޑިފެންސް މިނިސްޓްރީގެ ކޯޑިނޭޓަރު އޮފް ގަވާމަންޓް އެކްޓިވިޓީސް އިން ދަ ޓެރިޓޯރީސް (ކޯގަޓް) އިން މިއަދު ނެރުނު ބަޔާނެއްގައި ބުނެފައިވެއެވެ. "ރަފަހް ކްރޮސިން މެދުވެރިކޮށް ޣައްޒާއިން ނުކުތުމާއި އެތެރެއަށް ވަނުމުގެ ހުއްދަ ދޭނީ މިސްރާ ގުޅިގެން އިސްރާއީލުން. ވަކިވަކި ފަރުދުން ބޯޑަރު ހުރަސް ކުރުމުގެ ކުރިން ސެކިއުރިޓީ ކްލިއަރެންސް ކުރަަންޖެހޭނެ. އަދި ޖެނުއަރީ 2025 ގައި ތަންފީޒުކުރި މެކޭނިޒަމާ އެއްގޮތަށް ޔޫރަޕިއަން ޔޫނިއަންގެ މިޝަންގެ ބެލުމުގެ ދަށުން." ކޮގަޓް އިން ނެރުނު ބަޔާނުގައި ބުނެފައިވެއެވެ. އެ ބަޔާނުގައި އިތުރަށް ބުނެފައިވަނީ މިސްރުން ޣައްޒާއަށް އެނބުރި ދިއުމުގެ ހުއްދަ ލިބޭނީ، މިސްރާ ވާހަކަދައްކައިގެން ހަމައެކަނި ހަނގުރާމައިގެ ތެރޭގައި ޣައްޒާއިން ފުރައިގެން ދިޔަ ރައްޔިތުންނަށް ކަމަށާއި، އިސްރާއީލުން ސަލާމަތީ ގޮތުން ކްލިއަރެންސް ދިނުމަށް ފަހު ކަމަށެވެ. އަދި އިސްރާއީލު ސިފައިންގެ ކޮންޓްރޯލްގެ ދަށުގައި ކަނޑައަޅާފައިވާ ކޯރިޑޯއެއްގައި ސްކްރީނިން އަދި އައިޑެންޓިފިކޭޝަން ޕްރޮސެސްއެއް ވެސް ކުރިއަށް ގެންދާނެ ކަމަށް ބުނެފައިވެއެވެ. ޣައްޒާގެ ނުސައިރަތު ރެފިއުޖީ ކޭމްޕްގައި ކާނާ ހޯދުމަށް ކުޑަކުދިން ކިޔޫގައި. ފޮޓޯ/އޭއެފްޕީ އިސްރާއީލު ސިފައިން އަދިވެސް ޣައްޒާގެ ދެބައިކުޅަ އެއްބައި ކޮންޓްރޯލް ކުރަމުންދާއިރު، ހަނގުރާމަ ހުއްޓިފައިވާ ކަމަށް ބެލެވުނު ނަމަވެސް، އެމީހުންގެ އަސްކަރީ އޮޕަރޭޝަންތަކާއި ހަމަލާތަކުގައި ޣަައްޒާގެ ގިނަ ބަޔަކު ދަނީ ޝަހީދުކުރަމުންނެވެ. ޣައްޒާގެ އިންސާނީ ހާލަތު ގޯސްވެފައިވާތީ، ބައިނަލްއަގުވާމީ ޖަމިއްޔާތަކުން ވަނީ ބޯޑަރު އަލުން ހުޅުވުމަށް ތަކުރާރުކޮށް ގޮވާލާފައެވެ. ކާނާއާއި ބޯހިޔާވަހިކަމާއި ބޭސް ނުލިބިފައިވާ ޣައްޒާގެ ދެ މިލިއަން ވަރަކަށް މީހުންނަށް ބޭނުންވާ އިންސާނީ ތަކެތި ހޯދުމަށް މުހިއްމު އެންޓްރީ ޕޮއިންޓެއް ކަމަށްވާ ރަފަހް ބޯޑަރު ހުޅުވަނީ އިސްރާއީލުން ޣައްޒާގައި ހިންގަމުންދާ ހަނގުރާމަ ހުއްޓުވުމަށް ވެފައިވާ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާގެ ދަށުންނެވެ. އެއްބަސްވުމުގެ ފުރަތަމަ ފިޔަވަހި ނިންމާލާފައި ވަނީ މިދިޔަ ހަފުތާ ކުރީކޮޅުއެވެ. ފުރަތަމަ މަރުހަލާއަށްފަހު ހަނގުރާމަ ހުއްޓާލުމުގެ އެއްބަސްވުމުގެ ހުރިހާ މާއްދާތަކެއް ތަންފީޒުކުރުމުގެ މަސައްކަތް އިސްރާއީލުން ފުރިހަމަ ކުރުމަށް ހަމާސް އިން ވަނީ ގޮވާލާފައެވެ. ޣައްޒާގައި އިސްރާއީލުން 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ހިންގި ޖަރީމާތަކުގައި 71،600 އަށް ވުރެ ގިނަ މީހުން ވަނީ ޝަހީދުވެފައެވެ.