އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަން އޮތް ނަމަވެސް، އަންނަ އާދިއްތައިން ފެށިގެން ބޯހިޔާވަހިކަމަށް ކުރިމަތިލުމަށް ހުޅުވާލަން ނިންމައިފި އެވެ.
ވީ ކިހިނެއް؟ - މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް މުހައްމަދު މުއިއްޒު ވިދާޅުވީ މި ނިންމެވުމަކީ ގޯތި ދެދޮރުގެ ތަނަވަސްކަން ހުރިހާ ރައްޔިތުންނަށް ފަހިކޮށްދިނުމަށް ނިންމެވި ނިންމެވުމެއް ކަމަށެވެ.  
ތަފްސީލް - ހައުސިން މިނިސްޓްރީން މިއަދު ވަނީ 'ގޯތި-ގެދޮރު' ފްރޮގްރާމުގެ ދަށުން މާލޭގައި ދިރިއުޅޭ ރައްޔިތުންނަށް ދިރިއުޅުމަށް ބަންޑާރަ ގޯތި ދޫކުރުމުގެ އުސޫލު އާންމުކޮށްފަ އެވެ. އެގޮތުން:
މި އުުސޫލުގެ ދަށުން ގޯއްޗަށް އެދި ހުށަހެޅުމަށް ހުޅުވާލާނީ އަންނަ އާދިއްތަ ދުވަހު؛ އެ ފުރުސަތު އަންނަ މަހުގެ ނިޔަލަށް އޮންނާނެ
މި އުސޫލުގެ ދަށުން ދެ ކެޓަގަރީއަކަށް ބަހާލައިގެން ގޯތު ދޫކުރާނެ
ގޯތި ދޫކުރާނީ ރަސްމާލެއިން
ގޯތީގެ ބޮޑުމިނަކީ 1،250 އަކަފޫޓު
މި ކެޓަގަރީން 1،000 ގޯތި ދޫކުރާނެ ކަމަށް ރައީސް ވަނީ ވިދާޅުވެފައި
'ގޯތި-ގެދޮރު' ފްރޮގްރާމުގެ ދަށުން މާލޭގައި ދިރިއުޅޭ ރައްޔިތުންނަށް ދިރިއުޅުމަށް ބަންޑާރަ ގޯތި ދޫކުރުމުގެ އުސޫލުގެ ދަށުން ގޯތި ދޫކުރާ ދެ ކެޓަގަރީއަކީ:
މާލޭ ރަށްވެހިންގެ ކެޓަގަރީ:
މި ކެޓަގަރީގެ ދަށުން ގޯއްޗަށް އެދެވޭނީ 18 އަހަރުން މަތީގެ މީހުންނަށް
މާލޭ ރަށްވެއްސަކަށް ވެފައިވާތާ މަދުވެގެން 1 އަހަރު ވެފައިވާންޖެހޭ
މާލޭގައި ދިއިުޅޭ އެހެން ރަށްރަށުގެ ރަށްވެހިންގެ ކެޓަގަރީ:
މި ކެޓަގަރީގެ ދަށުން ގޯއްޗަށް އެދެވޭނީ 18 އަހަރުން މަތީގެ މީހުންނަށް
މާލޭގައި ދިރިއުޅޭތާ މެދުނުކެނޑި 15 އަހަރު ވެފައި ވާންޖެހޭ
މި ދެ ކެޓަގަރީއަށް ވެސް ކުރިމަތިލެވޭނީ ރާއްޖޭގެ އެއްވެސް ސަރަހައްދަކުން އެ މީހަކަށް 400 އަކަފޫޓަށްވުރެ ބޮޑު ގޯއްޗެއް ނުވަތަ ގޯއްޗަކުން ބަޔެއް ލިބިފައި ނުވާ ނަމަ އެވެ.
މީގެ އިތުރުން:
މައިންބަފައިން، ދަރިން، އަނބި/ފިރިމީހާގެ ނަމުގައި ރެޖިސްޓްރީކޮށްފައިވާ ގޯއްޗަކުން ތަރިކައިން ނުވަތަ ވަސިއްޔަތަކުން ލިބެން އޮންނަ ގޯތި/ގޯތިން ބަޔެއް ދޫކޮށްލަން އެއްބަސްވާ ނަމަ
އެ މީހެއްގެ ނަމުގައި އެއްމެދު ގޯއްޗެއް ރެޖިސްޓްރީކޮށްފައިވާ ނަމަ، ގޯތި ބަހައިގެން ލިބޭ ބައި ބާކީ ތިބި މީހުންނަށް ދޫކޮށްލަން އެއްބަސްވުން
ސަރުކާރުގެ ބޯހިޔާވަހިކަމުގެ ޕްރޮގްރާމަކުން ފްލެޓެއް ލިބިފައި ނުވުން
އެފަދަ ޕްރޮގްރާމަކުން ލިބިފައިވާ ގޯއްޗެއް ނުވަތަ ފްލެޓެއް އެހެން މީހަކަށް ވިއްކާ ނުވަތަ ހިބައިން ދީ ނުވަތަ ދޫކޮށްލާފައި ނުވުން
ގުޅުން ހުރި - 'ބިންވެރިޔާ' ސްކީމުގެ ދަށުން އެހެން ފަރާތަކާ ގުޅިގެން ފޯމު ހުށަހަޅައިގެން ގޯތި ލިބުނު މީހުންގެ ތެރެއިން އެ ފޯމުގައި ގުޅިފައިވާ ހުރިހާ އެންމެން އެ ގޯތި އެއްކޮށް ދޫކޮށްލަން އެއްބަސްވާ ނަމަ، ގޯތި ލިބުނު ކޮންމެ މީހަކަށް ވަކި ގޯއްޗެއް ލިބޭ އުސޫލު ވެސް މިއަދު ވަނީ އާންމުކޮށްފަ އެވެ.
އެނގުން މުހިއްމު - މި ސަރުކާރުގެ 'ބޯހިޔާވަހިކަން އެންމެންނަށް' ސިޔާސަތުގެ ދަށުން ގޯއްޗާއި ފްލެޓަށް ކުރިމަތިލާން މިހާރު ވަނީ ހުޅުވާލައިފަ އެވެ.
މި ފުރުސަތުގެ ދަށުން ގްރޭޓާ މާލެ ސަރަހައްދާއި ރަސްމާލޭން ޖުމްލަ 15،000 ގޯތި ދޫކުރާނެ އެވެ. އަދި ގްރޭޓާ މާލެ ސަރަހައްދުން 7،900 ފްލެޓު ދޫކުރާނެ އެވެ.